Read Kissi Masaa kialaa n'yamaa 7 Bible Online

Masaa kialaa n'yamaa 7 - Kissi bible

Masaa kialaa n'yamaa 7

¹Idiiyo púŋ, mí Sedeɔn ndáà veelu aa Yerubaal-lo can nda vanaa ndɔa cɔwva, má kɔ kila dɔ́ɔ́ngɔ́ɔ̀ o soon mamɛnndo Harɔd ikɛi. Dɔ́ɔ́ngɔ́ Madiannda va nda tiŋ a maluaŋ a ba pembei More, o bóllo nin.

²Mí Mɛlɛka dimul Sedeɔn aa: «Vanaa hin nɔm haa kɔɔli-a co bɔɔ sɛ́lɛ́ le Madiannda malɔɔ nɔm o ba, yɔŋii Israɛlla kɛɛ ya kuundiaa mì nda pila kuundian mà dimi aa: ‹A ba nàá naa n cinda ni.›

³Lelan, yondal nda sɔɛi he, ma dimul nda maa vana-vana simul kɔl te, ndu faŋan o pembei Kalaad ikɛi few, mò muungu o ndu lo.» Mí vannda vaalan bidiin a latiɔn a muungu o la nda lo, má lo vaalan tɔ́.

⁴Kɛ mí Mɛlɛka dimul Sedeɔn aa: «Háá hau, vanaa lo vɔ-a co bɔɔ sɛ́lɛ́. Tuisi nda o pee pɔmbɔɔ kɔngɔ, lon ya pila co nɔm nda hɛlul ni. Vana ya dimul nɔm pɛ maa niaa ndu co lakɔ ni, la kɔɛ niaa ndu, o ya kuuna pɛ kɔlan nɔm kɔɔli, ndu kɔa le.»

⁵Mí Sedeɔn toal a vanaa ndɔa cɔwva kpow o pee pɔmbɔɔ, mí Mɛlɛka dimul ndu aa: «Piɔw vannda kundalan tan tiɔn: a dombinin mɛnndan a lediɛɛmu le kolɔɔ maa n'tun-nda, a handu kan kunda nda. A baŋnin vulan mà kol-la vɛlɛ kunda nda.»

⁶Mí a va mɛnndan kɔndɔɔ a laba le kolɔɔ-a va faw-faw n'van kɛmɛ leyáá, mí vanaa tɔ̀a kpow baŋ vulan, má ciŋan le kolɔɔ.

⁷Mí Mɛlɛka dimul Sedeɔn aa: «A n'van kɛmɛ leyáá-a kɔndu haa mɛnndan a laba le kolɔɔ-a ya baŋanin niaa ni, mì mal Madiannda niaa o ba. Vanaa tɔ̀a kpede, nda bɛnda mà muungu o la nda lo.»

⁸Mí n'van kɛmɛ leyáá-a kan lo Sedeɔn ikɛi lon, mí vanaa tɔ̀a kpow mɛi balo ndáà hin-ndo a bulula ndala hɔŋaalan ndon, má muungu o la nda lo. Dɔ́ɔ́ngɔ́ Madiannda va nda a lebɛngu o dɛɛlaa nin.

⁹Icɔl kon, mí Mɛlɛka dimul Sedeɔn aa: «Cɔn ma kɔ del Madiannda coo a cɔwvo o dɔ́ɔ́ngɔ́ ndaa nin, kani i cii nda malɔɔ niaa o ba.

¹⁰Te siòònde co nɔm pɛ le kɔlan, mɛɛ la kɔ niaa Pura vana nɔm baala,

¹¹ma kɔ tuei ɲɛ nda co dimio lon-ndo, o kon a sɔlanin yoomuan le nda kuello.» Mí Sedeɔn kɔa nda Pura vana ndɔ baala háá má tiiya nɛɛ kpalilla va-a.

¹²Madiannda, Amalɛkea a vanaa kelaa fula a ba paalen le can-ndo-a va a tivaa sɔ́ o dɛɛlaa nin, vanáà ce nda pɛ aa sóónɔa kunda bɛndua ni. Ɲɔɔmɛɛa ndaa ndáà cuu cɔm te, nda va sɛ́lɛ́ maa sióónndon o mɛmma ihɛllan kɔngɔ.

¹³Telen Sedeɔn tiiya-o kpafii, mí langbanɔɔ pum va caan ndɔ lɔma o sɔl-lan cɔmndo, mó va dimio aa: «O lɔma nima sɔlan nin, mí ca bulu tiilan nda toosiaa a ɔrse-o pimbullo o dɔ́ɔ́ngɔ́ Madiannda nin, mó hun lɔaanun o cɛi-kola-toandaa, mí cɛi kon komba vulu-vulu, mó mulin macali.»

¹⁴Mí caan ndɔ mulul ndu aa: «Ken ndi nɔ kɔlɔ celen te, Sedeɔn Israɛlnɔ, po Yoas-o co Madiannda hinul a cɔwvo ni, Hala cii naa a dɔ́ɔ́ngɔ́ɔ̀ kpede malɔɔ ndu o ba.»

¹⁵Telen Sedeɔn cii lɔma sɔlaama man a tɛɛsiaa ndɔɔ tueyɔɔ-o, mó baŋ vulan le Hala balikaa mello. O kon kɔɔli, mó muungu o dɔ́ɔ́ngɔ́ Israɛlla nin, mó kɔ yonda aa: «La cɔn, Mɛlɛka cii dɔ́ɔ́ngɔ́ Madiannda malɔɔ naa o ba.»

¹⁶Mí Sedeɔn piɔw vanaa kɛmɛ leyáá-a kan kundalan tan yáá, mó piɔw nda kpow bulula hɔŋaalan, bonyun vovaa mamɛŋun fondon a tɛngɛla leyinndan le vowvo o bonyun mun nin.

¹⁷Mó dimul nda aa: «Ya niaa vanin tofaa ni, te i tisa dɔ́ɔ́ pɛ o dɔ́ɔ́ngɔ́ ndaa nin, ɲɛ-ɲɛ ya tosa nin pɛ, la tosa lende kpafii.

¹⁸Te i hɔŋ pɛ buloo, mì vanaa co ya ikɛi-ya kpow hɔŋ, niaa bɛɛ la hɔŋ o dɔ́ɔ́ngɔ́ɔ̀ balɔɔ sɔ́, la yonda aa: ‹Le Mɛlɛka a le Sedeɔn!›»

¹⁹Mí Sedeɔn nda vanaa va ndu kɔɔli-a tiiya o dɔ́ɔ́ngɔ́ɔ̀ ikɛi fiɔ́ɔ́-fiɔ́ɔ̀. Ndáà yɛlɛma ko kpalilla sɛnɛi a di-tɛɛndo kínɛí. Má hɔŋ bululan, má pesi bonyun va nda mun o laba-on.

²⁰Mí kundala tɔ̀lan kpede la hɔŋ bululan, má pesi bonyun va nda o laba-on, má bii tɛngɛla leyinndan a bala mɛltan, má bii bululan a bala kɛndɛlan le hɔŋndo, má va niko kɔlan a yondaa o lepilɔɔ aa: «Mɔɛi cɔwve co le Mɛlɛka a le Sedeɔn.»

²¹Mí vana-vana lo o fonda ndɔɔ o dɔ́ɔ́ngɔ́ɔ̀ balɔɔ sɔ́, kɛ mí vanaa va o dɔ́ɔ́ngɔ́ɔ̀ nin-nda kpow yom a kiltan, má ɲaanun a yeelan.

²²Telen vanaa kɛmɛ leyáá-a kan va bululan hɔŋndo-o, mí Mɛlɛka hiŋ Madiannda hɔlla o dɔ́ɔ́ngɔ́ɔ̀ nin kpede, mí nda pila diuvan. Mí vanaa tɔ̀a lo-a ɲaanun háá Bɛt-Sita a kpengii Serera-e[10], má kɔ tiiya Abɛl-Mehola dí a kiltan, kobi co Tabat ikɛ-yo pɛɛn.

²³Mí vanaa cɔvaa Israɛlaa fula o polale Nɛftali len nin-nda, a fula o polale Asɛr len nin-nda a á fula o polale Manase len nin-nda kpede a mɔɔsian, má tisa Madiannda kɔɔli.

²⁴Mí Sedeɔn viam kiilaa o tàndá n'pembu Efraim-ndo nin, má kɔ dimul vannda aa «La kɔ cɛɛlian Madiannda, mì la biw soonnda mamɛnndan háá Bɛt-Bara, mì la bii vɛlɛ peo Yurdɛn.» O kon, mí vanpiaandua fula o polale Efraim-nden nin-nda mɔɔsian, má kɔ biw soonnda mamɛnndan háá Bɛt-Bara handɔɔ niko o Yurdɛn coo.

²⁵Má bii simlacia Madiannda a ŋiɔn, Ɔrɛb nda Seɛb. Má dii Ɔrɛb o pow bandíláà Ɔrɛb, má dii Seɛb o doolaa Seɛb, má toaw Madiaŋaa tɔ̀a. Má yoo Sedeɔn bolle Ɔrɛb len a bolle Seɛb len nɛɛ o va Yurdɛn leeloo-a.