Read Kissi 1Samiɛl 11 Bible Online

1Samiɛl 11 - Kissi bible

1Samiɛl 11

¹Mí Nahas masa Amɔnnda hun tiila kobio Yabɛs co o tàndá Kalaad-o nin-ndo a cɔwvo. Mí vannda Yabɛs dimul Nahas aa: «N yiinun kpemaa naa niaa haliko mi n va nɔm o ba bɛngu.»

²Kɛ mí Nahas mulul nda aa: «I cɛl le kpemaa yiiyo naa niaa, kɛ fɔ mì la cɛl mì pɛl fɔlɔn vana-vana hɔlte ba kɛndɛlen le Israɛlla kpow siɛmbulan tuisio.»

³Mí kaasoŋaa kɔlkalua Yabɛs mulul Nahas aa: «Cɛl ma ke naa palɛi ndii ŋɔmmɛw, mì n vem kiilaa o lɛŋnde Israɛl-ten nin kpow. O kon, te vana-vana hin-ndɛ le naa malaa le, n malnun nɔm o ba.»

⁴Mí kiilaa kɔa Kibea, o kobi Saul-lo nin, má kɔ downun vannda kona a sɔɔn mun o kɔɔ. Ndáà tueyɔɔ dɔ́ɔ́, má deŋi a caŋndan kpow.

⁵Tuma kon kpafii Saul va fulaa yondoo nin a navaa ndɔa ni. Mó ɲuna aa: «Vóólun-vóólun yɛɛ vannda co yɛ hoo?» Má downun ndu kona a sɔɔn vannda Yabɛs soo-on kpede o kɔɔ.

⁶Saul tueyɔɔ sɔɔn mún, mí kɔl Hala-o toal ndu coo, mó tambu kɔllo taw-taw.

⁷Mó bii nawva nda ŋiɔn, mó siaŋ nda. Mó viam kiilaa a visin bungan mun, má piɔw mun o lɛŋnde Israɛl-ten nin kpow. Mó handu diomndo lecoo aa: «Vana-vana del Saul nda Samiɛl kɔɔli le kɔlan o cɔwvo le, nuaa koni navaa ndɔa sɔlanin kilikilio ni.» O kon, mí siòòŋii bɛndui Mɛlɛka-e bii Israɛlla, má cuungian le kɔlan o cɔwvo, vanáà ca ko aa vanndo ndu pilɛ ni.

⁸Saul cɔmndo nda a pilɛn-pilɛnnda nɛɛ nda va Besɛk-a, mí Israɛlla bɛnda vaalan kɛmɛ leyáá, vanaa fula o tàndá Yuda-o nin-nda vaalan beleyaa.

⁹Má dimul kiilaa fula Yabɛs o tàndá Kalaad-o nin-nda aa: «La kɔ dimul puapilɛa niaa aa: ‹Siɔdii, lɔ́ɔ́ pá mì paalen le tiiyaa o pol, la sɔlanin baŋaa.›» O kon, mí kiilaa kan kɔ dimul vannda Yabɛs diom kɛndɛ kon, má dɔawnun ɲaale taw.

¹⁰Mí vannda Yabɛs dimul Amɔnnda aa: «Siɔdii naa n yɔngunnin niaa ni, mì la tosa ɲɛ niaa yeema-o a naa.»

¹¹Diimandɔɔ, mí Saul piɔw vanaa cɔwva kundalan tan yáá, má kɔ del Amɔnnda coo o dɔ́ɔ́ngɔ́ ndaa nin a di-tɛɛn paale siaa. Má lo Amɔnnda diwvo háá mí paalen le tiiya o pol. Mí a hɛlun-nda sɛŋin a pilɛn-pilɛnnda, hali vanaa ŋiɔn vanáà ci lɛ nɛɛ pilɛ le.

¹²Mí Israɛlla ɲuna Samiɛl aa: «Ɔ́ɔ̀ vanaa va dimio aa a yeema mì Saul va masaa nda coo le-a? Mal nda naa o ba, mì n diw nda.»

¹³Kɛ mí Saul dimi aa: «O bɛnda mì vana-vana sɔla piɔ́mndo paalɛn te, kani hau Mɛlɛka baŋa Israɛlla ni.»

¹⁴O kon kɔɔli, mí Samiɛl dimul Israɛlla aa: «La hun n kɔnnun Kilkal le masale Saul-ten cɔɔloo simio yili.»

¹⁵Mí vannda kpow kɔa Kilkal, má suili Saul masaa Mɛlɛka o hɔl lon. Ndáà ciiyo, má solul Mɛlɛka sálàla kɔlɲululan. Mí Saul nda Israɛlla kpow a dɔawnun ɲaale taw.