Read Kissi 1Samiɛl 18 Bible Online

1Samiɛl 18 - Kissi bible

1Samiɛl 18

¹David ciiyo suukanndo nda Saul, mí Yonatan holnun David, mó kaola ndu maa ndu pila.

²Paale pilɛle len, mí David lo o Saul lo, o mel ndu muungoo o fuɲa ndɔ lo le.

³O kon, mí Yonatan yii kpema icanyaa nda David, kani mó kaola ndu maa ndu pila.

⁴Mí Yonatan solin doma ndɔ bɛndoo lekɔɔ, mó yɔngu David. Mó yɔngu ndu vɛlɛ volɔɔla ndɔla cɔwlan: mɔɛi ndɔɛi cɔwve, kpaasiaa ndɔɔ a yáwle ndɔle cɔwlen.

⁵Nɛɛ-nɛɛ Saul ndóò vem pɛ David o cɔwvo, fɔ mi ndóò kɔ fula tɔ́ɔ́. Le hee, mí Saul handu ndu kunda vanaa cɔwva pum bollen. Mí vannda kpow a naŋ kɔl a David, hali vanaa baalaa Saul-la.

⁶Tuma David cii Koliat diyɔɔ mí vanaa cɔwva va muungoo o la nda lo-o, mí vanlaandua fula o kobila yɛ́-yɛ́la Israɛl-tan nin kpow le kɔlan masaa Saul bɔŋaa. Má va condon solio a yolan o dundulan a o ɲɛm-caan celen bɛngu. A va yoondiaalan a ɲaaloo taw.

⁷Má va condon cuaa a cɛlɔɔ vellaa-velle aa: «Saul dii yaamɔɔa vaalan, Kɛ David ndu dii yaamɔɔa vaalan tɔ́-tɔ́ o vaalan tɔ́-tɔ́ nin.»

⁸Mí Saul tambu kɔl taw le condii ken. Mó dimi aa: «Yéè David nda ke vaalan tɔ́-tɔ́ o vaalan tɔ́-tɔ́ nin ni, ya niko ma ke ya vaalan kínɛí? Mɛɛ masalen ko le lo nin le ndu yɔngoo le?»

⁹Kandɔɔ ɲinkon, Saul ve lɛ David tofa kɛndɛ le.

¹⁰Diimandɔɔ, mí kɔl vɔɔn fula Hala o ba-o luɛi Saul nin o ndu lo cɛinin, mó muungu yoloma-yoloma. David va ndu bangaa loo maa paandu. Bállo va Saul o ba,

¹¹mó heelu bál kon, mó dimi o kɔl nin aa: «Fɔ mì cuku poombɔɔ ho, mì buli ndu, mì bállo kɔ baŋ ndu o cɛiyo.» Mó vuu háá bɛmbɛ le diin, kɛ mí David kpakpala bállo.

¹²O kon mí siòònde bii Saul a David, kani Mɛlɛka va David ikɛi, kɛ Mɛlɛka ve lɛ ndu Saul ikɛi le.

¹³Le hee, mí Saul faŋa David ndu ikɛi polon, mó kɛsi ndu kunda vanaa cɔvaa vaa pilɛ-a bollen. Mí David kandu vanaa cɔwva simndan laci le cɔwlan tosaa.

¹⁴Mí ɲɛ-ɲɛ va David bɛndaa o ba, kani Mɛlɛka va ndu ikɛi.

¹⁵Saul cɔu maa David va hiovɔɔ laci a kpaayaa sɔlaa, mí siòònde cɔɔlu ndu biyɔɔ a ndu taw.

¹⁶Kɛ Israɛlla nda Yudaa kpow ndáà yeema David, kani ndu va nda bollen o cɔwvo nin ni.

¹⁷Saul va dimio o kɔl nin aa: «Màá Filistia díí David, kɛ màá o vá ya pila le díí ndu le!» Le hee, mó dimul David aa: «Má cè Merab cua ni tasoo! Ndu ya co nɔm yɔngu mo va laa nɔm ni. Kɛ fɔ ma tosal-la fɔlɔn baalaa a dialun fulan o cɔwla Mɛlɛka lan tosaa nin.»

¹⁸Mí David mulul Saul aa: «Yɛɛ nɛ ya co yɛ mì siŋnun lefoo masaa? Yɛɛ yungu fuɲa nuu co yɛ o polama cuavaa Israɛlla tɛɛn?»

¹⁹Kɛ telenndo tiiyaa le Merab, cua Saul-lo liilaa o nɔu o David lo, má kɛsi ndu Adriɛl fula Mehola-o o ba.

²⁰Kɛ nduyɛ, mí Mikal cua diinndɔ Saul-lo yom yomndo pila le David. Ndáà dimullo Saul sɔɛi ken, mó dɔawnun ɲaale.

²¹Mí Saul dimi o kɔl ndɔɔ nin aa: «I co David Mikal cua ni yɔngu o nɔ̀u nin, haliko mi kon va yaŋɔɔlen le ndu malɔɔ Filistia o ba.» Mí Saul dimul David bɛmbɛ lediin maa o siŋnun lefu ndɔ paale len.

²²Mí Saul dimul vanaa bɛndua va ndu o ba bɛngu-a aa: «La kɔ tundu vɔ a ndu, mì la dimul ndu aa: ‹David, a hɛnan masaa taw, naa n co vanaa bɛndua ndu o ba bɛngu-a bɛɛ, n kaolaa nɔm taw. Lelan cɛl ma siŋnun lefoo masaa.›»

²³Mí vanaa bɛndua va kan masaa o ba bɛngu-a kɔ tiiyal David sɔɔn mun kpow. Kɛ mí David mulul nda aa: «La laalan maa dɛnɛ bɛɛn-bɛɛn o co le vaa lefoo masaa ni? I nɔ ɲɛ le, i co ɲɛ le!»

²⁴Mí vanaa bɛndua va kan masaa o ba bɛngu-a kɔ dimul masaa mɛɛ David muli yɛ.

²⁵Mí Saul dimi aa: «La kɔ dimul ndu aa: ‹Masaa yeema ma dɔw fulu le. Ɲɛ o yeema daama-o co súúndùla Filistia kɛmɛ, le màá ndɔɔ mingio yaamɔaa ndɔa kan coo ni.›» Saul ndóò nɔ o kɔl lekɛ́ndɛi maa David va delɔɔ Filistia o ba.

²⁶Mí vanaa bɛndua kɔ downun David kona a sɔɔn mun o kɔɔ. Mí ndu David cɛl le siŋnɔnndo lefoo masaa. Lɔ́ɔ́ pá mí telen masaa ndóò kelu-o tiiya,

²⁷mí David can nda vanaa ndɔa cɔwva, má kɔ diw Filistia kɛmɛ lediin. Mí David hun a suundula ndalan, mó cɔm ndan Saul o hɔl le siŋnɔnndo lefu ndɔ. O kon, mí masaa ke ndu Mikal cua ndɔ o nɔ̀u nin.

²⁸Saul sinaa maa lekɛ́ndɛi ba Mɛlɛka-o va David coo, nduyɛ maa Mikal cua ndɔ kaola David taw,

²⁹mí siòònde cɔɔlu ndu biyɔɔ a David, mí nɛyɔn bɛndoo luɛi vɛlɛ ndu o kɔl a ndu.

³⁰O telen kon, simlacia Filistia va Israɛlla kuello a cɔwvo. Kɛ nduyɛ, o cɔw oo cɔw ndáà kɔɛ pɛ, David ndóò hiaw nɔlaa a kuubaa cɔvaa Saul-la ni. Lelan mí tɔ́ɔ́ David-o tiw kpede.