Read Kissi 1Samiɛl 21 Bible Online

1Samiɛl 21 - Kissi bible

1Samiɛl 21

¹O kon, mí David kɔannun, mí Yonatan ndu muungu ciee.

²Mí David kɔa Nɔb, o Ahimelɛk vana-solia-lasálàá lo. Mí ndu hun David bɔŋaa a ɲiiyaa, mó ɲuna ndu aa: «Vɛɛ hunɔɔ ho nɔm pilɛ? Vɛ a hin niaa vana le?»

³Mí David mulul ndu aa: «Masaa vem ya ni, mó dimul-la aa vana-vana bɛnda mò sina kɔlɔ o co ya viomɔɔ-o a sɔɔn o dimul-la-on te. Lelan ya mel langbaa nia lɔ́ɔ́ mì n bɔŋan naa ndaa nɛɛ pum ni.

⁴Yɛɛ nɛ n nɔ yɛ o ba nanu sisa? Mala vɔ ya le bululan[22] laŋuɛɛnu, te kon te ɲɛ-ɲɛ n sɔla pɛ.»

⁵Mí vana-solia-lasálàá kon mulul ndu aa: «Bulu celen co ya o ba le, bulu sálàá daama co nihau ya o ba ni. I nɔla mì ke nɔm ndu, kɛ fɔ mò va dɔ́ɔ́ maa vanaa co nɔm kɔɔli-a mɔɔsa kpele vaalio a vanalanɔ le.»

⁶Mí David dimul ndu aa: «O co ka o laan daama le, lɔ́ɔ́-lɔ́ɔ̀ naa n va pɛ kɔlan o cɔwvo, n mɔɔsa kpele a vanalanɔ le. Handɔɔ o kon coo, ɲɛm cɔvun langbaa nia kpow n'diandan n và ni. Lelan o va bɛɛ maa o co cɔw diandaa le cɔw naa n hin tosaa-o co le, ɲɛm cɔwvon co ndu dindi[23].»

⁷O kon mí vana-solia-lasálàá yɔngu David bulula sálàlan, kani lan koni la va ndu o ba ni. Mɛlɛka o hɔl ndáà kɛsì bulula lan ni, ndáà faŋa pɛ lan Mɛlɛka o hɔl, paale pilɛle len ndáà mingi bulula tuwlan o fonda kon.

⁸Nduyɛ vana baala Saul-lo pum va ɲinkon vallo tosaa Mɛlɛka o hɔl lon, diola ndɔlan aa Doɛk, Edɔmnɔɔ o va ni. Ndu va bolle vanaa mandaa n'cɔlua Saul-la ni[24].

⁹Mí David ɲuna Ahimelɛk aa: «Vɛ̀ɛ̀ a nɔ bál, te kon te mɔɛi cɔw o ba le? I cue mɔɛi cɔvii nii le, i cue vɛlɛ volɔɔla nila cɔwlan te, kani fɔ mì yáà kɔɛ vomɔɔ masaa cɔ́-cɔ́.»

¹⁰Mí vana-solia-lasálàá mulul ndu aa: «Mɔɛi cɔvii Koliat-e, Filistinɔ n dii o Ból terebɛnteo nin-ndo-e, ndi co nanu ni. I co isimbulɛi o doma bɛndoo nin o doma ifalen solia lasálàá kɔɔli. Taa yeema ndi pɛ, a cua, kani ndi koni co nanu ni.» Mí David dimi aa: «Mɛɛ ke ya ndi, hee ndi súú ndɔ sɔlan te.»

¹¹Paale pilɛle len, mí David hiaw laci o Saul ɲaanɔnndo nin, mó kɔa o Akis masaa Kat lo.

¹²Mí vanaa bɛndua Akis-a dimul ndu masaa aa: «Vɛ̀ɛ̀ o co David, masaa Israɛl te co hoo le? Hoo vanlaandua ndáà solul condei ni aa: ‹Saul dii yaamɔɔa vaalan, Kɛ David ndu dii yaamɔɔa vaalan tɔ́-tɔ́ o vaalan tɔ́-tɔ́ nin.›»

¹³David ciiyo kɔllo keelaa o sɔɔn mún coo, mí siòònde bii ndu taw a masaa Akis.

¹⁴Mó siingun ndu pila diɔmndo Filistia o hɔl. Mó muungu sɔɔn tosaa nda o hɔl maa vana seemɛi, mó va tindian tɛɛndiaa o koŋnda diolan coo, mó va vɛlɛ lɔluan tuisinndo o siaiye coo.

¹⁵O kon mí masaa Akis dimul vanaa bɛndua va ndu o ba bɛngu-a aa: «Niaa pila co cɔu maa langbanɔɔ ho pe lebol te, le yɛɛ nɛ niaa cuu yɛ ya ndu nanu?

¹⁶Mò va maa vanaa seemɛiya co ya pɛŋnden ni, le yɛɛ nɛ niaa cuu yɛ ya hoo mó hun sim iyoloma-yolamɛi he ya o hɔl? O luei pelei o ya lo cɛinin te dɛ!»