Read Kissi Masaa kialaa n'yamaa 6 Bible Online

Masaa kialaa n'yamaa 6 - Kissi bible

Masaa kialaa n'yamaa 6

¹Mí Israɛlla tosa vɛlɛ ɲɛ hɛnan Mɛlɛka loo, mí Mɛlɛka mal nda Madiannda o ba háá le vɔsilan tan ŋɔmmɛw.

²Mí Madiannda tuisi Israɛlla sangaa coo. Le Madiannda hiɔlɔnndo, mí Israɛlla sɔɔndian, má kɔa o bólta bɛndula co o pembon tɛɛn-ndan nin, má kɔ cal o buululan nin a o powta kpovala bɛndu-bɛndulan coo.

³Te Israɛlla ndáà saŋ pɛ maalon o ciɛɔn ndan nin, Madiannda, Amalɛkea a vanaa fulaa a ba paalen le can-ndo-a ndáà hun del nda coo a cɔwvo.

⁴Ndáà kila dɔ́ɔ́ngɔ́ ndaa o lɛŋii ndɛi coo, ndáà tɛɛmbuu tɔlɔɔla ndalan o ciɛɔn nin kɔlan tiiyaa háá Kaasa ciee-lekɔɔ. Kandɔɔ nawva, sofɛlɛa, saa, kɔ bii niko a ɲɛdiaa, ndáà basu selemenden, ndáà kɔɛnnun. Ndáà mel Israɛlla ɲɛ-ɲɛ le.

⁵Kani te ndáà cɛn pɛ hunɔɔ, ndáà hin a cɔlua ndaa a á cɛila-kolala-toandaala ndalan. Sɛ́lɛ́ bɛndu-bɛndoo pila ndáà hun ni maa n'sóónɔ. Nda pila a ɲɔɔmɛaa ndaa, vanáà nɔla nda cii cɔm te. Le lɛŋnden tɛɛmbuuo ndáà hun lenin ni.

⁶Le hee, mí kuɛi toal Israɛlla coo le ɲɛ Madiannda va nda kon tosallo-o, mí Israɛlla koŋul o Mɛlɛka lo.

⁷Mɛɛ nda tɛɛlun Mɛlɛka le nda baŋaa Madiannda o ba,

⁸mí Mɛlɛka vim nda vana-tɛɛngaa-diom Hala-o, mí vana kon dimul nda aa: «Nuaa Mɛlɛka Hala Israɛlla soo ni aa ‹Ya soli niaa Esipte ni, ya soli niaa nɛɛ niaa va o cɛlen nin-nda ni.

⁹Mí baŋa niaa Esiptea a vanaa va niaa saangiaa-a kpow o ba, mí toaw nda niaa laci, mí ke niaa lɛŋnde ndalen.

¹⁰Mí dimul niaa maa ya co Mɛlɛka Hala niaa ni, la biilu halaa Amoriia le, vanaa niaa co haa o lɛŋnde ndalen nin-nda pɛɛn. Kɛ la tui sɔɛi nii le.›»

¹¹O kon, mí mɛlɛkanɔ Hala-o hun, mó cal o terebɛnteo bɛngu Ofra o Yoas lo, o fula o yungu Abiesɛr-o nin-ndo pɛɛn. Sedeɔn po ndɔ va maalon lɔɔ o doolaa nin le mun kɔlan vionɔɔ yɔŋii Madiannda ndáà cɔ malun kalan.

¹²Mí mɛlɛkanɔ Hala-o fulal ndu ceen, mó dimul ndu aa: «Mɛlɛka co nɔm ikɛi, nɔm kuubanɔɔ dialun fulaa ho!»

¹³Mí Sedeɔn muli aa: «Mal haki, vana ni bɛndoo! Te Mɛlɛka ndóò va pɛ naa ikɛi, dɛnnda palaalan-ndan láà tol naa coo? Ɔ́ɔ̀ niko dɛnnda kaamaala fuɲaa naa dimi làn maa Mɛlɛka tosal nda mó soli nda Esipte lan? Mɛlɛka cii naa kɛɛ, mó mal naa Madiannda o ba.»

¹⁴O kon, mí Mɛlɛka mulin nɛɛ Sedeɔn va-a, mó dimul ndu aa: «Kɔ a kpaaya n nɔ hoo-o, ma kɔ baŋa Israɛlla Madiannda o ba. Ya co nɔm vomɔɔ ni.»

¹⁵Mí Sedeɔn muli aa: «Mal haki, vana ni bɛndoo! A yɛɛ nɛ kpeekpei ya baŋa yɛnin Israɛlla? O polale Manase len nin kpow, yungu nuu hiow vaa yungu bahavɛiyo, o naa lo cɛinin vɛlɛ kpede, ya hiow dɔɔnanndo.»

¹⁶Mí Mɛlɛka dimi aa: «Ya pila vanin nɔm ikɛi, a koaŋnin Madiannda mɛɛ vana del vana pilɛ coo nuaa ma koŋ ndu yɛ.»

¹⁷Mí Sedeɔn muli aa: «Taa cɛl pɛ, tuinun ya iɲíí ma cɔm ya tɔɔmaseloo pum, le sinaa maa nɔm lekɛ́ndɛi co sɔɛi o ya lo ni.

¹⁸Fáŋàn nanu le, háá mì kɔ hun a sálà ya yeema le nɔm solullo-o, mì hun kɛsi ndu nɔm o hɔl.» Mí Mɛlɛka dimul ndu aa: «Mɛɛ i co lo nanu háá ma kɔ hun.»

¹⁹Mí Sedeɔn kɔa, mó kɔ yaw cuin téndóó, mó toosiaa buloo a kpeyanndo kiloo ca, kɛ o vow lɛvɛn lenin te. Mó vow vision o kambɛiyo nin, mó vow mɛmma n'rɛsɛnndan o hemndo nin, mó kɔ kɛsi o terebɛnteo bɛngu, mó cɔm ndu.

²⁰Mí mɛlɛkanɔ Hala-o dimul ndu aa: «Kɔ kɛsi vision a bulu toosian hoo a lɛvɛn too o pow bandíláà ho coo, ma tala mɛmma n'rɛsɛnndan lecoo.» Mí Sedeɔn tosa lende.

²¹Mí mɛlɛkanɔ Hala-o yulu sionnde va ndu o ba len, mó pilan visiei a bulu ndóò toosian kon a lɛvɛn too. Fɔ́ɔ́fɔ̀, mí yinnden le bii vum o powvo, mí le loam ɲɛm mun. O kon, mí mɛlɛkanɔ Hala kon lo ndu o hɔl.

²²Sedeɔn ndóò cɔu lende maa mɛlɛkanɔ Hala-o ni, mó dimi aa: «I kɔndu dɛnɛ fɔ, Maalii Hala! I ce mɛlɛkanɔ nɔmndo a lehɔl ciŋ.»

²³Kɛ mí Mɛlɛka dimul ndu aa: «Ɲulul kɔl, siòòŋii bii nɔm te, a vinin te.»

²⁴Mí Sedeɔn cɔaw fonda-loamaa-lasálàá o foofo kon le Mɛlɛka, mó ke fonda-loamaa-lasálà kon diolan aa Adonai-Salɔm (kon co dimio ni aa «Mɛlɛka co kɔlɲuloo ni»). Fonda kon co vɔ háá paalen nden Ofra o lɛŋnde yungu Abiesɛr-o len coo.

²⁵O ɲumma pilɛma man nin, mí Mɛlɛka dimul Sedeɔn aa: «Bii naw tova téndé fuɲa nɔm-ndo, naw tova komnun o naw tova tasoo kɔɔli-o[9], o nɔ vɔsilan laŋɔmmɛw-vo, ma puusiaa fonda-loamaa-lasálà fuɲa nɔm ndóò solul Baal sálàlan-ndo, ma komba yɔm soolaa co lon-ndo.

²⁶O kon, ma cɔw fonda-loamaa-lasálà kɛndɛ-kɛndɔɔ le Mɛlɛka Hala nɔmndo o pembii pɔmbɔɛi he coo. Ma cua naw tova diinndɔɔ, ma soli ndu sálà loamaa, ma tɛɛndiaa yɔm soolaa kon le sálà kon lomɔɔ.»

²⁷Mí Sedeɔn cua langbaa n'van tɔ́ o vanaa ndɔa baalaa tɛɛn, mó tosa ɲɛ Mɛlɛka dimul ndu kon le tosaa-o, kɛ siòònde va ndu a vanaa va o nda lo cɛinin-nda a vanaa va vɛlɛ o kobi kon nin-nda, mó cum icɔllo le dɛnnda lan kpow tosaa.

²⁸Idiiyo púŋ, mɛɛ vanaa va o kobi kon nin-nda cɛn, má ca máán Baal-lo o puusiaa kpede, yɔm soolaa va lon-ndo bɛɛ va o kombɛiyo, naw tova komnun o naw tova tasoo kɔɔli-o, ndóò cuu nin sálà loamaa soli o fonda-loamaa-lasálà ndóò cɔw sɛnɛi-yo coo.

²⁹Má va ɲuunianndo vellaa-velle aa: «Nɛ̀ɛ́-nɛ̀ tosa yɛ dɛnɔɔ ho?». Má fɛfɛla sɔɛi ken, má yaasiaa ndi, má sina maa Sedeɔn po Yoas-o tosa dɛnɛ kon ni.

³⁰Mí vanaa va o kobi kon nin-nda dimul Yoas aa: «Soli po nɔmndo mo sɔla piɔ́mndo, le puusiaa o puusiaa máán Baal-lo, mó komba yɔm soolaa va lon-ndo-o.»

³¹Kɛ mí Yoas mulul vanaa hin kan-nda kpow aa: «Mò va maa niaa bɛnda ni mi la lɔɔnun ibuŋ le Baal? Vɛ̀ɛ̀ niaa bɛnda ni mi la sɔɔnguu le ndu malaa? Vana-vana sim nihau pɛ mo soo le Baal, vana kon co vu telen pá mì ɲɔɔ tenga. Te hala Baal co lekɛ́ndɛi ni, mɛɛ la mal ndu mì ndu pila soo le máán ndɔ nda puusiaa-o.»

³²Paale len nda ke Sedeɔn diolan ni aa Yerubaal, má dimi aa: «Baal pila ciŋilan ndu le máán ndɔ o puusiaa-o.»

³³O kon, mí Madiannda, Amalɛkea a vanaa fula o lɛŋii co a ba paalen le can-ndo-e nin-nda kpow a cuungian, má taŋ Yurdɛn, má kɔ kila dɔ́ɔ́ngɔ́ɔ̀ o dɛngbɔɔ Yisreɛl nin.

³⁴Mí kɔl Mɛlɛka-o toal Sedeɔn coo, mó hɔŋ buloo le vanaa fula o polale Abiesɛr len nin-nda veeloo le ndu delɔɔ kɔɔli.

³⁵Mí Sedeɔn viam kiilaa o tàndá Manase-o kpow nin. O tàndá kon nin bɛɛ kpow, mí vannda cuungian le kɔlan nda ndaa latulu. Mó viam vɛlɛ kiilaa o vanaa fula o polale Asɛr nin, o polale Sabulɔn-nden nin a o polale Nɛftali len nin-nda lo, maa nda kpow a komal ndu.

³⁶Mí Sedeɔn dimul Hala aa: «Te ya simnin laci mì Israɛlla sɔla baŋaa mɛɛ n dimi yɛ ni,

³⁷mɛɛ i co lakɔ pulii kola yiiŋii saa pɛngɛla o kpele lɔaa n'mallo coo, te kɛmndan ma cɛɛluu pɛ lecoo kínɛí, mì fonda tɔ̀u lo o vesɛi sɛ́ɛ́n, mɛɛ i sina dɔ́ɔ́ maa lekɛ́ndɛi ya n siminin laci le Israɛlla baŋaa mɛɛ n dimi yɛ ni.»

³⁸Nduyɛ, mí ɲɔɔ tosan lende kpafii. Diimandɔɔ, mó pena cɔnɔn idiiyo púŋ, mó vàà kola ipɛngɛ kon, mí kɛmma cal lecoo-an ma fula, mí ma pia taala kólaa ca.

³⁹Mí Sedeɔn dimul Hala aa: «A yandi, fula kɔl a ya le, sɔɛi nii mɛɛlɛi co nihau hee ni: i yeema vɛlɛ mì tɔɔmaseloo yɔŋnun a kola ipɛngɔɔ ho. Kɛ o laan, mì fonda tɔ̀u kpow liva a kɛmndan, mì kola ipɛngɔɔ lo o vesɛi sɛ́ɛ́n.»

⁴⁰Mí Hala tosa vɛlɛ lende icɔl kon, mí fonda tɔ̀u kpow liva a kɛmndan, kɛ kola ipɛngɔɔ vannun o vesɛi sɛ́ɛ́n.