Read Kissi Dɛnnda cɔɔmuanndan 13 Bible Online

Dɛnnda cɔɔmuanndan 13 - Kissi bible

Dɛnnda cɔɔmuanndan 13

¹Mí ca visi tɔɔma bɛndoo pum fulaa o mɛmma ihɛllan nin, ndóò nɔ leelan tɔ́ a bolle ndii ŋɔmmɛw. Mɔsilta lemasalan tɔ́ la va o leela lan coo, mí diolan lapum la va lasɛwviaalan o bolii ken coo le Hala yiowlan.

²Vanáà ce pɛ visi ya ce kon-ndo aa tambillo ni, pelon va ndu maa pelun kɔ́lɔ́vúlu a sondoo ndu maa sondo yàlà. Mí tambálakáà ke ndu kpaaya ndɔɔ, kpɛŋɛ lemasa ndɔɔ a masale ndɔle bɛndulen.

³Mí ca ndu bollen lepilɛlen a bolin bɛndoo, vanáà ca ko aa le ndu diyɔɔ ndáà boli ndu ni. Kɛ mí bolin ndɔ kon siangu. Mí vanndacieea co o lɛŋnden coo-a kpow a dɔawnun kɔndɔfili, má del visi tɔɔma kalaa kɔɔli.

⁴Má baŋ vulan tambálakáà o labɛngunin le tùú ndóò ke visi tɔɔma kon kpaayaa-o, má baŋ vulan visi kon o labɛngunin, má va dimio aa: «Nɛ̀ɛ́ co yɛ maa visi tɔɔma ho, nɛ̀ɛ́ nɔla yɛ ndu cɔlɔba?»

⁵Mí sondoo kennun visi kalaa le yongaa sɔɛi a le sɔɔn tanan dimio a Hala. Mí kpaayaa kennun ndu le masalen tosaa le paangon belehiɔɔlu a n'miun.

⁶Mó kumbi sondoo le sɔɔn tanan dimio a Hala, mó dimi sɔɔn tanan a diola ndɔlan, a fonda ndɔ diandaa a á vanaa co o fonda ndɔ diandaa kon nin o halataala-a.

⁷Mó sɔla kpaayaa le vanaa diandaa cɔlɔbaa, mó nɔla nda. Mó nɔla polama vannda kpow, vannda súúlan kpow, vanaa soaa sɔɔn yɛ́-yɛ́ɔn-nda kpow a vanaa fula o lelɛŋ oo lelɛŋ nin-nda.

⁸Vanndacieea co o lɛŋnden coo-a kpow a baŋnin ndu vulan o labɛngunin, vanaa diola ndalan láà sɛvan kabi o ceendo kilaa o sɛbɛ cindaa saa téndé nda dii-o nin te-a pɛɛn!

⁹Vana nɔ pɛ nilan, mɛɛ ndu tuei!

¹⁰Te vanndo nɔ pɛ le kɔlan o biyɔɔ nin, o biyɔɔ nin o kɔanin ni. Te vanndo nɔ pɛ le piɔ́mndo sɔlaa o mɔɛi cɔwve bɛngu, o mɔɛi cɔwve bɛngu o sɔlanin piɔ́mndo ni. Lelan vanaa diandaa bɛnda mà cɔm biuvɔn ndaa a laalan ndaa.

¹¹O kon mí ca visi tɔɔma celen fulaa lɛŋ. Ndóò nɔ leelan tan tiɔn maa leela saa téndé, o va sɔɛi maa tambálaká.

¹²Ndóò nɔ masale kɛ́-kɛ̀ visi tɔɔma ndóò nɔ-o coo, mó va len tosaa visi tɔɔma tase kon o hɔl. Mó va tosaa, mí lɛŋnden a vanndacieea co lecoo-a a va vulan baŋɔɔ visi tasoo o labɛngunin, o bolin bɛndoo va o lebol kɛ mó siangu-o!

¹³Mɛɛ o tosa dɛnnda kaamaala bɛndulan tei, mó tuisi yinnden o lɛŋnden coo fulaa o halataala vannda kpede o hɔl.

¹⁴Mó luei vanaa va o lɛŋnden coo-a o pɔwlan nin a dɛnnda kɔndɔfilta o sɔla kpaayaa le tosaa visi tasoo o hɔl-tan o kɔɔ, mó va vanaa co lo o lɛŋnden coo-a dimullo le tuula visi tɔɔma ndáà yɔŋul kon a mɔɛi cɔwve mó siangu-o toosiaa.

¹⁵Mí kpaayaa kennun ndu haliko mi tuula visi kon ndóò biŋin a ba ndɔ, mì ndóò soo, o kon mì vanaa-vanaa aa beŋ vulan tuula visi kon o labɛngunin te-a ndáà sɔla piɔ́mndo.

¹⁶Mí visi tɔɔma kon baŋ vanndacieea kpow le sɛvaa pum nda handɔɔ o ba kɛndɔɔ te kon te o itendu: cuaambɔa a kaasonnda, vanaa bolofaa a vanaa bala fondoa, vanaa co o ba ndaa coo-a a cɛa,

¹⁷o kon vana-vana pindu ɲɛ le, vana-vana pisi ɲɛ le, te o co mò nɔ tɔɔmasele kon te, diola visi kon, te kon te sɛva velan a diola ndɔlan-ndo le.

¹⁸Nanu ndu fɔ kɔlkaloo. Vana kendu pɛ kɔllo, ndu tiwba mo cɔm sɛva velan a diola visi tɔɔmaa ho-o. Kani a diola vanacieo pum kpafii sɛva kon velan ni. Sɛva kon co kɛmɛ leŋɔmpum belaŋɔmpum a ŋɔmpum ni (666).