Read Kissi Ruti 1 Bible Online

Ruti 1 - Kissi bible

Ruti 1

¹Tuma Masaa kialaa n'yamaa va masalen tosaa o lɛŋnde Israɛl-ten coo-o, mí yima fofolan ma luɛi o lɛŋnden nin. Mí langbanɔ pilɛ can Bɛtlɛhɛm o tàndá Yuda-o nin nda laa ndɔ a poaa ndɔa ŋiɔnda, le kɔlan calle le telen pum o lɛŋnde Moab len nin.

²Elimelɛk langbanɔ kon ndóò nɔ diolan ni, laa ndɔ diolan Noemi[1], poaa ndaa ŋiɔnda o pilɛ diolan aa Malɔn, o pilɔɔ aa Kilyon. Efratiia nda va ni, fulaa o sɔndɔkɔlɔɔ Bɛtlɛhɛm o tàndá Yuda-o nin. Mɛɛ nda tiiya o lɛŋnde Moab len nin, má cal lon.

³Kɛ mí Elimelɛk pɔnɔɔ Noemi vu, mó mɛi ndu a poaa ndɔa ŋiɔnda o labɛngunin.

⁴Mí poaa ndɔa ŋiɔŋaa kan yil vanlaandua Moabua o nɔ̀lan, o pilɛ diolan aa Ɔrpa, o pilɔɔ Ruti. Má cii lon le vɔsilan tɔ́.

⁵Mí Malɔn nda Kilyon bɛɛ a vunnun. Mí Noemi lonnun niko doolɛ o vìí pɔnɔɔ nin a o vìí poaa ndɔa ŋiɔnda nin.

⁶Lɔ́ɔ́ Noemi tuei maa Mɛlɛka koma tosal vanaa ndɔa, Israɛlla, dɛnɛ kɛndɔɔ mó ke nda baloo-o, mó bii nɛiyo nda laandaa poaa ndɔa, le faŋanndo o lɛŋnde Moab len nin le muungoo.

⁷Má can latulu nɛɛ nda va icali-a le muungoo o tàndá Yuda-o nin.

⁸Kɛ ndáà tiiyaa nɛi-tɛɛn, mí Noemi dimul laandaa poaa ndɔa kan aa: «La kɔnnun. Vana-vana muungun o yungu kala ndɔ-o nin. Màá Mɛlɛka tosal niaa dɛnɛ kɛndɔɔ mɛɛ niaa bɛɛ tosal poaa nia vi-a a ya pila dɛnɛ kɛndɔɔ yɛ!

⁹Màá Mɛlɛka ke niaa piaandua celen, mì calta sɛnɛila lan la yelelal niaa!» O kon, mó kɔɔmian nda, má hiiliaa hiko-hiko a caŋndo.

¹⁰Má dimul ndu aa: «Ɛ-ɛ! Naa niaa n co lakɔ o vanaa nɔmnda lo ni.»

¹¹Mí Noemi dimi aa: «La muungun o laniaa lo, cuavaa nia. Le kɔlɔ yɛɛ nɛ niaa co yɛ vɛlɛ hunɔɔ ya kɔɔli? I nɔla lɛnin hɔ́aa celen violɔɔ mì la cal nda o ba o lanɔ nin te.

¹²La muungun, cuavaa nia! I yuuva nin taw le calle vɛlɛ o nɔ celen. Ndóò va bɛɛ maa yáà nɔ vɔ yoomuma ya velu cua, mì luɛi cɔɛllɛn cɛi vanapɔnɔ nin, mì cua folio paalen nden hau,

¹³mò va maa hɔ́aa kan niaa calnin cum mà fula lenin, mì la kɛɛ le calle o nɔla celen ni baa? Kɛì-kɛì bɛɛ! Mbɔ̀ la tiw lɛ ken ba le cuavaa nia. Ya mɔnɛi hiow luɛyɔɔ a niaa, kani ya-ya, ya Mɛlɛka dɔw yɛɛvɛ ni. Lelan, la muungun.»

¹⁴Má hiiliaa vɛlɛ hiiliaa pila a caŋndo. O kon, mí Ɔrpa kɔman kala-lɛɛ ndɔ le ndu congɔnndo, mó kɔannun. Kɛ mí Ruti ndu baanun kala-lɛɛ ndɔ.

¹⁵Mí Noemi dimul ndu aa: «Má cè mɛɛ caan nɔm[2] muungu o vanaa ndɔa a o halaa ndɔa lo yɛ! Nɔm bɛɛ kɔnnun.»

¹⁶Kɛ mí Ruti mulul ndu aa: «Baŋ ya le muungoo o ya lo mì faŋan nɔm kɔɔli le. Nɛɛ-nɛɛ n kɔɛ pɛ, ya bɛɛ i kɔɛ lon, nɛɛ n vanin icali-a, lon ya bɛɛ vanin icali ni, vanaa nɔmnda siŋnunnin vanaa nia, mì Hala nɔmndo siŋnun Hala nuu.

¹⁷Nɛɛ n co vu-a, lon ya bɛɛ vunin ni, mà kumbu ya lon. Te o co yɛ piɔ́mndo le, te ɲɛ celen yɔŋ pɛ mi kelun nɔm kɔɔli, màá Mɛlɛka tuisí sanga hiow sangalan kpow-vo ya coo!»

¹⁸Mɛɛ Noemi ce maa Ruti baanun ndu le kɔlan ndu kɔɔli, o kuuna lɛ ndu le.

¹⁹Má kɔa nda ndu latulu háá má tiiya Bɛtlɛhɛm. Ndáà tiiyaa Bɛtlɛhɛm, mí cieo biiŋun kpow le nda. Mí vanlaandua va ɲuunianndo aa: «Vannda sei! O co macoaa Noemi le co hoo le?»

²⁰Mí ndu Noemi pila dimul nda aa: «La veelu lɛ ya Noemi-lan te, la va ya nin veeloo aa Mara (kon co dimio ni aa ‹Ɲɛ lòloo›), kani Vana-Kpaayaa-Kpow tuisi ya dɛnɛ palaa bɛndoo coo.

²¹Tuma ya va kɔlan-ndo, ɲɛ-ɲɛ ka va ya o ba, kɛ Mɛlɛka mingi ya nanu bala fondo fúú. Maalii Hiow-Kpaayaa-Kpow-vo tuisi ya sanga bɛndoo coo, mó dɔaw ya yɛɛvɛ. Le kɔlɔ yɛɛ niaa co yɛ ya niko veeloo aa Noemi?»

²²Nuaa Noemi cɛn o lɛŋnde Moab len nin nda Ruti ni, lanɔ Moabunɔ po ndɔ ndóò yil-lo pɛɛn. Tuma vannda kandu ɔrse kovɔɔ-o kpafii nda tiiya Bɛtlɛhɛm ni.