Read Kissi 1Samiɛl 15 Bible Online

1Samiɛl 15 - Kissi bible

1Samiɛl 15

¹Mí Samiɛl dimul Saul aa: «Ya Mɛlɛka vem sindɛ le nɔm pɔlaa ma siŋnun masaa vanaa ndɔa coo ni, Israɛlla pɛɛn. Lelan yaŋ-ndɔ nilan, ma tuei ɲɛ Mɛlɛka kalaa dimi-o.

²Mɛlɛka-Nɔ-Kpaayaa-Kpow-vo dimi aa: ‹I co Amalɛkea sangaa tuisi coo le ɲɛ nda tosal sindɛ Israɛlla-o, le nɛi nda kelu nda laci lɔ́ɔ́ nda va fulaa Esipte-o-o.

³Lelan, kɔ sisa, mà kɔ del nda coo a cɔwvo, mà tɛɛmbuu ɲɛm ndan kpow. Mɛi ɲɛ-ɲɛ yoomu le, diw vanpiaandua a vanlaandua, cuaambɔa a cɛlɛkpɛa, nawva a saa[13], ɲɔɔmɛɛa a sofɛlɛa.›»

⁴Mí Saul cuungiaa vannda, mó cɔm nda tɛ́kpɛ́-tɛ́kpɛ́ Telaim. A va faw-faw vanaa cɔwva vaalan kɛmɛ lediin, handɔɔ o n'van vaala tɔ́a fula o tàndá Yuda-o nin-nda coo.

⁵Mí Saul kɔa a nda o kobi Amalɛkea ikɛi, mó kɔ kɛsi nda cumullo o bóllo nin.

⁶O kon kɔɔli, mó viam kiilaa le Keniia dimullo aa: «La ló Amalɛkea tɛɛn te, la fula nda tɛɛn mì la kɔɛnnun polon, yɔŋii ya diw niaa niaa ndaa latulu. Kani niaa niaa, la yɔŋnun vanaa kɛndɛ a Israɛlla lɔ́ɔ́ nda va fulaa Esipte-o.» O kon, mí Keniia fula Amalɛkea tɛɛn.

⁷Mí Saul diw Amalɛkea kandɔɔ Havila háá Sur, Esipte a ba paalen le can-ndo.

⁸Mó bii Akak, masa Amalɛkea o kiyɛiyo, mó dɔaw vanaa tɔ̀a kpow yɛɛvɛ, mó diw nda a mɔɔn cɔwvon.

⁹Mí Saul nda vanaa ndɔa cɔwva mɛi Akak yoomu, a dii ndu le. Má manda vɛlɛ cɔlua hiow naŋɔɔ-a kpow yoomu, cɔlua bɛndua, cɔlua letùúa, cɔlua nda kom ó diinndɔɔ-a, saa kóndóa téndéa a ɲɛ-ɲɛ va cɔlu kɛndɔɔ, a diw nda le. Cɔlua vɔɔnda a cɔlua ɲavɛiya kínɛí nda tɛɛmbuu ni.

¹⁰Le hee, mí Mɛlɛka dimul Samiɛl aa:

¹¹«Mɔnɛi bii ya le hɛli ya hɛli Saul mí siinguu ndu masaa-o. Kani o mulul-la kɔɔ, o tosa sɔɔn ya dimul ndu le tosaa-on te.» Mí sɔɛi ken hiilu Samiɛl kɔllo taw, mó lɔl ɲinkon Mɛlɛka koŋullo o lani pii.

¹²Diimandɔɔ idiiyo púŋ, mó can le kɔlan o Saul-lo. Má dimul ndu aa: «Saul kɔɛ Karmɛl mó kɔ cownun pow sálàá lon, mɛɛ o cii, mó tuusu Kilkal.»

¹³Mɛɛ Samiɛl tiiya Saul ikɛi, mí Saul dimul ndu aa: «Màá Mɛlɛka dɔw nɔm duaa! I cii sɔɛi Mɛlɛka dimi-e tosa.»

¹⁴Mí Samiɛl ɲuna ndu aa: «Kɛ navaa kuɛɛ nɛ a cuinaa kuɛɛ nɛ ya co yɛ niko haa tueyɔɔ caŋndo?»

¹⁵Mí Saul muli aa: «Cɔlua kɛndɛ-kɛndɛa kínɛí vanaa cɔwva hɛli le hunɔɔ Mɛlɛka Hala nɔmndo sálàá solullo ni. Kɛ a tɔ̀a kpede má diw nda few.»

¹⁶Mí Samiɛl kialu Saul sɔɛi o sondo aa: «Meilu vana nanu! Yaŋ nilan mì tɛɛngul nɔm ɲɛ Mɛlɛka dimul-la cɛi icɔl-lo.» Mí Saul muli aa: «I co nɔm lani.»

¹⁷Mí Samiɛl dimi aa: «Paandu, nɔm pila va cɔnnɔnndo o pɔmbɔ, vɛ̀ɛ̀ o co nɔm kon te siŋnun simlacinɔ polama Israɛlla le? Vɛ̀ɛ̀ o co nɔm kon te Mɛlɛka pɔla ma siŋnun masaa o lɛŋnde Israɛl-ten coo le?

¹⁸Nduyɛ, Mɛlɛka cɔm nɔm ɲɛ n bɛnda le tosaa-o, mó dimul nɔm le kɔlan Amalɛkea lahakia ha delɔɔ coo a cɔwvo a le nda ciiyo diwvo kpede.

¹⁹Kɛ le yɛɛ niko, a bii diom ndɔɔ le? Le yɛɛ n tosa yɛ ɲɛ hɛnan Mɛlɛka loo, má cua bolofaa niaa bii yaamɔɔa o ba o cɔwvo-o?»

²⁰Mí Saul mulul Samiɛl aa: «Kɛ nduyɛ, ɲɛ Mɛlɛka dimi le tosaa-o kpeekpei ya tosa hoo ni. I kɔɛ, mí kɔ diw Amalɛkea kpede, fɔ Akak masa ndaa ho kínɛí le ya hin yoomu le?

²¹Cɔlua bɛndua a cɔlua letùúa vannda hin haa-a yɛ, o co dɔ́ɔ́ le kpeku celen soli le nda hin a nda le, fɔ le Mɛlɛka Hala nɔmndo sálàlan solullo Kilkal nanu a nda.»

²²Mí Samiɛl ɲuna aa: «Vɛ̀ɛ̀ o sálàla loamaalan a o sálàla súú celen ndu solullo nin Mɛlɛka hini kɔl ni baa o sɔɛi ndɔɛi biyɔɔ nin? A toɲa, sɔɛi biyɔɔ hiow naŋɔɔ a sálàlan solio, Sɔɛi biyɔɔ co fisa a cɔlua macuɛiya sálàá solio.

²³Kani mɛɛ yavaa vomɔɔ co dɛnɛ vɔɔndo yɛ, lende koni nila kalulan la co dɛnɛ vɔɔndo ni. Mɛɛ piɔmaa tongoninnda sooloo co dɛnɛ nɔɔlɛiyo yɛ, lende koni sɔɛi biyaa lepɛŋnde co dɛnɛ nɔɔlɛiyo ni. Lelan, mɛɛ n kɛɛ le diom Mɛlɛka-o biyɔɔ yɛ, Mɛlɛka bɛɛ kɛɛ nɔm. A co lɛ masa le.»

²⁴Mí Saul dimi aa: «I cua hakio fɔ́! I bii diom Mɛlɛka-o le, i tui vɛlɛ silala nɔm Samiɛl-tan te. Siòòŋii vannda va ya ni, lelan ya yaŋnun nda ni.

²⁵Lelan, a yandi mal-la haki, ma cɛl mi n muungu, mi kɔ baŋ vulan Mɛlɛka o labɛngunin.»

²⁶Mí Samiɛl mulul ndu aa: «Ɛ-ɛ, n co muungu naa ŋiɔn te. Kani a ci sɔɛi Mɛlɛka-e ɲɛ-ɲɛ le, lelan Mɛlɛka bɛɛ kɛɛ nɔm ni. A ve lɛnin masa Israɛlla coo le.»

²⁷Samiɛl mulinndo le kɔnndan, mí Saul saa ndu doma ndɔ bɛndoo a makɔɔ, mí domaa sɛɛsa.

²⁸O kon, mí Samiɛl dimul Saul aa: «Nuaa Mɛlɛka sɛɛsiaa nɔm hau masalen o ba Israɛlla coo ni, mó yɔngu vana celen, vana co fisa a nɔm-ndo pɛɛn.

²⁹Mɛlɛka co biilu Israɛlla-o dimi lacòò le, o mangala diomndo maa vanaciee le.»

³⁰Mí Saul dimi vɛlɛ aa: «A toɲa, i cua hakio lekɛ́ndɛi. Kɛ i co nɔm tɛɛlɔn, ke ya lasiɛmbu kaasoŋaa kɔlkalua a Israɛlaa tɔ̀a o hɔl te. N muungu yandi, mì kɔ del Mɛlɛka Hala nɔmndo o labɛngunin.»

³¹Mí Samiɛl liila ndu, mí Saul kɔ baŋ vulan Mɛlɛka o labɛngunin.

³²O kon kɔɔli, mí Samiɛl dimi aa «La cuu ya Akak, masa Amalɛkea.» Mí Akak sɔɔnguu a kɔlkɛndɔɔ, kani o va dimio o kɔl nin aa: «A toɲa, nihau ndu, kpundɛ piɔ́mndo kɔɛ ya levil.»

³³Kɛ mí Samiɛl dimul ndu aa: «Mɛɛ mɔɛi nɔmii cɔwve mɛi vanlaandua bɔɔ-bɔɔ kɔɔla fondo yɛ, lende koni kala nɔm co hau lo kɔɔ fondo vanlaandua tɛɛn ni.» Mí Samiɛl dii ndu Mɛlɛka o hɔl Kilkal lon.

³⁴Mí Samiɛl muungu Rama, mí Saul ndu kɔa o ndu lo Kibea.

³⁵Háá mi Samiɛl vu, a ciikan ndɛ nda Saul te. Samiɛl va caŋndo taw le Saul. Mí mɔnɛi bii Mɛlɛka le tùú ndóò hɛli Saul mó suili ndu masaa Israɛl-lo.