Read Kissi 1Samiɛl 3 Bible Online

1Samiɛl 3 - Kissi bible

1Samiɛl 3

¹Samiɛl va baala Mɛlɛka-o tosaa Helii o ba bɛngu. O telen kon yɛ, Mɛlɛka ndóò suu ka cuɛi-cuɛi o vanacieo lo le, ndóò cɔm vɛlɛ ka vanacieo vundulen cuɛi-cuɛi le.

²Kɛ paale pum, Helii va o lɔan nɛɛ ndɔa lɔlaa, o ve lɛ cɔ lapi le.

³Samiɛl bɛɛ va o lɔan, o Cɛi-Mɛlɛka-o nin, o kesu kpema Hala-o ikɛi. Fitina Hala-o ndóò ɲum-ndɔ le.

⁴Mí Mɛlɛka veelu Samiɛl. Mí Samiɛl cɛl aa: «Yoo!»

⁵Mó ɲaanun nɛɛ Helii va-a, mó kɔ dimul ndu aa: «I hin veelu n veelu ya-o.» Mí Helii mulul ndu aa: «I veelu nɔm te dɛ! Muungu mà kɔ hini.» Mí Samiɛl muungu, mó kɔ hini.

⁶Mí Mɛlɛka veelu ndu vɛlɛ veelu diinndɔɔ aa: «Samiɛl!» Mí Samiɛl kɔa vɛlɛ nɛɛ Helii va-a, mó dimul ndu aa: «I hin veelu n veelu ya-o.» Mí Helii mulul ndu aa: «I veelu nɔm te, ponndo! Muungu mà kɔ hini.»

⁷Háá o telen kon, Samiɛl ndóò sina vɔ Mɛlɛka le, kani Mɛlɛka ndóò cɔmnun ndɔ ndu paandu le.

⁸Mí Mɛlɛka veelu vɛlɛ Samiɛl o bɛmbɛ yàándɔɔ aa: «Samiɛl!» Mí Samiɛl can mó kɔa nɛɛ Helii va-a, mó kɔ dimul ndu aa: «I hin veelu n veelu ya-o!» O kon, mí Helii sina dɔ́ɔ́ maa Mɛlɛka va poombɔɔ veeloo ni.

⁹Mí Helii dimul Samiɛl aa: «Muungu mà kɔ hini. Tàà veelu nɔm nihau pɛ, a muli aa: ‹Soo Mɛlɛka, vana nɔm baalaa co nɔm lani.›» O kon kɔɔli, mí Samiɛl muungu o fonda ndɔ hinia, mó kɔ hini.

¹⁰Mí Mɛlɛka hun sim vɛlɛ o fonda pilɛ kon, mó veelu aa: «Samiɛl! Samiɛl!» Mí Samiɛl muli aa: «Soo, vana nɔm baalaa co nɔm lani.»

¹¹Mí Mɛlɛka dimul Samiɛl aa: «I co hunɔɔ dɛnɛ tosa Israɛl, vana-vana tuei ndu pɛ, nilan la baŋul ndu.

¹²Paale len, i tosanin ɲɛ yáà tuu le Helii nda yungu ndɔɔ tuisio coo-o, i mɛinin ɲɛ-ɲɛ le.

¹³Mí yáà dimul Helii maa i co yungu ndɔɔ dɛnɛ palaa tuisi coo le lɔ́ɔ́-lɔ́ɔ̀ le dɛnɛ ndɔ vɔɔndo. Kani o va sinaa mí poaa ndɔa va dɛnnda vɔɔnndan tosaa, o kpee nda le.

¹⁴Lelan ya mɛnalan yungu Helii-o ni maa a soli nin bɛɛ sálàlan, te kon te a yɔngu nin bɛɛ ya ɲɛm-kéan, ɲɛ-ɲɛ vɔɔsu lɛnin haki ndaa le few.»

¹⁵Mí Samiɛl lo ihini háá idiiyo. O kon, mó kɔ kumbi diola Cɛi-Mɛlɛka-o. Mí siòònde bii ndu le Helii vundule o ce len dimullo.

¹⁶Kɛ mí Helii veelu ndu aa: «Samiɛl po ni!» Mó cɛl aa: «Yoo!»

¹⁷Mí Helii ɲuna ndu aa: «Sɔɛi yɛɛ nɛ Mɛlɛka dimul-lɛ nɔm? Vin ya ɲɛ-ɲɛ le. Hali diomnden lepilɛ n kɛɛ le ya dimullo ni, màá Hala tuisi sanga hiow sangalan kpow-vo nɔm coo, mò dɔw nɔm yɛɛvɛ!»

¹⁸Le hee, mí Samiɛl dimul ndu sɔɔn mun kpow, o vin ndu ikɛ́-kɛ̀ le. Mí Helii dimi aa: «Ndu co Mɛlɛka ni, màá o tosa hɛnan ndɔɔ!»

¹⁹Mɛɛ Samiɛl va sulɔɔ yɛ, lende koni Mɛlɛka va ndu ikɛi ni. Lelan sɔɔn o va dimio-on kpow n va peelɔnndo ni.

²⁰Kon tosa ni mí Israɛlla kpow, kandɔɔ Dan kɔlan tiiyaa háá Bɛɛr-Seba, a sina lekɛ́ndɛi maa vana-tɛɛngaa-diom Hala-o Mɛlɛka siinguu Samiɛl ni.

²¹Mí Mɛlɛka hiaw laci a cɔmnɔnndo Silo, kani lon ndóò cɔmnun Samiɛl o sɔɛi ndɔɛi nin ni.