Read Kissi Dɛnnda cɔɔmuanndan 20 Bible Online

Dɛnnda cɔɔmuanndan 20 - Kissi bible

Dɛnnda cɔɔmuanndan 20

¹O kon mí ca mɛlɛkanɔɔ tolɔɔ fulaa o halataala, kii soon yingilaa nɔ lamɛɛlu loo a yɔlɔn bɛndon pum va ndu o ba.

²Mó bii tambálakáà, kɛwvo sindɛ, o co masa ɲinaa vɔɔnda-o, Setana pɛɛn, mó yii ndu le vɔsilan vàá pilɛ.

³Mó viaw ndu o soon yingilaa nɔ kon lamɛɛlu loo nin, mó kinda sondoo, mó baŋul ndu kɔɔli, haliko o luei lɛ vanaa-mangalaa-isɔɔa o pɔwlan nin te, háá mi vɔsila vaa pilɛlan la sul. O kon kɔɔli, mò sɔla timbio le telen bingi.

⁴Mí ca kpɛŋɛla lemasalan, mí vannda cal lecoo. Mí dio kennun nda le yamɛi kiolɔɔ. Mí ca kɔlta vanaa nda kili bolle le seile Yeesu len a le sɔɛi Hala-e-a, a vanaa ndáà beŋ vulan visio a tuula ndɔɔ o labɛngunin te-a, a ndáà sui pondalen o itendu a o baa le-a pɛɛn. Má muungu yoomu, má tosa masalen nda Krista-a latulu le vɔsilan vàá pilɛ.

⁵Háá mi vɔsila vàá pilɛ lan la sul, vanvílɛ́yaa tɔ̀a muungu yoomu le. Kon yɔŋnun tendul tase vanvílɛ́iya ni.

⁶Dɛnɛ kɛndɔɔ co le vanaa tendul tendul tase kon, má muungu yoomu-a. Vanaa diandaa nda co ni. Piɔ́m diinndɔɔ nɔ lɛ nda kpaaya coo le. Nda vanin vanaa-solia-lasálàá le Hala a le Krista ni. A tosanin masalen nda ndaa latulu o vɔsila vaa pilɛlan bɛngu.

⁷Telen vɔsila vaa pilɛlan la sulnin-ndo, Setana sɔlanin malɔɔ mò fula o kaasoo,

⁸mò fula le vanaa-mangalaa-isɔɔa co o lɛŋnden kpengun hiɔɔlon-nda lueiyo o pɔwlan nin, Kɔk a Makɔk pɛɛn, haliko mo mɔɔsiaa nda le cɔwvo tosaa. A vanin sɛ́lɛ́ maa sióóndon o mɛmma ihɛllan nin.

⁹Má fula o lɛŋnden coo ba-ba fee, má tiila dɔ́ɔ́ngɔ́ vanaa diandaa a kobi Hala kaola taw-vo. Kɛ mí yinnden lepum le toal fulaa o halataala, mí le cii nda.

¹⁰Má viaw masa ɲinaa vɔɔnda, ó va kon vannda lueiyo o pɔwlan nin-ndo o dala leyinndo nin, nɛɛ fungoo va ŋɔu-va, nɛɛ visio a vana-tɛɛngaa-diom hala lacòòvaa va-a. Lon nda vanin yɛɛvɔɔ dɔwnɔnndo paalen a ɲumndan le fɛɛn a fɛɛn ni.

¹¹O kon mí ca kpɛŋɛ lemasa bɛndu humboo pum a vana va icali lenin-ndo. Mí lɛŋnden a halataalaa ɲaanun ndu, má kɔannun polon, vanaa ci lɛ foofo ndaa le.

¹²Mí ca vanvílɛ́iya, kaasonnda a cuaambɔa, a va isisi o kpɛŋɛ lemasaa hɔl-ndɔ. Mí sɛbɛlan la kumbin, mí sɛbɛ celen kumbin, sɛbɛ cindaa va kon ni. Mí yamɛi vanvílɛ́iya kiolu, maa mɛɛ sɔɔn va n sɛvaa o sɛbɛla lan nin-ndon va yɛ, maa mɛɛ dɛnnda vana-vana la va yɛ.

¹³Mí mɛmma ihɛllan ma soli vanvílɛ́yaa va lenin-nda, mí piɔ́m a ciee-piɔ́m-ndo soli vanvílɛ́yaa va lon-nda, mí yamɛi ndɛi kiolu mɛɛ dɛnnda ndalan la va yɛ.

¹⁴Mí piɔ́m a ciee-piɔ́m sɔla viovɔɔ o dala leyinndo nin. Dala leyin kon co piɔ́m diinndɔɔ ni.

¹⁵Vana-vana diola ndɔlan la ve lasɛvaa o sɛbɛ cindaa nin te, má viaw nda o dala leyin kon nin.