Read Kissi 1Samiɛl 23 Bible Online

1Samiɛl 23 - Kissi bible

1Samiɛl 23

¹Paale pilɛ, má hun dimul David aa: «Má cè mɛɛ Filistia bii kobio Keila yɛ! A co ɲɛm co o kpelela lɔaa n'maltan coo-on kuendio.»

²Mí David ɲuna Mɛlɛka aa: «Vɛ̀ɛ̀ o bɛnda pá mì kɔ del Filistia ha coo a cɔwvo mì nɔla nda?» Mí Mɛlɛka mulul ndu aa: «Kɔ del nda coo, ma baŋa kobio Keila.»

³Kɛ mí vanaa cɔvaa David-a dimul ndu David aa: «N co vɔ o naa lo Yuda nanu mí siòònde va naa a Filistia, vɛɛ nɛ naa n nɔla yɛnin vɛlɛ mì n kuel nda Keila?»

⁴Mí David ɲuna vɛlɛ Mɛlɛka, mí Mɛlɛka mulul ndu aa: «Cɔn ma kɔɛ Keila. I cii Filistia malɔɔ nɔm o ba.»

⁵O kon, mí David kɔa Keila nda vanaa ndɔa cɔwva, má kɔ del Filistia coo, má nɔla nda. Má poondiaa cɔlua ndaa. Nuaa David baŋa vannda Keila ni.

⁶Lɔ́ɔ́ Abiatar, po Ahimelɛk-o hin vionnɔnndo o David lo Keila-o, mó hun a doma ifalen solia lasálàá o ba.

⁷Saul tueyɔɔ maa David va Keila, mó dimi aa: «Mbɔ̀ Hala cii ya ndu biilul o yaŋɔɔlen, kani o kɔ luɛi o kobi nɔ sɔkɔma n'cilinndan-ndo nin.»

⁸Mí Saul dimul vanaa cɔwva kpow le tuusoo Keila, le kɔlan David nda langbaa va ndu kelaa kɔɔli-a biyɔɔ.

⁹David sinaa maa Saul va bɛɛndianndo le ndu dɛnɛ vɔɔndo tosallo, mó dimul Abiatar vana-solia-lasálà aa: «Hun a doma ifalen solia lasálàá.»

¹⁰Mí David dimi aa: «Mɛlɛka, Hala Israɛlla, i tuei maa Saul co bɛɛndianndo le hunɔɔ kobio Keila tɛɛmbuuo le ya.

¹¹Vɛ̀ɛ̀ te o hin pɛ, vannda Keila cɔɔmuunin ya, mà mal-la ndu o ba le? Vɛ̀ɛ̀ Saul kalaa hunnin pá lekɛ́ndɛi mɛɛ ya tuei yɛ? Mɛlɛka Hala Israɛlla, a yandi mulul-la.» Mí Mɛlɛka mulul ndu aa: «O co hunɔɔ.»

¹²Mí David ɲuna vɛlɛ aa: «Vɛ̀ɛ̀ vanaa bɛndua Keila melnin ya a langbaa nia ndu Saul o ba le?» Mí Mɛlɛka mulul ndu aa: «A co niaa hunɔɔ malɔɔ ndu o ba.»

¹³Fɔ́ɔ́fɔ̀, mí David nda langbaa ndɔa faŋan Keila, má kɔannun nɛɛ celen, a va le n'van kɛmɛ leŋɔmpum. Má kɔ dimul Saul aa David faŋan Keila mó kɔannun nɛɛ celen. O kon, Saul hin ndɛ a cɔwvo le.

¹⁴Mí David kɔannun o lɛŋnde veselɛilen Sif nin, mó kɔ calnun o fondala feke-fekela co o pembon coo lan. Lepalaa-lepala Saul va ndu nuwviaa, kɛ Hala cɛl le David malɔɔ ndu o ba le.

¹⁵Mí David ca maa ndu Saul va kuello a cɔwvo le ndu diyɔɔ ni, mó calnun Hɔrsa o lɛŋnde veselɛilen Sif nin.

¹⁶Paale pilɛ, mí Yonatan, po Saul-lo kɔ komal ndu David nɛɛ o va Hɔrsa-a, mó sila ndu le Hala ndu pilɛ kpé tiindanndo.

¹⁷Mó dimul ndu aa: «Siòòŋii bii nɔm te. Saul fuɲa ni nɔlanin nɔm biyɔɔ le. Nɔm vanin masa Israɛlla ni, mì ya i va nɔm ikɛi. Ndu pila bɛɛ sina nin ken.»

¹⁸Má yii kpema icanyaa Mɛlɛka o hɔl nda ŋiɔn. O kon kɔɔli, mí David lo Hɔrsa, mí Yonatan ndu muungun o ndu lo.

¹⁹Mí vannda Sif komal Saul Kibea, má dimul ndu aa: «David co o viannanndo o naa lo, o bundɔɔ Hɔrsa nin, o fondala feke-fekela co o pembei Hakila coo lan, o dɛɛlala vesɛila co a ba too lan nin.

²⁰Masaa, taa yeema pɛ le ndu biyɔɔ, kɔ mì n mala nɔm ndu biyɔɔ.»

²¹Mí Saul dimi aa: «Màá Mɛlɛka dɔw niaa duaa le ɲíí bii niaa a ya-e!

²²Mɛɛ la kɔ mì la kɔ cɔɔlu mɛɛndian, mì la dem foofola ndɔlan, mì la sina fonda o co kpeekpei-yo. Mí la sina vɛlɛ vana ce ndu-o. Kani vannda dimul-la maa o nɔ kɔlkalu vɔɔndo taw.

²³La kɔ mɛɛndian mì la sina bɛ̀mɛ́lta o viannun-ndan, mì la muungu ya o ibuŋ, mì la downun ya kona ɲɛkɛndɛi malan ya can mì n kɔɛ naa niaa. Te o tàndá Yuda-o nin o co lekɛ́ndɛi ni, mɛ̀ɛ́-mɛ̀ɛ́ vannda va bɛɛ sɛ́lɛ́, i co ndu lo nuwviaa o yungula yɛ́-yɛ́la fula o polale Yuda len nin-ndan nin háá mi saalun ndu.»

²⁴Mí vanaa fula kan Sif-a can, má hiaw Saul laci le muungoo Sif. Kɛ David nda langbaa ndɔa vannun nin o dɛngbɛ co o lɛŋnde veselɛilen Maɔn nin-ndo nin, o dɛɛlala vesɛilan a ba too.

²⁵Mí Saul nda vanaa ndɔa cɔwva kɔa David nuwviaa. Kɛ David tueyɔɔ sɔɛi ken, mó toal pembii pow bandílɛi co o lɛŋnde veselɛilen Maɔn nin-nde, mó kɔ calnun o dɛngbɔɔ nin. Mɛɛ Saul tuei lende, mó kuel David o lɛŋnde veselɛilen Maɔn nin.

²⁶Saul va pembei demullo kpengei pilɛi, mí David nda langbaa ndɔa bɛɛ va nda ɲaanɔnndo o pembei baa pilɔɔ. Ɲaanɔnndo pila yungu David-o va ni, kani Saul nda vanaa ndɔa cɔwva va nin fiɔ́ɔ́-fiɔ́ɔ̀ le nda tiilaa.

²⁷Kɛ mí kiilaa hun Saul kɔɔli, mó dimul ndu aa: «Hun cɔ́-cɔ́, kani Filistia koma del naa coo a cɔwvo.»

²⁸Mí Saul pɛngi David tovɔɔ, mó mulin le Filistia cɔlɔbaa. Lelan nda ke fonda kon diolan ni aa Sela-Mahlekɔt (kon co dimio ni aa «Pow Bandílá sɛyanndo»).