Read Kissi 1Samiɛl 12 Bible Online

1Samiɛl 12 - Kissi bible

1Samiɛl 12

¹Mí Samiɛl dimul Israɛlla kpow aa: «La tofa vɔ! I yaŋ nilan o diom oo diom niaa dimul-la, mí suili masaa niaa coo.

²Kandɔɔ hau, la ce masa niaa! Ndu vanin niaa bollen ni. Kani ya i sim niaa laci kandɔɔ o felengiyɛi nii nin háá o paalen nden hau. Kɛ i yuuva nin taw, bollen le dendu ya nin few. Poaa nia sulaa co niaa tɛɛn.

³Lelan, la ce ya isisi niaa, Mɛlɛka a masa o pɔla-o o hɔl. Te i tosal pɛ vana dɛnɛ vɔɔn, vana kon bìí sei nuu. Vɛ̀ɛ̀ i ciimbuu pá naw vana, te kon te sofɛlɛ pila? Nɛ̀ɛ́-nɛ̀ ya saangiaa yɛ le tɔnɔ soli ndu o n'dial? Nɛ̀ɛ́-nɛ̀ ya luei-yɛ mɔnɛi? Nɛ̀ɛ́-nɛ̀ luɛi-yɛ ya nin a ɲɛ pum le hɔltan kindaa o dɛnɛ ndɔɔ coo? Te i tosal pɛ vana dɛnɛ vaa lende, mɛɛ vana kon dimi mì mingul ndu ɲɛ ndɔ ya de-o.»

⁴Mí Israɛlla mulul ndu aa: «A saangiaa naa le tɔnɔ soli naa o n'dial te, a luei naa imɔnɔ le, a bii vɛlɛ vana ɲɛ o ba a lakafa le few.»

⁵Mí Samiɛl cua vɛlɛ sɔɛi, mó dimi aa: «Mɛlɛka a masa o pɔla-o co lesei hau, maa i tɛɛmbuu isɔɔ-sɔɔ a vana o niaa tɛɛn te.» Má mulul ndu aa: «Oi, a co lesei».

⁶Mí Samiɛl dimul nda vɛlɛ aa: «Mɛlɛka hɛli Moise nda Aarɔn ni, ndu koni soli vɛlɛ fuɲaa niaa mamaa Esipte ni.

⁷La hun niko o Mɛlɛka lo, mì kelu yamɛi, mì yiyalan fɔlɔn niaa dɛnnda kɛndɛla Mɛlɛka tosal niaa a fuɲaa niaa mamaa lan.

⁸Lɔ́ɔ́ Yakɔb kɔɛ Esipte-o, mí fuɲaa niaa mamaa koŋul Mɛlɛka o lani le nda baŋaa. Mí Mɛlɛka vim nda Moise nda Aarɔn le nda solio Esipte, má hun cal o lɛŋnden nden nin.

⁹Kɛ mí fuɲaa niaa mamaa pɔɛɛnun Mɛlɛka Hala ndaa. Le ken o pisi nda Sisera va kuubanɔ cɔwvo Hatsɔr-o, Filistia, a masa Moabua o ba ni. Má del nda coo a cɔwvo, má nɔla nda.

¹⁰Mí fuɲaa niaa mamaa veelu vɛlɛ Mɛlɛka le nda malaa, má dimi aa: ‹Mɛlɛka, n cua hakio, kani n mal nɔm mí muungu Baalla a Astarteea sooloo. Kɛ yandi, baŋa naa yaamɔaa naa o ba, o kon mì n tosal nɔm baalaa.›

¹¹Mí Mɛlɛka viam Yerubaal, Bedan, Yɛfte a ya Samiɛl le niaa baŋaa a le niaa solio yaamɔaa va niaa a balaa sɔ́-a o ba. O kon, mí la cal a kɔlɲuloo.

¹²Kɛ telen niaa ce Nahas, masa Amɔnnda hunɔɔ niaa delɔɔ coo a cɔwvo-o, mí la dimul-la aa: ‹Hee ndi, fɔ mì masaa tosa masalen naa coo.› Nduyɛ, Mɛlɛka, o co Hala niaa-o, ndu co masa niaa ni.

¹³Ava, la ce niko masa niaa hɛli-o, o niaa ɲuna-o pɛɛn. Mɛlɛka ke niaa ndu.

¹⁴Te la nɔ pɛ siòòŋii Mɛlɛka-e, te la tosal pɛ ndu baalaa, te la tuei pɛ ndu diom, te la bii pɛ sɔɛi ndɔɛi mì la tosa lanila kalu le silala ndɔlan biyɔɔ le, mɛɛ niaa pila a masa niaa, la lonin ndu Mɛlɛka Hala niaa kɔɔli.

¹⁵Kɛ te la tui diom Mɛlɛka-o le, te la tosa pɛ nila kalulan o sɔɔn ndɔn nin, ndu Mɛlɛka co niaa baa holɔɔ mɛɛ o hol fuɲaa niaa mamaa baa yɛ.

¹⁶Lelan sisa, la sim niko mì la ce dɛnɛ kaamaa bɛndu Mɛlɛka co tosa niaa o hɔl-lo.

¹⁷Vɛ̀ɛ̀ telen koavaa n'mallo[8] le co hoo le? I co Mɛlɛka piɛi mó tuisi piɔɔ bɛndoo a taŋndan. O kon niaa co sina ni maa dɛnɛ vɔɔn bɛndoo pila niaa tosa Mɛlɛka o hɔl le masa celen yeemaa o ndu Hala kɔɔli ni.»

¹⁸Mí Samiɛl piɛi Mɛlɛka, mí Mɛlɛka tuisi piɔɔ paale len, mí taŋndan ma va deŋio taw, mí siòònde bii vannda taw a Mɛlɛka a á Samiɛl.

¹⁹Mí nda kpow a dimul Samiɛl aa: «Tɛɛlun Mɛlɛka Hala nɔmndo le naa, yɔŋii naa n vu. Kani n handu haki celen o hakila naala paandulan coo, le tùú naa pila n ɲuna le masa celen sɔlaa-o.»

²⁰Mí Samiɛl dimul nda aa: «Siòòŋii bii niaa le. I co toɲa maa la tosa dɛnɛ vɔɔndo taw. Kɛ la mulul lɛ Mɛlɛka kɔɔ le, la tosal ndu baalaa a kɔlta niaalan kpow.

²¹Te la mulul pɛ ndu kɔɔ, la co ɲɛ fondoo biilu, ɲɛ nɔla vana mala loo, ɲɛ nɔla vana baŋa loo, kani ɲɛ fondoo piɔmnda co ni.

²²Mɛlɛka melnin niaa le few, kani ndu pila siinguu niaa vanaa ndɔa ni. Nduyɛ, o tosa ken le diolan ndɔla bɛndulan.

²³Le ya yɛ, sɔɛi vɔɔŋii bɛnduei o co le hakio cuaa a Mɛlɛka ni, te i pɛngi pɛ piɛilen le niaa. I vanin vɛlɛ niaa nɛi kɛndɔɔ a nɛi sandaa cɔmndo.

²⁴Niaa yɛ, o bɛnda mì la nɔ siòòŋii Mɛlɛka-e, mì la biilu ndu a kɔlta niaalan kpow, kani niaa pila ce dɛnnda kaamaala o tosa niaa o hɔl-tan.

²⁵Kɛ te la tosa pɛ dɛnɛ vɔɔndo, la co cuvɔɔ itambu kpede, niaa a masa niaa.»