Read Kissi Dɛnnda cɔɔmuanndan 14 Bible Online

Dɛnnda cɔɔmuanndan 14 - Kissi bible

Dɛnnda cɔɔmuanndan 14

¹Yáà tofaa, mí ca saa téndóó isisi o pembei Siɔn coo, vanaa ndáà nɔ diola saa téndóó a diola Fuɲa ndɔlan o n'tendu-a va ndu isisi ikɛi, a va vannda vaalan kɛmɛ belehiɔɔlu a lahiɔɔlu (144 000).

²Mí tuɛi diomndo pum o halataala maa diom mɛmma bɛndu, maa piɔndi bɛndu letaŋ. Diom ya va yɛ tueyɔɔ-o, vanáà ca ko bɛɛ aa bangalan vanaa lɔaa labangaa va lɔɔ ni.

³A va condii sɛnɛiye solio o kpɛŋɛ lemasaa, ɲaa yoomaa hiɔɔlua a bɛndua yuuvɛiya o hɔl. Vana-vana celen ndóò nɔla condii kalɛi pɛiyo le, fɔ vanaa vaala kɛmɛ belehiɔɔlu a lahiɔɔlua (144 000) sɔla baŋaa o lɛŋnden coo-a.

⁴Nda yɔŋnun vanaa nɔɔlian a vanlaandua le-a ni, kani a síná dɛnɛ vanalanɔ le. A co kɔlan Saa téndóó kɔɔli nɛɛ-nɛɛ ka-a. Kan sɔla baŋaa vanndacieea tɛɛn ni, nda yɔŋnun vanaa tasea le hɛlio sɔlaa le Hala a le Saa téndóó ni.

⁵Nduyɛ vànà seelun lacòòva nda o sondo le, a nɔ isɔw le.

⁶Mí ca mɛlɛkanɔ celen, o va cɔnɔnndo coocoo o halataalaa tɛɛn, ndóò nɔ Yoongu kɛndɛ fɛɛn-fɛɛndo le vannda dimullo: vanaa co o lɛŋnden coo-a, vanaa fula o lɛŋii yɛ́-yɛ́i nin-nda, vanaa fula o lepola oo lepola coo-a, vanaa-mangalaa-isɔɔa súúlan kpow a vannda kpede.

⁷Mó va dimio coocoo kpélén aa: «La tuisin Hala o labɛngunin mì la ke ndu biiloo, kani telen o kialunin yamɛi ndɔɛi-yo tiiya. La baŋ vulan vana toosiaa halataalaa, lɛŋnden, mɛmma ihɛllan a peela leboltan-ndo o labɛngunin.»

⁸Mí mɛlɛkanɔ celen, o diinndɔ hin o ó tasoo kɔɔli-o hiaw laci a dimio aa: «O del! O del! Babilɔn bɛndoo del! Ndu koesi vanaa-mangalaa-isɔɔa kpow mɔima kɔltuwma dɛnɛ nɔɔlɛi ndɔɔ ni.»

⁹Mí mɛlɛkanɔ celen, o yàándɔ hin o kan kɔɔli-o hiaw laci a dimio coocoo aa: «Vana-vana baŋ pɛ vulan visio ho a tuula ndɔɔ o labɛngunin, mò sɔla pondale ndɔlen o itendu te kon te o ba,

¹⁰ndu bɛɛ kolnin mɔima kɔltuwma Hala-an, ma nda bingulan te-an, má vow man o taala kólaa kɔltuw ndɔɔ nin. O dɔawnunnin yɛɛvɛ o fungu leyinndo nin mɛlɛkaa diandaa a saa téndóó o hɔl.

¹¹Kumii dɛnɛ palaa ndaa i co helɔɔ lɔ́ɔ́-lɔ́ɔ̀. Pɛngi co le nda ipala le, pɛngi co vɛlɛ le nda icɔl te, nda vanaa co kan visi kon a tuula ndɔɔ, a vana-vana sɔla pondale diola ndɔlan-nda.»

¹²Nuaa biuvɔn vanaa diandaa co le Hala-a cɔ̀mnun ni, a co tɔŋnda ndɔlan biyɔɔ mà laalan Yeesu-a pɛɛn!

¹³O kon mí tuɛi diomndo pum fulaa o halataala aa: «Sɛva aa: ‹Dɛnɛ kɛndɔɔ co kandɔn sisa le vanaa vi o Maalii nin-nda!› Kɔl-Diandaa dimi aa: ‹Dɛnɛ kɛndɔɔ co le nda. A sɔlanin pɛngio le baala nda co-o, kani dɛnnda kɛndɛla nda co tosaa lan ka kɔanin nda kɔɔli ni.›»

¹⁴Yáà tofaa, mí ca yumbuyumbu humboo, vanndo va icali o yumbuyumbu kon coo, velanndo ndu a Po vanacieo. Ndóò nɔ mɔsil lemasaa n'sianio o lebol, vɔlɔtɔ luɛyaa va ndu o ba.

¹⁵Mí mɛlɛkanɔ celen fula o Cɛi-Hala-o nin, mó yondal vana va icali o yumbuyumboo coo-o kpélén aa: «Baa vɔlɔtɔ nɔmndo mà kow, telen koavaa tiiya, kani lɛŋnden le vesa le kovɔɔ.»

¹⁶O kon mí vana va icali o yumbuyumboo coo-o baa vɔlɔtɔ ndɔɔ o lɛŋnden, mó koaw lɛŋnden.

¹⁷O kon mí mɛlɛkanɔ celen fula o Cɛi-Hala co o halataala-o nin, ndu bɛɛ ndóò nɔ vɔlɔtɔ luɛyaa o ba.

¹⁸Mí mɛlɛkanɔ celen fula, ndóò nɔ kpaayaa yinnden coo ni. Mó yondal vana ndóò nɔ vɔlɔtɔɔ o ba-o aa: «Baa vɔlɔtɔ luɛyaa nɔmndo mà keenduu kpɔ̀nyɔ̀la n'rɛsɛnnda co o lɛŋnden coo lan, kani rɛsɛŋun ndɔn n diw.»

¹⁹Mí mɛlɛkanɔɔ baa vɔlɔtɔ ndɔɔ o lɛŋnden, mó keenduu rɛsɛnndon, mó vow mun o doola bɛndu kɔltuw Hala-o nin.

²⁰Má kɔ nɛwnɛw mun o kobio kɔɔli, mí koovan ma pia o doolaa nin háá mi ma tiiya soa o sondolan bɛngu, mí ma kɔa kongio háá le ɲɛ tuvaa vàá pilɛ a kɛmɛ leŋɔmpum.