Read Kissi Dɛnnda cɔɔmuanndan 15 Bible Online

Dɛnnda cɔɔmuanndan 15 - Kissi bible

Dɛnnda cɔɔmuanndan 15

¹O kon mí ca tɔɔmasele celen o halataala, o va o bɔɔ, ɲɛ kɔndɔfili bɛndoo pila o va ni, mɛlɛkaa nda ŋɔmmɛw aa nɔ dɛnnda palaalan tan ŋɔmmɛw o laba, lan la co la mɛɛlaalan ni, kani a lan kɔltuw Hala-o mɛɛlunin ni.

²Mí ca ɲɔɔ maa tofan, o kɔannan kɛ́-kɛ̀ maa mɛmma ihɛl. O va o muulianndo a yinnden. Vanaa nɔla visio, tuula ndɔɔ a nimolo ndɔɔ-a va isisi o tofan kon coo. Bangala Hala ndóò yɔngu nda lan la va nda o laba.

³A va condii Moise vana baala Hala-o a condii saa téndóó solio aa: «Mɛlɛka Hala nɔ kpaayaa kpow-vo, dɛnnda nɔmndan la co dɛnnda kɔndɔfilta bɛndu, nɔm Masa vanaa-mangalaa-isɔɔa, tuula nɔmndan la sandu, la co toɲa!

⁴Mɛlɛka, nɛ̀ɛ́ tɔɔndan yɛnin mo kɛɛ diola nɔmndan biilu? Kani nɔm pilɛ kpé co o diandaa ni. Vanaa-mangalaa-isɔɔa kpow a hunnin mà baŋ vulan nɔm o labɛngunin, kani sandii nɔmnde cɔmnun vakpa.»

⁵O kon kɔɔli, mí ca Cɛi-Hala-o o kumbia o halataala, o co cɛi-kola-toandaa leseiyo-o pɛɛn.

⁶Mí mɛlɛkaa ŋɔmmɛvaa dɛnnda palaala ŋɔmmɛwlan la va o laba-a fula o cɛi kon nin, kolala keesela diandaala few-fewlan la va nda lekɔɔ, a yavii n'sianiei nda o latakpa.

⁷Mí o pilɛ o ɲaa yoomaa hiɔɔlua tɛɛn yɔngu mɛlɛkaa ŋɔmmɛvaa kan taalala kólaala n'sianilan laŋɔmmɛw, la va lapiaalan cá-cá a kɔltuw Hala co yoomu le fɛɛn a fɛɛn-ndo.

⁸Mí kumnde i pia o Cɛi-Hala-o nin ca, le tùú biilu Hala-o a kpaaya ndɔɔ va lon-ndo. Vana-vana ndóò nɔla luɛyɔɔ o Cɛi-Hala-o nin te, háá fɔ mi dɛnnda palaala ŋɔmmɛwla mɛlɛkaa ŋɔmmɛvaa kan ndáà hin lan-ndan láà cuu peelɔn.