Read Kissi 1Samiɛl 13 Bible Online

1Samiɛl 13 - Kissi bible

1Samiɛl 13

¹Saul ndóò nɔ vɔsilan beleyaa[9] mó sul masaa. Mó tosa masalen vɔsilan tan tiɔn Israɛlla coo[10].

²Mó hɛli vanaa cɔwva vàálan tan yáá nda tɛɛn, mí vannda vàála tiɔn a lo ndu ikɛi Mikmas a o tàndá n'pemboo Betɛl nin, mí n'van vaa pilɛa tɔ̀a kɔ cal nda Yonatan po ndɔ-aa Kibea, o tàndá Bɛnyamɛn-ndo nin. Mí Saul mingi Israɛlaa tɔ̀a o la nda lo.

³Paale pilɛ, mí Yonatan dii masa ibunga Filistia, ó va icali Kibea-o. Mí Filistia tuɛi sɔɛi ken. Mí Saul viam vannda má hɔŋ buloo o lɛŋnden nin kpow, mó va dimio aa: «Fɔ mì Hebreea tuei sɔɛi he.»

⁴Mí Israɛlla tuɛi maa Saul cii masa ibunga Filistia diyɔɔ. Mí Israɛlla siŋnun vanaa vɔɔŋaa bɛndua Filistia o hɔl le dɛnɛ kon. O kon, mí vanaa cɔvaa Israɛlla kpow a cuungian Kilkal o Saul lo.

⁵Mí Filistia bɛɛ cuungian le Israɛlla cɔlɔbaa. Ndáà nɔ ɲɛla ɲaanannda soa nan-ndan vaalan beleyaa, vanaa ɲaanun o soa coo-a vàálan tan ŋɔmpum a vanaa cɔwva sɛ́lɛ́ bɛndoo mɛɛ sióónndon và o mɛmma ihɛllan kɔngɔ nuaa yɛ. Má hun kila dɔ́ɔ́ngɔ́ ndaa Mikmas, Bɛt-Avɛn, a ba paalen le can-ndo.

⁶Lɔ́ɔ́ Israɛlla ce maa dɛnɛ palaa co nin hunɔɔ le nda delɔɔ coo-o, mí vannda kɔa vionnɔnndo o powta kpovalan bɛngu, o buululan nin, o bɔɔlan bɛngu, o bóltan nin a o soonndan nin.

⁷Mí vannda pum taŋ Yurdɛn leeloo le kɔlan vionnɔnndo o tàndá Kad-o a o tàndá Kalaad-o nin. O telen kon kpow nin, Saul va vɔ Kilkal, mí vanaa ndɔa cɔwva kpow a va ɲiiyaa a siòònde.

⁸Palɛi ndii ŋɔmmɛw, vannda va Samiɛl cumndo, telen ndóò dimi le hunɔɔ-o va kon ni. Kɛ o tiiya Kilkal te. Mí vanaa cɔwva mal Saul, má puusian.

⁹Le hee, mí Saul dimul vannda aa: «La cuu ya cɔlua le sálà loamaa a sálàla kɔlɲululan solio». Mí ndu pila soli sálà loamaa.

¹⁰Ndóò ciiyo dɔ́ɔ́ sálà loamaa solio, mí Samiɛl tiiya lon. Mí ndu Saul fula le kɔlan Samiɛl yilɔɔ.

¹¹Mí Samiɛl ɲuna ndu aa: «Yɛɛ nɛ n va yɛ hoo tosaa?» Mó muli aa: «Lɔ́ɔ́ ya ce vanaa cɔwva faaŋianndo ya kɔɔli má va kɔnndan-ndo, mí ca maa nɔm bɛɛ a hin o lɔ́ɔ́ n mɛi-yo coo le, nduyɛ Filistia va nin a cuungiannda Mikmas,

¹²mí yiyan maa Filistia co nin naa hinullo a cɔwvo Kilkal. Nduyɛ, náà n tɛɛlun-ndɔ bɛɛ Mɛlɛka le. Lelan ya ce ni maa o va fisa mì ya pila soli sálà loamaa.»

¹³Mí Samiɛl dimul ndu aa: «A tosa dɛnɔɔ maa diɔm! A bii diom Mɛlɛka Hala nɔmndo dimul nɔm-ndo le. Te nɔm óò bii pɛ diom kon, Mɛlɛka va tosa mì yungu nɔmndo ndóò va masalen tosaa Israɛlla coo le lɔ́ɔ́-lɔ́ɔ̀.

¹⁴Lelan, masalen le hɛlun nɔm. Mɛlɛka cii vana celen hɛli, vana o hini kɔl-lo pɛɛn. O cii ndu siinguu simlacinɔ vanaa ndɔa, kani nɔm, a bii sila o yɔngu nɔm-ndo le.»

¹⁵Mí Samiɛl can Kilkal, mó kɔa Kibea o tàndá Bɛnyamɛn-ndo nin. Mí Saul koma cɔm vanaa cɔvaa tɔ̀a lo ndu kɔɔli-a tɛ́kpɛ́-tɛ́kpɛ́, a va le n'van kɛmɛ leŋɔmpum.

¹⁶Mí Saul kɔ cal Keba o tàndá Bɛnyamɛn-ndo nin nda Yonatan po ndɔ a vanaa cɔvaa lo ndu kɔɔli-a. Mí Filistia nda va icali Mikmas.

¹⁷Paale pilɛ, mí kunda kuubaa cɔvaa tɛɛmbua fula o dɔ́ɔ́ngɔ́ Filistia nin, má piɔvan kundalan tan yáá. Mí kunda tasoo bii nɛiyo le kɔlan a kpengii Ofra-e, o lɛŋnde Sual-ten nin,

¹⁸mí kunda diinndɔɔ bii nɛiyo le kɔlan a ba Bɛt-Hɔrɔn-ndo, mí o yàándɔɔ kɔa a nɛi kɔɛ o pɛɛngulan a ból Sulukua-o, a kpengii lɛŋnde veselɛilen.

¹⁹Tuma kon, sumnɔ ve o lɛŋnde Israɛl-ten nin te, kani yeemɛi Filistia va ni maa Hebreea ndáà nɔ̀ mɔɔn cɔw a labál te.

²⁰O Filistia lo Israɛlla ndáà kɔa dɛndɛla vaalan, dɛndɛla sungaalan, dɛndɛla muliaalan, cueon a pekaasilan cɛɛŋaa ni.

²¹Le dɛndɛlan cɛɛŋaa a le pekaasilan a cueon mingio siɛndio, tààngáà o pilɛ a kɔ̀pɔ́lɔ̀ɔ́ vanáà yɔngu ni.

²²O paale cɔwlen coo, mɔɔn cɔw n ve vanaa cɔvaa Saul-la o ba le, bálta ve vɛlɛ nda o ba le, ɲɛm cɔw ve vana-vana o ba le. Fɔ masaa Saul nda Yonatan po ndɔ kínɛí mɔɔn cɔwvon va o ba ni.

²³Mí kunda vanaa cɔvaa Filistia pilɛ kɔ cal cumullo o kpolonndo nin Mikmas.