Read Kissi Dɛnnda cɔɔmuanndan 5 Bible Online

Dɛnnda cɔɔmuanndan 5 - Kissi bible

Dɛnnda cɔɔmuanndan 5

¹O kon kɔɔli, mí ca vana va icali o kpɛŋɛ lemasaa coo-o sɛbɔɔ pum o ba kɛndɔɔ, sɛbɛ kalaa va o sɛvaa lenin a o kɔɔ, o va o kindaa a tɔɔmaselelan tan ŋɔmmɛw.

²O kon mí ca mɛlɛkanɔ kpaayaa pum yondaa coocoo kpélén aa: «Nɛ̀ɛ́ co yɛ vana kon, o bɛnda mò tɛɛmbuu tɔɔmaselelan ndan, mò kumbi sɛbɔɔ ho-o?»

³Kɛ vana-vana bɛɛ sɔlan o halataala, o lɛŋnden coo a o lɛŋnden bɛngu, mò nɔla sɛbɛ kalaa kumbi a ndu tofaa le.

⁴Mí caŋ taw, kani vana-vana sɔlan te, ndóò bɛnda le sɛbɛ kon kumbio-o mí ndóò tofa ndu lenin-ndo.

⁵O kon mí bɛndua yuuvɛiyaa kan o pilɛ dimul-la aa: «Caŋ te, tofa yàlá fula o polale Yuda len nin-ndo, o co pulun David-on-ndo. O nɔla mò kumbi sɛbɔɔ ho a tɔɔmaselela ndɔla ŋɔmmɛwlan.

⁶O kon mí ca saa téndóó isisi o ɲɛ-calaa lemasaa, ɲaa yoomaa hiɔɔlua a bɛndua yuuvɛiya tɛɛn, vanáà ce ndu pɛ aa bololan ndáà kelu ndu ni. Ndóò nɔ leelan tan ŋɔmmɛw a hɔltan tan ŋɔmmɛw, lan la va kɔlta ŋɔmmɛwla Hala lan ni, la o vem o lɛŋnden kpow coo lan.

⁷Mí Saa téndé kon sɔɔnguu, mó bii vana va icali o kpɛŋɛ lemasaa nin-ndo sɛbɛ kon o ba kɛndɔɔ.

⁸Ndóò sɔlaa sɛbɛ kalaa, mí ɲaa yoomaa hiɔɔlua a bɛndua yuuvɛiyaa bidiin a à hiɔɔlua baŋ vulan Saa téndóó o labɛngunin. O nda tɛɛn, vana-vana ndóò nɔ bangaa a taalala kólaala n'sianilan la piaa cá a ansan, lan la co yɛ piɛile vanaa diandaa ni.

⁹Ma va condii sɛnɛiye solio aa: Nɔm bɛnda ni mà bii sɛbɔɔ ho, mà tɛɛmbuu tɔɔmaselela co lecoo lan, mà kumbi ndu. Kani a sɔla piɔ́mndo, má baŋa vanaa fula o polama yɛ́-yɛ́an nin-nda, vanaa-mangalaa-isɔɔa súúlan kpow, a vanaa fula o lɛŋii yɛ́-yɛ́i nin-nda a kooma nɔmndan le Hala,

¹⁰A siinguu nda masalen a kunda vanaa-solia-lasálàá le Hala naa, nduyɛ a tosanin masalen o lɛŋnden coo.»

¹¹Mí tofa vɛlɛ, mí ca mɛlɛkaa vaalan a vaalan o kpɛŋɛ lemasaa balɔɔ pindo. Ɲaa yoomaa a bɛndua yuuvɛiya bɛɛ va lon.

¹²A va dimio coocoo aa: «Saa téndé nda kelu bololan-ndo bɛnda mò sɔla kpaayaa, bolofaa, kɔlkaloo, yoomuan, bɛɛlen, biiloo a sangalaa.»

¹³Mí tuɛi ɲɛm cɔwnun-ndon diomndan solio, mun o halataala, mun o lɛŋnden coo, mun o lɛŋnden bɛngu, mun o mɛmma ihɛllan nin a ɲɛ-ɲɛ co o fondala lan, mí n va dimio aa: «Le vana co icali o kpɛŋɛ lemasaa nin-ndo a le Saa téndóó, sangalaa, bɛɛlen, biiloo a masalen le co le fɛɛn a fɛɛn ni.»

¹⁴Mí ɲaa yooma hiɔɔlua va cɛlɔɔ aa: «Amiina!» Mí bɛndua yuuvɛiya va vulan baŋɔɔ, má va ndu biiloo.