Read Kissi Masaa kialaa n'yamaa 9 Bible Online

Masaa kialaa n'yamaa 9 - Kissi bible

Masaa kialaa n'yamaa 9

¹Mí Abimelɛk po Yerubaal-lo kɔa Sikɛm le sɔɛi nda bomaa ndɔa, a yungu kala ndɔ-o kpow. Mó dimul nda aa:

²«La kɔ mì la ɲuna cuavaa lelɛŋnda Sikɛm aa: ‹O kuɛɛ co yɛ fisa le niaa, poaa belaŋɔmmɛvaa Yerubaal-la masalen tosaa niaa coo, baa vanndo ndu pilɛ masalen tosaa niaa coo? Nduyɛ, la sina maa vanayɛi niɛi kpeekpei ya co ni.›»

³Mí bomaa Abimelɛk-a kɔ mingi sondo o sɔɔn mun kpow coo vanaa bɛndua Sikɛm o lani. Mí nda cɛl le ndu Abimelɛk simndan kɔɔli, kani má va dimio aa: «Hɔ́ɔ́ naa o co ni.»

⁴Má ke ndu volin latámán belaŋɔmmɛw, volin nda cua o máán Baal-Berit-o coo-on. A volin mun Abimelɛk luɛi poambɔa poopooa a vanaa kelannda nin ni le simndan ndu kɔɔli.

⁵Mí Abimelɛk kɔa Ofra o fuɲa ndɔ lo, lon o kɔ diw puapilɛa ndɔa belaŋɔmmɛwva ni, poaa Yerubaal-la pɛɛn, o pow bandílá pilɔɔ coo o dii nda ni. Fɔ Yotam, ó va nda cuaambɔɔ coo-o daama hɛlun ni, kani vionnɔnndo ndóò vennun ni.

⁶Mí vanaa bɛndua Sikɛm a vannda Bɛt-Millo kpow a cuungian nɛɛ pilɛ. Má kɔa o yálán va Sikɛm o pow sálà ndáà baŋ-ndo ikɛi-yo. Lon nda siinguu Abimelɛk simlacinɔɔ ni.

⁷Má dimul Yotam sɔɛi ken. Mó hel o pembei Karisim tullo, mó yondal nda aa: «Vanaa bɛndua Sikɛm, la yaŋ ya nilan, te la yeema pɛ mì Hala tuei niaa diom.

⁸Paale pilɛ, mí yɔmnde cal nɛɛ pilɛ, mí i tuu le masaa hɛlio mò va ndi bollen. Mí yɔmnde dimul yɔm olivieeo aa: ‹Tósa masalen naa coo.›

⁹Kɛ mí olivieeo mulul ndi aa: ‹Niaa ca ko aa i mɛinin cuɛima nian solio, cuɛima hɛnan man halaa a vanndacieea-an, mì kɔ cal saangianndo masalen tosaa yɔmii celen coo baa?›

¹⁰O kon, mí yɔmnde kɔa o voosoo lo, mí i dimul ndu aa: ‹Nɔm sei, hun ma tosa masalen naa coo.›

¹¹Kɛ mí voosoo muli aa: ‹Niaa ca ko aa i mɛinin voosun nin kɛndɛn yeelɛiyon komɔɔ, mì kɔ cal saangianndo masalen tosaa yɔmii celen coo baa?›

¹²O kon kɔɔli, mí yɔmnde kɔ dimul rɛsɛnndo aa: ‹Hun mà tosa masalen naa coo.›

¹³Kɛ mí rɛsɛnndo muli aa: ‹Niaa ca ko aa i mɛinin mɔima nima peì halaa a vanndacieea a ɲaaloo-an solio mì kɔ cal saangianndo masalen tosaa yɔmii celen coo baa?›

¹⁴O mɛɛlulan kpɔŋ, mí yɔmnde kɔ dimul bɔ̀ɔ̀ n'yɔɔ aa: ‹Nɔm, hun tosa masalen naa coo.›

¹⁵Mí bɔ̀ɔ̀ n'yɔɔ muli aa: ‹Te la yeema pɛ le ya kɛsio masaa lekɛ́ndɛi niaa coo, mɛɛ la hun luɛi o vunduma nian bɛngu. Te la tosa kon te, yinnden le co fula o yɔɔn nun nin mì le lom yɔmii sɛɛdrii co Liban-nde.›»

¹⁶Mí Yotam hiaw laci a sɔɛi, mó dimi aa: «Niaa la nɔ o kɔl maa dɛnɛ sandaa niaa tosa le Abimelɛk siinguuo masaa ni? La ca ko aa dɛnɛ kɛndɔɔ niaa tosa lende a Yerubaal nda yungu ndɔɔ ni? Vɛ̀ɛ̀ la siná pá kɛndɛi ndɔɛi le dɛnnda kɛndɛla o tosal niaa lan?

¹⁷Kani fuɲa nuu tosa cɔwvo le niaa, mo va le yoomu ndɔɔ pisi le niaa baŋaa Madiannda o ba.

¹⁸Hau nin, la cɛn le yungu ndɔɔ tɛɛmbuuo, mí la diw poaa ndɔa n'van belaŋɔmmɛw o pow bandílá pilɔɔ coo. Mí la kɔa Sikɛm, mí la siinguu Abimelɛk, po o velu nda cɛ ndɔ laandoo-o masaag le co o co vanayɛi niɛi-yo.

¹⁹Te dɛnɛ sandaa a dɛnɛ kɛndɔɔ niaa tosa lende paalen nden hau a Yerubaal nda yungu ndɔɔ ni, màá Abimelɛk nɛŋi niaa kɔl, mi niaa bɛɛ ke ndu kɔlɲuloo!

²⁰Te o co yɛ dɔ́ɔ́ dɛnɛ kɛndɛ le niaa tosa le, màá yinnden le fula Abimelɛk o ba, mì le lom vannda Sikɛm a haa Bɛt-Millo! Màá yinnden le fula vana bɛndua Sikɛm a haa Bɛt-Millo o ba le Abimelɛk lomɔɔ!»

²¹O kon kɔɔli, mí Yotam ɲaanun, mó kɔ vionnun Beɛr ciee, kani siòònde va ndu a Abimelɛk puapilɛ ndɔ.

²²Mí Abimelɛk yɔŋnun simlacinɔ Israɛlla le vɔsilan tan yáá.

²³O kon kɔɔli, mí Hala luei kɔl sɛɛngianndo Abimelɛk nda vanaa bɛndua Sikɛm tɛɛn, mí vanaa bɛndua kan tambu kɔllo a Abimelɛk, má simul ndu.

²⁴Mí vana-vana o nda tɛɛn o sɔla sala dɛnɛ vɔɔn o tosa-o: Abimelɛk ndu, le diyɔɔ o dii puapilɛa ndɔa-o, poaa belaŋɔmmɛvaa Yerubaal-la pɛɛn. Sikɛmnda nda nda, le tùú nda sim Abimelɛk kɔɔli le puapilɛa ndɔa diwvo-o.

²⁵Mí vanaa bɛndua Sikɛm kɛsi vannda o pembun va ciee-lekɔɔ-on coo le Abimelɛk mɛngɛlaa. Vanaa kan ndáà del vanaa va keiyo o nɛi kon-nda coo le nda ɲɛm ndan poondiaa o laba ni. Mí Abimelɛk tuɛi sɔɛi ken.

²⁶Paale pum, mí Kaal po Ebɛd-o hun Sikɛm nda puapilɛa ndɔa, mí vanaa bɛndua Sikɛm laalan ndu.

²⁷Má kɔa o ciɛɔn n'rɛsɛŋun ndan nin, má kiandu rɛsɛnndon, má toosiaa mɔiyan a mun, má tuisi kafoo, má kɔa o cɛi máán hala ndaa nin, má dia dió kafoo, o kon má mɛna Abimelɛk.

²⁸Mí Kaal po Ebɛd-o ɲuna nda aa: «Nɛ̀ɛ̀ Abimelɛk co yɛ mì naa Sikɛmnda n va ndu o ba bɛngu? O co po Yerubaal-lo le o co le? Vɛ̀ɛ̀ o co Sebul te co bolle vanaa ndɔa cɔwva le? Lelan la tosal yungu Hamɔr vana kelu kobio Sikɛm-ndo baalaa! O co vanaa bɛnda le va Abimelɛk o ba bɛngu le naa n co le.

²⁹Le ya, te vanáà sɔɔ pɛ Sikɛmnda ya o ba, i va Abimelɛk faŋa o masalen.» O kon, mí Kaal dimul Abimelɛk aa: «Abimelɛk, cɔɔlu vanaa nɔmaa cɔwva yoomuan luei ma hin le ya delɔɔ coo a cɔwvo.»

³⁰Mɛɛ Sebul masa ibungaa tuei sɔɔn Kaal po Ebɛd-o dimi-on, mó tuulu kɔl.

³¹Mí Sebul viam kiilaa o vionnɔnndo nin o Abimelɛk lo, le ndu dimullo aa: «Kaal po Ebɛd-o nda puapilɛa ndɔa hin Sikɛm, a co vanaa co o kobio nin-nda luɛyɔɔ nin le nɔm simullo.

³²Lelan, la cɔn cɔɛllɛn niaa vanaa nɔmaa cɔwva, mì la kɔ vionnun yondoo nin.

³³Siɔdii idiiyo púŋ, paalen le sɛ dɔ́ɔ́ pɛ, a hun del kobio coo a cɔwvo. O kon, telen Kaal nda vanaa ndɔa fulanin niaa o hɔl-lo, a tosa ɲɛ hɛnan nɔm-ndo a nda.»

³⁴Diimandɔɔ icɔllo, mí Abimelɛk nda vanaa ndɔa piɔvan kundalan tan hiɔɔlu, má kɔ vionnun Sikɛm ciee-lekɔɔ.

³⁵Mɛɛ Kaal fula o kobio nin, mó kɔ sim o dio luɛyaa kobio ikɛi, mí Abimelɛk nda vanaa ndɔa cɔwva fulal ndu fɛlɛmɛndɛn nɛɛ nda va a viannannda-a.

³⁶Mí Kaal ca nda, mó dimul Sebul aa: «Tofa vɔ, vannda tolɔɔ fulaa o pembon tullo.» Kɛ mí Sebul mulul ndu aa: «Ɛ-ɛ, vunduma n'pembuan n co cɔ kon maa n'vanndaciee ni.»

³⁷Mí Kaal dimi vɛlɛ aa: «Mɛɛndan-ndɔ, vannda lekɛ́ndɛi co haa tolɔɔ fulaa o pembii co o lɛŋnden tɛɛn-nde coo ni. Kunda celen co vɛlɛ keiyo a nɛi yáláŋii vanaa viamaa yavaa má va hunɔɔ.»

³⁸Mí Sebul mulul ndu vɛlɛ aa: «Ɔ́ɔ̀ niko sɔɔn nɔm bɛndun n va dimio-on? A va naa dimullo aa: ‹Nɛ̀ɛ̀ Abimelɛk co yɛ mì naa Sikɛmnda n va ndu o ba bɛngu?› Tofa niko ndu hunɔɔ a vanaa n va pɛɛsaa-a kɔɔli, mɛɛ cɔn niko ma kɔ simul ndu.»

³⁹O kon mí Kaal sim Sikɛmnda laci, mó faŋan ciee, mó kɔ del Abimelɛk coo a cɔwvo.

⁴⁰Mí Abimelɛk toaw Kaal, mó ɲaanun ndu kɔɔli. Tuma pá má tiiyaa o dio luɛyaa kobio sondoo, mí vannda taw a deli a yɔŋulannda nɛi-tɛɛn.

⁴¹Mí Abimelɛk kɔ cal Aruma ciee, mí Sebul ndu va Kaal nda puapilɛa ndɔa tovɔɔ tuŋ. Mó kuuna nda le muungoo calle Sikɛm.

⁴²Diimandɔɔ, Sikɛmnda va bɛɛndianndo le kɔlan o ciɛɔn nin, mí vanndo kɔ dimul Abimelɛk.

⁴³Mó cua vanaa ndɔa cɔwva, mó piɔw nda kundalan tan yáá, má kɔ vionnun yondoo nin. Tuma Sikɛmnda va cɔnɔnndo ciee-o, má fulal nda fɛlɛmɛndɛn a cɔwvo.

⁴⁴Mí Abimelɛk nda kunda o va coo-o kɔa cɔ́-cɔ́, má kɔ bii dio luɛyaa kobio, o telen pilɛ kon, mí kundala tiɔnndan la kɔ del vanaa va yondoo nin-nda coo, má diw nda.

⁴⁵Mí Abimelɛk niinu cɔwvo kpɛŋ, mó bii kobio, mó diw vannda, mó yunga kobio kpow. O kon kɔɔli, mó saŋ hɛlle[12] o fonda kobio va-o.

⁴⁶Lɔ́ɔ́ vanaa va o cɛi coocoo nin Sikɛm-nda sina dɛnɛ kon-ndo, mí nda kpow kɔa o cɛi kpaki va o cɛi soolaa Ɛl-Berit-o nin-ndo nin.

⁴⁷Má kɔ dimul Abimelɛk maa lon nda vennun ni.

⁴⁸O kon mí Abimelɛk nda vanaa ndɔa cɔwva kɔ hel o pembei Salmɔn coo. Mó cua cuei, mó kialu lɛvii yɔmnde, mó handun ndi o congú. Mó dimul vanaa ndɔa cɔwva mí nda bɛɛ tosa lende cɔ́-cɔ́.

⁴⁹Mí vana-vana kialu lɛwve, má del Abimelɛk kɔɔli. Má kɔ dii lɛvun mun kundaa o cɛi kpaki kon balɔɔ sɔ́, má loam ndu a vanaa va lenin-nda kpow. Nuaa vanaa va o cɛi coocoo Sikɛm nin-nda kpow a sɔla piɔ́mndo ni. A va le n'van vàá pilɛ, vanpiaandua a vanlaandua.

⁵⁰Cɔnɔnndo lon, mí Abimelɛk kɔa Tebɛt. Mó kɔ tiila kobi kon, mó bii ndu.

⁵¹Nduyɛ, cɛi coocoo vanaa cumulaa va o kobio kɔllo. Mí vanaa va o kobi kon nin-nda, vanpiaandua, vanlaandua a vanaa bɛndua kpow a kɔ vionnun ndon. Má kiindian diolan kɔɔli, má hel coocoo.

⁵²Mí Abimelɛk hun simul cɛi coocoo kon, mó sɔɔnguu o dio luɛyaa le yinnden malɔɔ o cɛi coocoo kalaa.

⁵³Kɛ mí vanalanɔɔ pum mal pow bɛndoo ndu o lebol, mó pial ndu kpokpoo vɔ́-vɔ́.

⁵⁴Fɔ́ɔ́fɔ̀, mí Abimelɛk veelu langbanɔ va volɔɔla ndɔla cɔwlan cuaa-o, mó dimul ndu aa: «Cua mɔɛi nɔmii cɔwve ma siow ya tɛ̀i, haliko vannda dimi aa vanalanɔɔ le dii ya le.» Mí langbanɔ kon cua mɔɛi cɔwve, mó cuku ndu, mí Abimelɛk malnun kɔl.

⁵⁵Mɛɛ Israɛlla ce maa o vi, mí vana-vana muungu o ndu lo.

⁵⁶Nuaa Hala sala Abimelɛk le dɛnɛ vɔɔn ndóò tosal fuɲa ndɔ, lɔ́ɔ́ o diw puapilɛa ndɔa belaŋɔmmɛwva-o ni.

⁵⁷Mí Hala tuisi vɛlɛ Sikɛmnda sangalan coo le kɔlvesɛi nda bɛndoo. Mí dangala Yotam po Yerubaal-lo dɔw nda lan kpow la peelun kpafii.