Read Kissi Dɛnnda cɔɔmuanndan 7 Bible Online

Dɛnnda cɔɔmuanndan 7 - Kissi bible

Dɛnnda cɔɔmuanndan 7

¹O ken kɔɔli, mí ca mɛlɛkaa nda hiɔɔlu isisi o kpengun hiɔɔlun ceendo. Hoyun hiɔɔlun ceendo va n biyaa nda o ba, haliko hoeyii ndíì hɔŋ o lɛŋnden coo, o mɛmma ihɛllan coo a o yɔm oo yɔm coo le.

²Mí ca vɛlɛ mɛlɛkanɔ celen helɔɔ a ba paalen le can-ndo, pondale Hala nɔ yoomoo o ba len le va ndu o ba. Mó yonda coocoo, mó dimul mɛlɛkaa hiɔɔlua ndáà dimul le lɛŋnden a mɛmma ihɛllan dɛnɛ palaa tuisio coo-a aa:

³«La hol lɛŋnden baa le, la pilan mɛmma ihɛllan te, la yáà baa o yɔmnde le, háá mi n cii vanaa baalaa Hala naa pondalen sui o n'tendu.»

⁴Má dimul-la mɛɛ vanaa nda pila pondale len-nda va sɛ́lɛ́ yɛ, vaalan kɛmɛ belehiɔɔlu a lahiɔɔlu (144 000) fulaa o polama cuawva Israɛl coo kpow.

⁵Vanaa nda hol pondalen-nda yɔŋnun haa ni: o polale Yuda len coo vannda vaalan tɔ́ a latiɔn (12 000), o polale Rubɛn nden coo vannda vaalan tɔ́ a latiɔn (12 000), o polale Kad len coo vannda vaalan tɔ́ a latiɔn (12 000),

⁶o polale Asɛr len coo vannda vaalan tɔ́ a latiɔn (12 000), o polale Nɛftali len coo vannda vaalan tɔ́ a latiɔn (12 000), o polale Manase len coo vannda vaalan tɔ́ a latiɔn (12 000),

⁷o polale Simeɔn nden coo vannda vaalan tɔ́ a latiɔn (12 000), o polale Levii len coo vannda vaalan tɔ́ a latiɔn (12 000), o polale Isakar len coo vannda vaalan tɔ́ a latiɔn (12 000),

⁸o polale Sabulɔn-nden coo vannda vaalan tɔ́ a latiɔn (12 000), o polale Yosɛf len coo vannda vaalan tɔ́ a latiɔn (12 000), o polale Bɛnyamɛn nden coo vannda vaalan tɔ́ a latiɔn (12 000). Haa nda hol pondalen ni.

⁹O kon kɔɔli, mí tofa, mí ca sɛ́lɛ́ bɛndu vanaa nɔla cɔm too, fulaa o lɛŋnde kpow nin, o polan kpow nin, o vannda súúlan kpow nin a o vanaa-mangalaa-isɔɔa súúlan kpow nin. A va isisi o kpɛŋɛ lemasaa hɔl-ndɔ a Saa téndóó laci, domala bɛndula humbulan la va nda lekɔɔ, mí siɔ̀ɔ́lan la va nda o laba.

¹⁰A va yondaa coocoo kpélén aa: «Le Hala naa co icali o kpɛŋɛ lemasaa nin-ndo a le Saa téndóó cindaa co ni.»

¹¹Mí mɛlɛkaa kpow a sim o kpɛŋɛ lemasaa balɔɔ pindo, mí bɛndua yuuvɛiya a ɲaa yoomaa hiɔɔlua del a hɔlla a kuumbua lɛŋ o kpɛŋɛ lemasaa hɔl-ndɔ, ma va Hala biiloo,

¹²má va dimio aa: «Amiina! Sangalaa, biiloo, kɔlkaloo, balikaa, bɛɛlen, kpaayaa a yoomuan ma co le Hala naa le fɛɛn a le fɛɛn! Amiina.»

¹³O kon mí bɛndu yuuvɛiyo pilɛ cua sɔɛi, mó ɲuna ya aa: «A nɔ haa domala bɛndula humbulan-nda, vanaa súú yɛɛ nda co yɛ, kuɛɛ nda fula yɛ?»

¹⁴Mí mulul ndu aa: «Vana bɛndoo, a sina válán.» Mó dimul-la aa: «Vanaa kei o yɛle tolaale bɛndulen nin-nda co kan ni. A cii domala ndala bɛndulan tɔɔ, má dindi lan o kooma Saa téndóó nin.

¹⁵Lelan nda co o kpɛŋɛ lemasa Hala-o hɔl-ndɔ ni, mà va ndu biiloo paalen a ɲumndan o cɛi ndɔɔ biilaa nin. Vana co o kpɛŋɛ lemasaa nin-ndo co nda cɛi-kola-toandaa ndɔɔ tondɔɔ coo.

¹⁶Yima nɛi lɛnin nda le, kolɔɔ bii lɛnin nda le, paale loo lɛnin nda le, kùlúkúlù ve lɛnin nda le.

¹⁷Kani Saa téndé co o kpɛŋɛ lemasaa tɛɛn-ndo nɔnin nda hɔlten coo. O simnin nda laci le nda yɔɔ o soonnda kólaala mɛmma yoomaalan. Hala vɔɔsuunin nda mɛmɛan kpow o lahɔl.»