Read Kissi 1Samiɛl 6 Bible Online

1Samiɛl 6 - Kissi bible

1Samiɛl 6

¹Paangon mún ŋɔmmɛw kesu kpema Mɛlɛka-o va o lɛŋnde Filistia nin.

²O mɛɛlulan, mí Filistia ɲuna vanaa-solia-lasálàá a vanaa viamaa yavaa aa: «Vɛ̀ɛ̀ naa n tosa yɛ kpeekpei le kesu kpema Mɛlɛka-o ho? La cɔm naa mɛɛ naa n bɛnda le ndu mingio o fonda ndɔɔ yɛ.»

³Má muli aa: «Te la yeema pɛ le kesu kpema Hala Israɛlla ho mingio, la míngì ndu fondo lende le. Mɛɛ mì la solul ndu fɔlɔn sálà bɛɛndiaa isɔɔ. O kon la siangunin mì la sina kɔlɔ Hala va niaa sangala bɛndulan ndan tuisio coo-o.»

⁴Mí Filistia ɲuna aa: «Sálà bɛɛndiaa isɔɔ súú yɛɛ naa n solul-lɛnin ndu?» Má muli aa: «La tuuliaa hindɔɔla ipawlan tan ŋuɛɛnu a sianion mì la tuuliaa vɛlɛ bɛlla nda ŋuɛɛnu a sianion mɛɛ simlacia Filistia co nda ŋuɛɛnu yɛ, mì la soli ɲɛm mun sálàá. Kani sanga pilɔɔ kpé niaa sɔla nia simlacia niaa latulu ni.

⁵Lelan, la tuuliaa hindɔɔla ipawla niaala lan mì la tuuliaa vɛlɛ bɛlaa co kan lɛŋnde niaalen tɛɛmbuuo-a, o kon mì la biilu Hala Israɛlla. Bɔɔle mò faŋa niaa pila, piɔmaa niaa a lɛŋnde niaalen kpede sangaa coo!

⁶La kíndì nilan maa mɛɛ masaa Esipte nda Esiptea tɔ̀a tosa yɛ le dɛ! Vɛ̀ɛ̀ la loonun pá ɲɛ Hala tosal nda lɔ́ɔ́ pá má mal Israɛlla kɔlan-ndo?

⁷Lelan la bɛɛndiaa niko ɲɛ ɲaanan soa nan-ndo, o sɛnɛiyo, mì la bii navaa komsaa nda ŋiɔn, a nda yii-yɔ yɔm lebol o lebol te-a, mì la baa nda ɲɛ ɲaanan soa nan-ndo, kɛ mì la mingi cuavaa ndaa co nda kɔɔli-a o hèéo nin.

⁸Mì la cua kesu kpema Mɛlɛka-o, mì la kɛsi ndu o ɲɛ ɲaanan soa nan kon-ndo coo, mì la cua vɛlɛ ɲɛm niaa toosiaa a sianion le Hala keo le ndu sálàá solullo a mun-ndon, mì la vow mun o kesu pɔmbɔɔ nin, mì la kɛsi mun o kesoo ikɛi. La tosa pɛ lende, la mal nda kɔlan.

⁹O kon la mɛɛndan, te nawva bii pɛ nɛiyo le kɔlan o lɛŋnde Israɛlla nin, mà kei a Bɛt-Siemɛs, mɛɛ kon co dimio ni maa Hala Israɛlla lekɛ́ndɛi va naa sangaa ho tuisio coo ni. Kɛ te navaa kalaa bii nɛi kon te, n sina dɔ́ɔ́ maa o co ndu le tuisi naa sangalan ndan coo le, maa nɛɛ celen la cɛn ni mí la toal naa coo.»

¹⁰Mí Filistia tosa mɛɛ nda sila nda yɛ. Má bii navaa komsaa nda ŋiɔn, má baa nda ɲɛla ɲaanannda soa nan-ndan, má mingi cuavaa ndaa kinda o hèéo nin.

¹¹Má cua kesu Mɛlɛka-o a kesu pɔmbɔ bɛlaa n'siania a tuuliaala n'sianila va tɔɔmasele hindɔɔla ipawláà fula nda lan-ndo la va nin-ndo, má heelu o ɲɛ ɲaanan soa nan-ndo coo.

¹²Ndáà malɔɔ dɔ́ɔ́ nawva, má bii nɛi Bɛt-Siemɛs-o sanaa. Má va kɔlan nɛi kon kɔɔli a caŋndo taw-taw, a sei o ba kɛndɛ coo le a sei o ba mɛl coo le. Mí simlacia Filistia kɔa ɲɛ ɲaanan soa nan-ndo kɔɔli háá tiiyaa o pɛɛngulan a Bɛt-Siemɛs.

¹³Vannda Bɛt-Siemɛs va maalon kovɔɔ o dɛɛlaa nin. Mɛɛ nda ce kesu kpemaa hunɔɔ, má dɔawnun ɲaale taw.

¹⁴Mí ɲɛ ɲaanan soa nan kon-ndo tiiya o Yosue fula Bɛt-Siemɛs-o lo panga, mó sim o pow bɛndoo ikɛi lon. Má kilikili yɔmii ɲɛ ɲaanan kon, má soli navaa kan sálà loamaa le Mɛlɛka.

¹⁵Mí leviia soli kesu kpema Mɛlɛka-o a kesu pɔmbɔ ɲɛm nda toosiaa a sianion-ndon va nin-ndo o ɲɛ ɲaanan soa nan-ndo nin, má kɛsi ɲɛm mun kpow o pow bɛndoo coo. O paale pilɛle len nin, mí vannda Bɛt-Siemɛs solul Mɛlɛka sálàla loamaalan a sálàla kɔlɲululan.

¹⁶Paale pilɛle len, simlacia ŋuɛɛnua Filistia ciiyo dɛnnda lan mɛɛndanndo kpow, má muungu Ekrɔn.

¹⁷Tuuliaala n'sianila va tɔɔmasele hindɔɔla ipawla Filistia solul Mɛlɛka sálà bɛɛndiaa isɔɔ lan la va lan ni: o pilɛ va le kobio Asdɔd, o pilɛ le Kaasa, o pilɛ le Askelɔn, o pilɛ le Kat, o pilɔɔ le Ekrɔn.

¹⁸Bɛlaa n'siania yɛ, mí ndáà va kpafii mɛɛ kobila simlacia ŋuɛɛnua Filistia kan ndáà nɔ o ba bɛngulan la va yɛ, kandɔɔ a kobi bɛndoo, keiyo a cieon nɔ kpaki loon, kɔlan tiiyaa o pow bɛndu ndáà kɛsi kon kesu kpema Mɛlɛka-o coo-o, o Yosue fula Bɛt-Siemɛs-o lo panga pɛɛn. Pow kon co vɔ lon háá paalen nden.

¹⁹Mí Mɛlɛka tuisi vannda Bɛt-Siemɛs dɛnɛ palaa coo le tofa nda tofa o kesu kpemaa nin-ndo. Mó diw n'van belaŋɔmmɛw o vanaa vaala beleŋuɛɛnua coo. Mí a lo yoomu-a lo a mɔnɛi le dɛnɛ palaa bɛndu Mɛlɛka tuisi nda kon coo-o.

²⁰O kon kɔɔli, má dimi aa: «Nɛ̀ɛ́ nɔla yɛnin lou yoomu Mɛlɛka o hɔl, Hala Diandaa ho pɛɛn? Kuɛɛ nɛ kpeekpei naa n co yɛ kesu ndɔ kpemaa ho yɔɔ mò faŋan nin naa nanu?»

²¹Má yaa kiilaa Kiriat-Yearim, má kɔ dimul vannda lon aa: «Filistia cii kesu kpema Mɛlɛka-o mingi. La hun cua, mì la kɔɛ a ndu o niaa lo.»