Read Kissi Masaa kialaa n'yamaa 8 Bible Online

Masaa kialaa n'yamaa 8 - Kissi bible

Masaa kialaa n'yamaa 8

¹Mí vanaa fula o polale Efraim-nden nin-nda dimul Sedeɔn aa: «Le yɛɛ nɛ n tosal-lɛ naa dɛnɛ súú vaa nuaa? Le yɛɛ nɛ a veelu naa le Madiannda cɔlɔbaa naa niaa latulu le?» Má sɛɛngian a ndu taw.

²Kɛ mí Sedeɔn dimul nda aa: «Ɔ́ɔ̀ dɛnɛ bɛndu ya tosa-o, o vana nɔla tuuvo a kpaaya niaa-o? Niaa vanaa fula o polale Efraim-nden nin-nda, hali ɲɛ-pɔmbɔ daama niaa cɔm kpaaya niaa ni, kon hiow dɛnɛ naa n tosa hoo naa yungu nuu-o, yungu Abiesɛr-o pɛɛn.

³Hiovɔɔ o kon coo, niaa o ba le Hala mal masaa Madiannda Ɔrɛb nda Seɛb le? Vɛ̀ɛ̀ mí ya pila nɔla dɛnɛ vaa lende tosa?» Ndóò dimullo nda lende, ma ɲulul kɔl.

⁴Mí Sedeɔn tiiya Yurdɛn o peelo, mó taŋ nda n'van kɛmɛ leyáá-a va ndu kɔɔli-a. Ndáà sanga nin taw, kɛ a va vɔ yaamɔɔa kiltan kɔɔli tuŋ.

⁵Ndáà tiiyaa Sukɔt, mí Sedeɔn dimul vanaa va lon-nda aa: «La ke ya bulu tiilanndo le vanaa ya hin haa kɔɔli-a, kani a sanga nihau taw, masaa Madiannda naa n co tovɔɔ ni, Seba nda Salmunna pɛɛn.»

⁶Mí simlacia Sukɔtea mulul ndu aa: «Ɛ-kɛ a nɔla vɔ Seba nda Salmunna le, a tol dɔ́ɔ́ naa kɔɔli le vanaa nɔmaa cɔwva ɲɛdiaa keo?»

⁷O kon, mí Sedeɔn dimul nda aa: «Te Mɛlɛka ke ya pɛ mì nɔla Seba nda Salmunna, mɛɛ la va niko kɔl maa cimbulun co o lɛŋnde veselɛilen nin-ndon a siɛmbullon ya co cua le niaa koŋɔɔ ni.»

⁸Cɔnɔnndo lon, mó hel Penuɛl, mó kɔ piɛi vɛlɛ vanaa va lon-nda ɲɛ pilɛ kon, kɛ muli Sukɔtea muli-o koni nda bɛɛ mulul ndu ni.

⁹Mí Sedeɔn dimul vɛlɛ kan aa: «I kɔ nɔla pɛ yaamɔaa nia, i co hunɔɔ cɛi coocoo cumulaa niaa ho piɔlɔɔ.»

¹⁰Seba nda Salmunna vannun Karkɔr, vanaa ndaa cɔwva va nda ikɛi lon le vaalan tɔ́ a laŋuɛɛnu. Nda kínɛí ndáà lo o vanaa cɔvaa kelaa fula a ba paalen le can-ndo-a tɛɛn n. Kani vanaa cɔwva vaalan kɛmɛ a bidiin ndáà vi o cɔwvo ni.

¹¹Mí Sedeɔn kei o nɛi vanaa cel o pumbu le-a keì-yo, Noba a Yɔkboha a ba paalen le can-ndo, mó mɛngɛla yaamɔaa ndɔa, mó kɔ del nda coo a cɔwvo nɛɛ nda va o dɔ́ɔ́ngɔ́ɔ̀ nin-nda, yiyan ndaa va maa ɲɛ-ɲɛ yɔŋnunnin nda lon te.

¹²Mí Seba nda Salmunna, masaa ŋiɔŋaa Madiannda sungu kiltan. Mí Sedeɔn sungu lan nda kɔɔli, mó kɔ kpuva nda. Mí vanaa ndaa cɔwva sɔɔndian kpow.

¹³Cɔwvo cuvɔɔ, o muungoo, mí Sedeɔn kei a Herɛs,

¹⁴mó bii langbanɔ felengoo pum fulaa Sukɔt, mó ɲuna ndu le ndu diola simlacia a langbaa kɛsun kálàá Sukɔt sɛvallo. Mí kon sɛva, a va faw-faw n'van belaŋɔmmɛw a à ŋɔmmɛw.

¹⁵Mó kɔa ciee, mó kɔ dimul Sukɔtea aa: «Le Seba nda Salmunna le niaa va ya yeowlan te, mí la dimul-la aa: ‹Ɛ-kɛ a nɔla vɔ Seba nda Salmunna le, a tol dɔ́ɔ́ naa kɔɔli le langbaa nɔmaa sanga-a ɲɛdiaa keo?› Mɛɛ la ce niko Seba nda Salmunna!»

¹⁶Mó cua cimbulun co o lɛŋnde veselɛilen nin-ndon a siɛmbullon, mó biw kaasoŋaa kɔlkalua va Sukɔt ciee lon-nda kpede, mó koaŋ nda koŋɔɔ pila a mun.

¹⁷Mó diw vɛlɛ vanaa va icali Penuɛl-la, mó mulin mo pial cɛi coocoo cumulaa ndaa.

¹⁸O kon kɔɔli, mí Sedeɔn ɲuna niko Seba nda Salmunna aa: «Vɛɛ nɛ vanaa niaa diw Tabɔr-a va yɛ súú?» Má muli aa: «Niaa ndaa velanndo pila niaa velan ni, vanáà ce pɛ nda aa cuavaa lemasaa ni.»

¹⁹Mó dimul nda aa: «Ndepilɛa nia nda va ni, kala pilɔɔ kpé naa n va ni. Le Mɛlɛka yoomaa, te niáà dii nda lɔ́ɔ́ kon te, ya bɛɛ i ve niaa diyɔɔ le.»

²⁰Mó dimul Yetɛr po ndɔ tasoo aa: «Cɔn ma diw nda!» Kɛ poombɔɔ soli mɔɛi cɔwve o boo nin te, siòònde va ndu, kani poombɔ taanin-taanin o va vɔ ni.

²¹Mí Seba nda Salmunna dimul Sedeɔn aa: «O co fisa mì nɔm pila cɛn ma dii naa, kani langbanɔ kálàá bɛnda le dɛnɛ vaa nuaa tosaa ni.» O kon, mí Sedeɔn diw masaa ŋiɔŋaa kan, mó tiimbuu ɲɛm kɛndɛn ndáà bayiaa ɲɔɔmɛaa ndaa-on.

²²O kon kɔɔli, mí Israɛlla dimul Sedeɔn aa: «Va simlacinɔ naa, mì po nɔmndo hun muungu fɛɛn o fonda nɔmndo. O ndu kɔɔli, mì po nɔm imamaa muungu vɛlɛ o fonda pilɛ kon. Kani nɔm baŋa naa Madiannda o ba ni.»

²³Mí Sedeɔn mulul nda aa: «Kaali! O co ya le vanin simlacinɔ niaa le, o co vɛlɛ po nuu le. Mɛlɛka pila vanin simlacinɔ niaa ni.»

²⁴Mó handu vɛlɛ diomndo lecoo aa: «Ɲɛ ya co niaa piɛi-yo co hoo ni: niaa kpow, vana-vana ke ya kelɛi suei i pilɛ, i o sɔla o bolofaa cɔwvo nin-nde.» Madiaŋaa ndáà nɔla kan-nda ndáà nɔ kelan sianion o n'su, kani o polale Ismaɛl-ten nin ndáà fula ni.

²⁵Mí Israɛlla mulul Sedeɔn aa: «N co nɔm mun ke a yeemɛi nɛi.» O kon, má pɛngɛla doma bɛndoo pum lɛŋ, mí vana-vana kɛsi kelɛi suei ipilɛ fulaa o ɲɛm ndóò sɔla o bolofaa cɔwvo nin-ndon nin.

²⁶Mí kelan n'sianin Sedeɔn piɛi mun-ndon bɛnda kilolan bidiin. Mó sɔla vɛlɛ ɲɛm kɛndɔn, kelan lanion, domala kɛndɛ-kɛndɛla siaŋala masaa Madiannda ndáà vownun-ndan a yɔɔva va ɲɔɔmɛaa ndaa o labolo-o.

²⁷Mí Sedeɔn cɔaw piɔmndo a sianin mun, mó kɛsi ndu Ofra o ndu lo ciee. Mí Israɛlla kpow a laasian o ndu sooloo nin. Mí dɛnɛ kon siŋnun yaŋɔɔlen le Sedeɔn a yungu ndɔɔ.

²⁸Kandɔɔ o telen kon, mí Madiannda luɛi Israɛlla o ba bɛngu, a fula lɛ lɔ́ɔ́-lɔ́ɔ̀ le. Mí lɛŋnden le sɔla kɔlɲuloo háá vɔsilan belehiɔɔlu, o palɛi Sedeɔn va yoomu-e kpow nin.

²⁹Mí Yerubaal[11], po Yoas-o muungun, mó kɔannun o ndu lo.

³⁰Mí Sedeɔn vialu poaa belaŋɔmmɛw, kani ndóò nɔ laandua taw.

³¹Ndóò nɔ sámáá pum Sikɛm, mí kon vilul ndu poo, mó ke ndu diolan aa Abimelɛk.

³²Mí Sedeɔn, po Yoas-o yuuva fɔlɔn kudɛɛ-kudɛɛ malan o vu. Má kumbu ndu Ofra, o ciee vanaa fula o polale Abiesɛr len nin-nda nin, o sɛi Yoas fuɲa ndɔ-o nin.

³³Sedeɔn vuo, mí Israɛlla muungu vɛlɛ Baal sooloo. Má siinguu Baal-Berit hala ndaa.

³⁴Má pɔɛɛnun Mɛlɛka Hala ndaa, o baŋa nda yaamɔaa ndáà balu nda kpow-va o ba-o pɛɛn.

³⁵A dɛnɛ kɛndɛ Sedeɔn ndáà veelu vɛlɛ aa Yerubaal-lo tosal Israɛlla-o kpow, a sina kɛndɛi ndɔɛi mà caa yungu ndɔɔ biyɔɔ le.