Read Kissi 1Samiɛl 24 Bible Online

1Samiɛl 24 - Kissi bible

1Samiɛl 24

¹Mí David faŋan ndon, mó kɔ cal o fondala feke-fekela va Ɛin-Kedi ikɛi lan.

²Saul fulaa nɛɛ ndóò kuel Filistia a cɔwvo-a, mó tuɛi maa David co o lɛŋnde veselɛilen Ɛin-Kedi nin.

³Mó cuungiaa vanpiaandua vàálan tan yáá, a o hɛli o vanaa cɔwva Israɛl tɛɛn-nda, mó kɔa a nda le David nda langbaa ndɔa cɔwva nuwviaa o pow kpova cuinaa bandíláà va-o ikɛi.

⁴Lɔ́ɔ́ Saul va keiyo o hèéla saala va o nɛiyo dangalaa lan ikɛi-yo, mó ca buululan lapum, mó kɔ luɛi lenin le sɔndanndo[25]. Nduyɛ, David nda langbaa ndɔa va a viannannda o buulula pilɛla lan nin.

⁵Mí langbaa ndɔa dimul ndu David aa: «Má cè niko paale Mɛlɛka dimi le nɔm yaamɔɔ nɔmndo malɔɔ o ba len! Cɔn niko ma tosa ɲɛ n yeema a ndu-o.» Mí David can duɛɛn, mó kialu bɔ̀ɔ̀le doma bɛndu Saul-lo.

⁶Kɛ mí kɔllo kandu ndu fulaa taw le bɔ̀ɔ̀le doma bɛndu Saul-te o kelu len-nden.

⁷Mó dimul langbaa ndɔa aa: «Màá Mɛlɛka kanda ya le vana ni bɛndoo dɛnɛ vaa lende tosallo, le masa Mɛlɛka pɔla-o baa holɔɔ! Kani masa Mɛlɛka pila pɔla-o o co ni.»

⁸A sɔɔn mún David nɔla langbaa ndɔa ni, mó kuuna nda le Saul delɔɔ coo. O kon mí Saul can, mó fula o buulula lan nin, mó bii nɛiyo le kɔlan nɛɛ o va kɔlan-nda.

⁹Mí David bɛɛ koma cɔn, mó fula ndu kɔɔli o buululan nin, mó yonda coocoo aa: «Vana bɛndoo sei! Masaa sei!» Mí Saul mulin mó tofan kɔɔli, mí David baŋ vulan, mó tundun lɛŋ dí.

¹⁰Mó ɲuna ndu aa: «Le yɛɛ nɛ n co yɛ vanaa co nɔm dimullo aa David yeema dɛnɛ nɔm kɛndɛ le-a delɔɔ kɔɔli?

¹¹Nɔm pila tofa vɔ, Mɛlɛka ndóò cii nɔm hau malɔɔ ya o ba o buululan ndan nin. Vannda va ya dimullo le nɔm diyɔɔ, kɛ i cɛl te, mí dimi aa i cɛlnin mì hol vana ni bɛndoo baa le, kani masa Mɛlɛka pɔla-o o co ni.

¹²Òó Pua, tofa vɔ! Tofa vɔ bɔ̀ɔ̀le doma nɔm bɛndoo ya o ba! Yáà tiwba mì yáà dii nɔm, kɛ bɔ̀ɔ̀le doma nɔm bɛndoo daama ya kelu ni. Lelan sina maa i nɔ nɛyɔn nɔm te, i tɛɛndan nɔm te, i cue vɛlɛ haki a nɔm te. Kɛ mí nɔm va ya tovɔɔ le ya diyɔɔ.

¹³Lelan, màá Mɛlɛka kiolu yamɛi naa tɛɛn naa ŋiɔn! Màá Mɛlɛka pila sala nɔm le dɛnɛ vɔɔn n co ya tosallo-o! Kɛ ya pila co nɔm ɲɛ-ɲɛ vɔɔn yɔŋ te.

¹⁴A sina maa tale masindɔɔ pum dimi aa: ‹O vanaa kɔlvesɛiya nin kɔlvesɛiyo fula ni.› Lelan, ya i co nɔm ɲɛ-ɲɛ vɔɔn tosal te.

¹⁵Nɛ̀ɛ́-nɛ̀ kpeekpei nɔm masaa Israɛl co yɛ kiltan-ndan kɔɔli a cɔwvo? Nɛ̀ɛ́ n co yɛ tovɔɔ ho? Yéè ya tun vílɛ́iyo ho n co kiltan-ndan kɔɔli ni? Yéè ya kpangbaɲaalaa ho n co tovɔɔ ho ni nɛ?

¹⁶Mɛlɛka co naa yamɛi kiolɔɔ tɛɛn naa nɔm. O co mɛɛndan mò soo le ya, mò baŋa ya nɔm o ba.»

¹⁷Lɔ́ɔ́ David cii sɔɛi lende o Saul lo-o, mí Saul ɲuna ndu aa: «David po ni, vɛ̀ɛ̀ diom nɔmndo ya tuei nuaa ni?» Mí Saul caŋ fúkpàà-fùkpàà!

¹⁸O kon kɔɔli, mó dimul David aa: «A nɔ dí, ya vɔw a nɔm ni. Kani nɔm tosal-la dɛnɛ kɛndɔɔ mí ya i va nɔm dɛnɛ vɔɔndo tosallo.

¹⁹A soli hau vanakɛndɛyɛi n co ya tosallo-e ceen vakpa, kani Mɛlɛka ndóò cii nin ya malɔɔ nɔm o ba, kɛ a dii ya le.

²⁰Te vanndo komal pɛ yaamɔɔ ndɔɔ, vɛ̀ɛ̀ o mal ndu pá kɔnndan lende bɛɛn-bɛɛn? Kɛì-kɛì bɛɛ! Lelan màá Mɛlɛka sala nɔm le vanakɛndɛyɛi n tosa hau a ya-e!

²¹I sina maa a siŋnunnin masaa paale pum, ma tosa masalen Israɛlla coo a kɔlɲuloo fɛɛ.

²²Lelan cuel-la ciɛ́ɔn o diola Mɛlɛka lan maa te i vi pɛ, a koma diwnin poaa nia ma ɲumi diola nilan o yungu nuu nin te.»

²³Mí David cuel ndu ciɛ́ɔn mún, o kon mí Saul muungun o ndu lo. Mí David nda vanaa ndɔa cɔwva bɛɛ muungu nɛɛ nda va a viannannda o pembei coo-a.