Read Kissi 1Samiɛl 31 Bible Online

1Samiɛl 31 - Kissi bible

1Samiɛl 31

¹Mí Filistia del Israɛlla coo a cɔwvo. Mí Israɛlla ɲaanun, mí vannda taw vu nda tɛɛn o pembei Kilboa.

²Mí Filistia kɔ tiila Saul nda poaa ndɔa. Má dii Yonatan, Abinadab a Malkisua. Nda kpow poaa masaa Saul-la nda va ni.

³Mí cɔwvo kiandu Saul coo taw. Mɛɛ vanaa vuaa n'kɔɔ-a ce ndu, mó ɲiiya nákà-nàkà,

⁴mó dimul vana ndɔ cuaa ɲɛm cɔwvo aa: «Cua mɔɛi nɔmii cɔwve mà dii ya, kani i yeema mi Filistia dii haa tooma le-a dii ya le.» Kɛ mí vana ndɔ cuaa ɲɛm cɔwvo kɛɛ, kani siòònde va ndu taw. O kon mí Saul pila cua mɔɛi ndɔɛi cɔwve, mó del lecoo.

⁵Tuma vana ndɔ cuaa ɲɛm cɔwvo ce maa Saul vi-o, mí ndu bɛɛ del o mɔɛi ndɔɛi cɔwve coo, mó vu nda ndu latulu.

⁶Nuaa Saul nda poaa ndɔa yáá-a, vana ndɔ cuaa ɲɛm cɔwvo a vanaa ndɔa cɔwva sɔla piɔ́mndo o lepilɔɔ paale len ni.

⁷Israɛlaa va o bóllo leeloo-a a á va Yurdɛn leeloo-a cɔu maa vanaa cɔvaa Israɛlla ɲaanun, maa Saul nda poaa ndɔa sɔla piɔ́mndo, má mal kobila ndalan, má ɲaanun, mí Filistia kɔ cal lon.

⁸Diimandɔɔ, telen Filistia hin le vanvílɛ́iya yaasiaa le ɲɔɔn cɔwviaa-o, má komal Saul nda poaa ndɔa a vílɛ́iya o pembei Kilboa coo.

⁹Má kialu Saul bollen, má cua ɲɛm ndɔn cɔwvon, má balu a mun o lɛŋnde ndalen nin kpede, haliko mi yoongu kon ndóò sɛŋin o máánnda piɔmaa ndaa nin a vannda kpow tɛɛn.

¹⁰O kon kɔɔli, má kɛsi ɲɛm cɔvun Saul-lon o máán piɔmndo Astartee nin, má kɔ landu ndu Saul o vílɛ́iyo o kpakio Bɛt-Sean.

¹¹Mɛɛ vanaa va Yabɛs o tàndá Kalaad-o nin-nda tuei mɔnɛ Filistia soli a Saul-lo,

¹²mí vanpiaandua vesa hɔltan-nda bii nɛiyo, má lɔl kɔlan pii, háá má tiiya Bɛt-Sean. Má kɔ tiimbuu Saul a poaa ndɔa a vílɛ́iya o kpaki kobio, má muungu a nda Yabɛs, má kɔ loam nda.

¹³Má cua paala ndalan, má kumbu lan Yabɛs o yɔm tamarii va lon-ndo bɛngu. O kon má bii sumndo palɛi ndii ŋɔmmɛw.