Read Kissi 1Samiɛl 10 Bible Online

1Samiɛl 10 - Kissi bible

1Samiɛl 10

¹Mí Samiɛl cua lee macuɛi va ndu o ba-o, mó tala cuɛima va lenin-ndan Saul o lebol, mó kɔman ndu, mó dimul ndu aa: «Mɛlɛka pila hɛli nɔm ma va simlacinɔɔ vanaa co kɛ́ ndɔ-a coo.

²La co nɛiyo biyɔɔ sisa le kɔlan, telen niaa tiiyanin Sɛlsa o pɛɛngulan a tàndá Bɛnyamɛn-ndo-o, la komalnin vanpiaandua nda ŋiɔn o sɛi Rasɛl-lo ikɛi, mà dimul nɔm aa: ‹Sofɛlɛa n co nuwviaa-a cennun. Le nɔm kínɛí fuɲa nɔm co nin buulanndo ni. O co dimio aa: Ko yɛɛ ya tosa yɛ mì ce po nuu?›

³Te la hiow pɛ lon, mì la tiiya o yáláŋii co Tabɔr ikɛi-ye, la co bɔŋan niaa vanpiaandua nda yáá, a co va kɔlan o Cɛi-Diandaa[5] Betɛl. O tasoo nɔnin cuinaa téndéa nda yáá o ba, o diinndɔɔ nɔnin bululan tan yáá o ba, o yàándɔɔ ndu vanin a hem mamɔiyo o ba.

⁴Vanaa kan co nɔm kei yilɔɔ, mà ke nɔm bululan tan tiɔn. Bii lan nda o ba.

⁵Lɔ́ɔ́ n tiiyanin Kibea-Elohim nɛɛ vanaa kùndàá Filistia co-a-o, la co lo ciee-lekɔɔ, mì la bɔŋan niaa vanaa-tɛɛngaa-diom Hala-a, mà va fulaa o fonda biilaa, mì vanaa lɔaa labangaa, vanaa lɔaa ladundua, vanaa hɔŋaa masɛ̀ŋnda a vanaa lɔaa n'bɔ̀mbilla va kɔlan nda laci. Nda pila vanaa-tɛɛngaa-diom Hala-a kan vanin diom Hala-o tɛɛnguuo.

⁶O kon Kɔl Mɛlɛka-o toalnin nɔm coo, ma siŋnun vana celen, mì nɔm bɛɛ tɛɛnguu diom Hala-o niaa ndaa latulu.

⁷Lɔ́ɔ́ tɔɔmaselela lan kpow la peelunnin-ndo, nɔm pila sinanin maa Hala co nɔm ikɛi. Lelan, ɲɛ-ɲɛ bɛnda pɛ le tosaa, tosa kon.

⁸Kɔ pɔɔ Kilkal. I co nɔm komal lon, mì n kɔ soli sálàla loamaalan a sálàla kɔlɲululan. Kɔ cum ya le palɛi ndii ŋɔmmɛw, háá mì komal nɔm, mì kɔ cɔm nɔm ɲɛ n bɛnda le tosaa-o.»

⁹Saul sɛyanndo dɔ́ɔ́ nda Samiɛl, mó muli mundoo le kɔnndan, mí Hala mangala ndu kɔllo nin. Mí tɔɔmaselela nda cɔm ndu lan kpow la peelun paale len.

¹⁰Tuma Saul nda buɛi ndɔɔ va tiiyaa Kibea-o, má bɔŋan nda kunda vanaa-tɛɛngaa-diom Hala-a. Mí kɔl Mɛlɛka-o toal Saul coo, mó del o kunda nda kon coo, mí ndu bɛɛ siŋnun vana-tɛɛngaa-diom Hala-o maa nda.

¹¹Lɔ́ɔ́ Saul va o piaa a kɔl Hala-o mó va diom Hala-o tɛɛnguuo vanaa-tɛɛngaa-diom Hala-a tɛɛn-ndo, mí vanaa sina ndu paandu-a dimulan vellaa-velle aa: «Ko yɛɛ nɛ yɔŋnun yɛ po Kis-o o laan? Mò va maa vana-tɛɛngaa-diom Hala-o Saul bɛɛ siŋnun nin ni?»

¹²Mí vana pum ɲuna nda tɛɛn aa: «Nɛ̀ɛ́-nɛ̀ co yɛ fuɲa nda?» Lelan sɔɛi ken siŋnun o tale ni aa: «Mò va maa vana-tɛɛngaa-diom Hala-o Saul bɛɛ siŋnun nin ni?»

¹³Saul ciiyo diom Hala-o tɛɛnguuo, mó kɔa o fonda-loamaa-lasálàá.

¹⁴Mí fuɲa ndɔ pɔmbɔɔ[6] ɲuna ndu nda buɛi ndɔɔ aa: «Kuɛɛ nɛ niaa va yɛ?» Mí Saul mulul ndu aa: «Sofɛlɛa naa n va nuwviaa ni. Kɛ n ci nda le, lelan naa n kɔɛ o Samiɛl-lo le ndu ɲunaa ni.»

¹⁵O kon mí fuɲa ndɔ pɔmbɔɔ[7] ɲuna ndu aa: «Mí vɛɛ Samiɛl dimul-lɛ niaa?»

¹⁶Mí Saul mulul ndu aa: «Nuaa daama o dimul naa ni aa sofɛlɛa cennun.» Kɛ Saul downun fuɲa ndɔ pɔmbɔ kona kɛ́-kɛ̀ a dɛnɛ lemasa Samiɛl dimul ndu-o o kɔɔ le.

¹⁷Mí Samiɛl veelu Israɛlla Mɛlɛka o hɔl Mispa,

¹⁸mó dimul nda aa: «Nuaa Mɛlɛka Hala Israɛlla dimi ni aa: ‹Ya soli niaa Esipte ni, niaa Israɛlla pɛɛn. Ya baŋa niaa Esiptea a masɛi yɛ́-yɛ́i va niaa saangiaa-e o ba ni.›»

¹⁹Mí Samiɛl dimi vɛlɛ aa: «Kɛ niaa kan te co hau Hala niaa soli niaa kon o sangalan nin a o dɛnnda palaalan nin-ndo kɛɔ, mí la muungu ndu dimullo aa ‹Ke naa masaa› le? Lelan, la hun niko o Mɛlɛka lo mɛɛ polama niaan a yungula niaalan la co yɛ́-yɛ́ yɛ.»

²⁰Samiɛl malɔɔ siondei, mó hivi polama Israɛlla kpow. Mí Mɛlɛka hɛli polale Bɛnyamɛn-nden.

²¹Mó veelu yungula yɛ́-yɛ́la fula o polale Bɛnyamɛn-nden nin-ndan, mí sionnden le bii yungu Matri-o. O kon kɔɔli, mí sionnden le bii Saul, po Kis-o. Kɛ a nuwviaa ndu fee, a ci ndu le.

²²Má ɲuna vɛlɛ Mɛlɛka aa: «Vɛ̀ɛ̀ vana kon co pá nanu?» Mí Mɛlɛka muli aa: «O co o viannan o volɔɔlan ikɛi.»

²³Mí vannda kɔ soli ndu lon cɔ́-cɔ́, mó hun sim vannda tɛɛn. Ndóò hiow nda kpow bandei.

²⁴Mí Samiɛl dimul vannda kpow aa: «La tofa vɔ vana Mɛlɛka hɛli-o, ndu co hoo ni. O velan a vana-vana o niaa tɛɛn te.» Mí vannda kpow deŋi a ɲaaloo, má dimi aa: «Màá masaa viow yoomu!»

²⁵O kon kɔɔli, mí Samiɛl cɔm ɲɛ masa kon bɛnda le sɔlaa-o vannda kpow o hɔl, mó sɛva kon kpede o sɛbɔɔ nin, mó kɛsi sɛbɛ kon Mɛlɛka o hɔl malan o mingi vannda kpow o la nda lo.

²⁶Mí Saul bɛɛ muungu o ndu lo Kibea, mí vanaa mayoomua Hala soo o lakɔl-la liila ndu.

²⁷Kɛ diɔmnda pum va Saul pɛɛsaa, má va dimio aa: «Bɔ! Vɛɛ nɛ hoo nɔla yɛnin naa baŋa?» A ke ndu ɲɛ-ɲɛ le. Kɛ Saul ve nda sondo vowlul te.