Read Kissi 1Samiɛl 1 Bible Online

1Samiɛl 1 - Kissi bible

1Samiɛl 1

¹Langbanɔɔ pum va icali o tàndàá Suf nin, Rama o tàndá n'pembu Efraim-ndo nin, diolan aa Ɛlkana. Po Yeroham-ndo o va ni, Yeroham kon fuɲa ndɔ va Elihu ni, fuɲaa Elihu va Tohu ni, Tohu kon yɛ Suf yɔŋnun fuɲa ndɔ ni.

²Mí Ɛlkana ndóò yil laandua nda ŋiɔn: Anɛɛ nda Penina. Penina ndóò nɔ cuawva, kɛ Anɛɛ ndóò vilu cua le.

³Vɔsi oo vɔsi, Ɛlkana va cɔnɔnndo Rama le kɔlan Silo le Mɛlɛka-Nɔ-Kpaayaa-Kpow-vo biiloo a le ndu sálàlan solullo. Poaa ŋiɔŋaa Helii-a, Hɔfni nda Pineas, vanaa-solia-lasálàá Mɛlɛka-a nda va Silo ni.

⁴Paale Ɛlkana ndóò soli pɛ sálàá, ndóò yɔngu Penina nda cuavaa ndɔa bungan visin solin sálàá-on.

⁵Kɛ bungan hiow naŋɔɔ-on[1] Ɛlkana ndóò ke Anɛɛ ni. I co toɲa maa Mɛlɛka ndóò siinguu Anɛɛ vana vialaa le, kɛ kaolaa pila Ɛlkana ndóò kaola ndu ni.

⁶Mí Penina diɛɛmu ndɔ, ndu va tosaa o nɛi oo nɛi coo le Anɛɛ kɔllo tɛɛmbuuo lɔ́ɔ́-lɔ́ɔ̀, mó va ndu siɛmbulan tuisio le tùú ndóò vilu loo.

⁷Lende Ɛlkana ndóò tosa vɔsi oo vɔsi ni. Nduyɛ, telen oo telen Anɛɛ ndóò kɔɛ pɛ o Cɛi-Mɛlɛka-o nin, mɔnɛi pilɛi ken tuŋ Penina ndóò luei ndu ni. Vɔsio pum, mí Anɛɛ pial caŋndo, mó kɛɛ le ɲɛ-ɲɛ dioo.

⁸Mí Ɛlkana pɔnɔ ndɔ ɲuna ndu aa: «Anɛɛ, le yɛɛ nɛ n co yɛ caŋndo? Vɛ má va kɛɔ le ɲɛdiaa dioo? Le yɛɛ nɛ n co yɛ a mɔnɛi? Vɛ̀ɛ̀ i co fisa a poaa tɔ́ le nɔm te?»

⁹Lɔ́ɔ́ nda cii dioo a kolɔɔ Silo-o, mí Anɛɛ kɔa o Cɛi-Diandaa sondoo. Helii vana-solia-lasálàá va icali o ɲɛ ndɔ calaa coo, o kèédei Cɛi-Mɛlɛka-o ikɛi.

¹⁰Anɛɛ va a kɔl tambɛiyo taw. Mó va Mɛlɛka piɛiyo a caŋndo fúkpàà-fùkpàà.

¹¹Mí Anɛɛ cua ciɛ́ɔn o Mɛlɛka lo, mó dimi aa: «Mɛlɛka-Nɔ-Kpaayaa-Kpow-vo, tofa vɔ dɛnɛ palaa ya co nin-ndo. Pɔɛɛnun ya le. Tuinun ya iɲíí mà ke ya poo. A yɔngu ya pɛ ndu, i yɔngunin ndu le baala nɔmndo, mò tosal nɔm baalaa le lɔ́ɔ́-lɔ́ɔ̀. Yiiŋii ndɔɛi kilunnin le fɛɛn a fɛɛn te.»

¹²Mí Anɛɛ viaw piɛilen taw-taw. Helii va ndu tofaa tuŋ.

¹³O va ndu cɔu cɔcɔn biiŋoo, kɛ o ve ndu diomndo tueyɔɔ le, kani o kɔl nin o va piɛilen ni. Mí Helii va yiyanndo maa mɔiyan maa bii Anɛɛ ni.

¹⁴O kon, mó ɲuna ndu aa: «Ma lo ilaasi-laasiei he a mɔiyan háá lɔ́ɔ́ kuɛɛ nɛ? Fula mà kɔ kiolun mɔima nɔmndan o hɔl nɛɛ celen.»

¹⁵Mí Anɛɛ mulul ndu aa: «Vana ni bɛndoo, o co mamɔi le ma bii ya le. Vanalanɔ dɛnɛ palaa co coo-o ya co ni, kɛ i kol mamɔi le. Mɛlɛka ya hin sanga nuu cɔm ni.

¹⁶Ca ya maa vanalanɔ malnan te, kɔl nuu co o sangaa nin a o mɔnɛi bɛnduei nin ni. Lelan ya viow o piɛilen nin ni.»

¹⁷O kon mí Helii dimul ndu aa: «Kɔ a kɔlɲuloo. Màá Hala Israɛlla ke nɔm ɲɛ n ɲuna ndu-o!»

¹⁸Mí Anɛɛ dimi aa: «Màá buɛi nɔm laandoo sɔla dɛnɛ kɛndɛ nɔm o ba!» Mí Anɛɛ kɔannun, mó cɛl le ɲɛdiaa dioo. Mó pɛngi suumaa.

¹⁹Diimandɔɔ idiiyo púŋ, mí Ɛlkana nda yungu ndɔɔ a kɔ baŋ vulan Mɛlɛka o labɛngunin, malan nda muungu o nda lo Rama. Mí Ɛlkana bɔŋa nda Anɛɛ laa ndɔ o nɔ̀u nin, mí Mɛlɛka yiyan Anɛɛ coo.

²⁰Mó cua folio, mó vialu poo. Mó dimi aa: «I co ndu diolan ke aa Samiɛl. Kani Mɛlɛka ya piɛi le ndu sɔlaa ni.»

²¹O kon kɔɔli, mí Ɛlkana muungu vɛlɛ Silo nda yungu ndɔɔ le Mɛlɛka sálà nda soli lepilɛ o vɔsio nin-ndo solullo a le yoole ndóò baa len timbio.

²²Kɛ Anɛɛ kue lɛ nda pɔnɔ ndɔ le. Mó dimul pɔnɔ ndɔ aa: «O co fisa mì cum háá mì poo mal mɛɛlen, o kon i kɔɛ niko a ndu Silo, i kɔ yɔngu Mɛlɛka ndu, o lo niko lon le lɔ́ɔ́-lɔ́ɔ̀.»

²³Mí Ɛlkana pɔnɔ ndɔ mulul ndu aa: «O naŋ. Kani lende o bɛnda nɔm o kɔl ni, lo a poombɔɔ nanu háá mò mal mɛɛlen. Màá Mɛlɛka peelu sɔɛi ndɔɛi!» O kon, mì Anɛɛ lo Rama le komsalen mandaa.

²⁴Lɔ́ɔ́ Anɛɛ soli poo mɛɛlen o sondo-o, má bii naw tova vɔsila yaa-o[2] nda pɔnɔ ndɔ, má cua kpeyanndo bɔlɔɔ pilɛ a mɔiyan hemndo ca, má kɔa a Samiɛl o Cɛi-Mɛlɛka-o nin Silo. O va vɔ o pɔmbɔ-pɔmbɔ má kɔa a ndu.

²⁵Má soli naw tova kon sálàá, má kɔa a poombɔɔ o Helii lo.

²⁶Mí Anɛɛ ɲuna Helii aa: «Vɛ̀ɛ̀ a loonun pá a cuaa pum o kɔɔ, ó va ɲin pilɛ isisi nanu nɔm ikɛi le Mɛlɛka piɛiyo-o? Ya kpeekpei va piɛile len ni.

²⁷Le poombɔɔ ho sɔlaa ya va Mɛlɛka piɛiyo ni. Ɛ̀ɛ̀ lekɛ́ndɛi, mí Mɛlɛka ke ya ndu.

²⁸Ya bɛɛ, i yeema niko mì yɔngu Mɛlɛka ndu, mò va le Mɛlɛka le lɔ́ɔ́-lɔ́ɔ̀.» O kon mí nda kpow a baŋ vulan Mɛlɛka o labɛngunin.