Read Kissi Dɛnnda cɔɔmuanndan 16 Bible Online

Dɛnnda cɔɔmuanndan 16 - Kissi bible

Dɛnnda cɔɔmuanndan 16

¹Mí tuɛi diom bɛndoo pum fulaa o Cɛi-Hala-o nin, mó dimul mɛlɛkaa ŋɔmmɛvaa kan aa: «La kɔ cuiŋi ɲɛ co o taalala kólaala ŋɔmmɛwla kɔltuw Hala-o nin-ndan o lɛŋnden coo.»

²Mí o tasoo kɔa, mó kɔ cuiŋi ɲɛ va o taala kólaa ndɔɔ nin-ndo o lɛŋnden coo. Mí pavii nɛyɛi vɔɔn-vɔɔnde fula vanaa ndáà nɔ pondale visio, mì ndáà va vulan baŋɔɔ tuula ndɔɔ o labɛngunin-nda.

³Mí mɛlɛkanɔ diinndɔɔ cuiŋi ɲɛ va o taala kólaa ndɔɔ nin-ndo o mɛmma ihɛllan nin, mí ma siŋnun koovan maa kooma vana vílɛ́i, mí ɲaa yoomaa va o mɛmma ihɛllan nin-nda kpow a vu.

⁴Mí o yàándɔɔ cuiŋi ɲɛ va o taala kólaa ndɔɔ nin-ndo o peela bɛndulan a o peela leboltan, mí la siŋnun koovan.

⁵Mí tuɛi mɛlɛkanɔ va mɛnndan bollen-ndo dimio aa: «A sandu, nɔm o diandaa, nɔm co má va paandu-o. A cii yamɛi nɔmnde kiolɔɔ.

⁶Kani vannda cuiŋi kooma vanaa diandaa a kooma vanaa-tɛɛngaa-diom Hala-a, mí nɔm ke nda koovan le kolɔɔ, ken bɛnda a nda ni.»

⁷O kon mí tuɛi diomndo fulaa o fonda-loamaa-lasálàá aa: «Oi, Mɛlɛka Hala Vana-Kpaayaa-Kpow, toɲaa yaman nɔmndon co ni, n sandu.»

⁸Mí mɛlɛkanɔ hiɔɔlundɔɔ cuiŋi ɲɛ va o taala kólaa ndɔɔ nin-ndo o paalen coo, mí le sɔla dío le vanndacieea lomɔɔ a yinnden.

⁹Mí vanndacieea ŋɔa a hangul vɔɔn-vɔɔndo. Má dimi sɔɔn tanan a diola Hala nɔ baa o dɛnnda palaala lan coo-o, a cɛl le mangalanndo mà biilu ndu le.

¹⁰Mí mɛlɛkanɔ ŋuɛɛnundɔɔ cuiŋi ɲɛ va o taala kólaa ndɔɔ nin-ndo o kpɛŋɛ lemasa visio coo. Mí masale ndɔlen le muungu yim-yim, mí vanndacieea va diɛɛmuei kisikisinndo a ɲɛ nɛyaa.

¹¹Má dimi sɔɔn tanan a Hala co o halataala-o, le ɲɛ nɛyaa va nda-o a le pavii ndɛi, kɛ a mel kela nda vɔɔndo mà mangalan te.

¹²Mí mɛlɛkanɔ ŋɔmpumndɔɔ cuiŋi ɲɛ va o taala kólaa ndɔɔ nin-ndo o pee bɛndoo Efrate. Mí mɛnndan ma vela le masaa co fulaa a ba paalen le can-ndo-a nɛiyo toosiallo.

¹³Mí ca ɲinaa vɔɔnda pum nda yáá fulaa tambálakáà o sondo, visio o sondo a vana-tɛɛngaa-diom hala lacòòvaa o sondo, vanaa ce pɛ ɲinaa vɔɔŋaa kan aa ŋɔɔŋɔɔnda ni.

¹⁴Ɲinaa vɔɔŋaa tosa dɛnnda kɔndɔfiltan-nda co kan ni, a co kɔlan o masaa co o lɛŋnden kpow coo-a lo, haliko ma mɔɔsiaa nda le cɔlɔbaa o paale bɛndule Vana-kpaayaa-Kpow len coo.

¹⁵… Tofa vɔ, i co hunɔɔ maa vui. Dɛnɛ kɛndɔɔ co le vana co kɔl, mò manda volɔɔla ndɔla cuɛinanndan, haliko o kela fondo mi siɛmbulan la bii ndu a vannda loo.

¹⁶Mí ɲinaa vɔɔŋaa kan a mɔɔsiaa vannda o fonda nda veelu o hebrei nin-ndo aa Harmakedɔn.

¹⁷Mí mɛlɛkanɔ ŋɔmmɛwndɔɔ cuiŋi ɲɛ va o taala kólaa ndɔɔ nin-ndo o hoeiye nin, mí diom bɛndoo pum soaa o fonda diandaa fulaa o kpeŋɛ lemasaa aa: «I cuu tosan!»

¹⁸Mí piɔɔ voli, mí taŋndan ma piɔndi, mí lɛŋnden le ɲiiya taw-taw, kabi vanndacieea co o lɛŋnden coo, lɛŋnden le ɲiiya vɔ lende le.

¹⁹Mí kobi bɛndoo piɔwnun bungan mún yáá. Mí kobila vanaa-mangalaa-isɔɔa kpow la koombiaa, o kon mí Hala yiyan a Babilɔn bɛndoo, le ndu taala kólaa mɔima kɔl ndɔ tuw bɛndoo koesio.

²⁰Mí lɛŋii co o mɛnndan tɛɛn-nde kpow i ɲaanun, vana seelun ndɛ pembon te.

²¹Mí loeon bɛndu-bɛndon can o halataala, mí n deli vanndacieea coo. Mí vannda va sɔɔn tanan dimio a Hala le kpundɛ loeon deliaa kon, kani sangaa pila nda sɔla o dɛnɛ kon nin ni.