Read Kissi 1Samiɛl 8 Bible Online

1Samiɛl 8 - Kissi bible

1Samiɛl 8

¹Lɔ́ɔ́ Samiɛl yuuva-o, mó simi poaa ndɔa Israɛlla laci.

²Po ndɔ tasoo va Yɔɛl ni, po ndɔ diinndɔɔ va Abiya ni. Nda va vanaa kialaa n'yamaa Bɛɛr-Seba ni.

³Kɛ poaa ndɔa kan ve tosa mɛɛ fuɲa nda va tosaa yɛ le. Nda nda, volion ndáà luɛi hɔlten ni, má va ɲɛm vannda va nda yɔngoo-on biyɔɔ le yaman lacòòvan kiolɔɔ.

⁴Mí kaasoŋaa kɔlkalua Israɛl kpow a cuungian, má komal Samiɛl Rama,

⁵má kɔ dimul ndu aa: «Tofa vɔ mɛɛ n yuuva nin yɛ. Nduyɛ, poaa nɔmnda có dɛnndan tosa mɛɛ n va tosaa yɛ le. Lelan hɛli vanndo mì ndu va masaa naa coo maa mɛɛ vanaa-mangalaa-isɔaa kpow a nɔ masaa yɛ.»

⁶Mí Samiɛl tambu kɔl taw le yiyan ndóò del nda kon le masaa ɲunaa-o. Mó piɛi Mɛlɛka.

⁷Mí Mɛlɛka mulul Samiɛl aa: «Ɲɛ-ɲɛ Israɛlla ɲuna pɛ nɔm, yaŋ nda nilan, ma cɛl nda diom. Sina pɛngu maa o co nɔm te nda kɛɛ le, ya pila nda kɛɛ nuaa ni. A yeema lɛ mì va masa nda coo le.

⁸Kabi paale ya soli nda Esipte len, háá paalen nden hau, a co ya kɛɔ tuŋ ma va mulinndo halaa celen biiloo. Mɛɛ nda tosal nɔm nuaa yɛ koni nda dema ya tosal ni.

⁹Lelan cɛl nda diom. Kɛ nduyɛ, yondal nda vakpa, mà cɔm nda ɲɛ masa hun vanin kon nda coo-o bɛnda le sɔlaa nda o ba-o.»

¹⁰Mí Samiɛl tɛɛngul vanaa ɲuna ndu kan le masaa sɔlaa-a sɔɔn Mɛlɛka-on kpow.

¹¹Mó dimul nda aa: «Ɲɛ vana vanin niaa masaa coo-o tosanin-ndo vanin hoo ni: o hɛlinin vanaa cɔwva o poaa niaa tɛɛn le cɔwvo tosaa o ɲɛla ɲaanannda ndɔla soa nan-ndan coo. A tiŋ vanin le ɲaanɔnndo o soa ndɔa coo, a pum yɛ, le vaa ɲaanɔnndo ɲɛ ndɔ ɲaanan soa nan-ndo laci.

¹²A pum vanin bolle vanaa cɔwva vàá pilɛ, a pum yɛ nda vanin bolle vanaa cɔwva beleŋuɛɛnu. O cuanin a pum le ciɛɔn ndɔn vaa a le tɔlɔɔla ndɔlan kiɔndɔɔ. A tiŋ le ndu ɲɛm cɔwvon cowvo a le ndu ɲɛla ɲaanannda soa nan-ndan cowvo.

¹³O cuanin vɛlɛ cuavaa niaa laandua le ndu cuɛima cun kɛndɛan toosiallo, le vaa vanaa ndɔa yavaa a le vaa vanaa ndɔa loamaa bulua.

¹⁴O poondiaanin niaa ciɛɔn niaan kɛndɔn o laba, mò hɛlu nakɔla niaala kɛndɛla n'rɛsɛnndan a nakɔla niaala kɛndɛla olivieelan, mò yɔngu vanaa bɛndua vanin ndu o ba bɛngu-a lan.

¹⁵O cuanin o-tɔ́ndɔɔ o nakɔla niaala n'rɛsɛnndan coo a o ciɛɔn niaan coo, mò yɔngu cuavaa baalaa lelɛŋnda a vanaa bɛndua vanin ndu o ba bɛngu-a ɲɛm mun.

¹⁶O cuanin buɛyaa niaa piaandua a à laandua, mò cua langbaa felengia niaa a sofɛlɛa niaa le baalala ndɔlan tosaa.

¹⁷O cuanin o-tɔ́ndɔɔ o saa niaa a o cuinaa niaa coo. Niaa pila bɛɛ, mɛɛlulan sɔngɔ cɛa ndɔa koni niaa vanin ni.

¹⁸O kon paale vanin, mì la koŋul le sei masa niaa hɛlinin kon-ndo biyɔɔ o Mɛlɛka lo. Kɛ Mɛlɛka vowlulnin niaa sondo le.»

¹⁹Israɛlla yeŋ bɛɛ sɔɔn Samiɛl dimul nda mún-ndon lani le, má dimul ndu aa: «N'posi! Halikpe naa n sɔlá masaa mɛɛ naa n dimi yɛ sii.

²⁰Naa bɛɛ n yeema mì n va vɔ nin maa vanaa-mangalaa-isɔɔa kpow. N yeema mi n nɔ masaa le yaman kiolɔɔ naa tɛɛn, mò sim vanaa naa cɔwva laci le kɔlan o cɔwvo naa ndaa latulu.»

²¹Mí Samiɛl yaŋnun sɔɔn Israɛlla va dimio-on kpow, mó kɔ downun Mɛlɛka kona.

²²Mí Mɛlɛka mulul Samiɛl aa: «Cɛl vannda ha diom sei! Ke nda masaa.» O kon kɔɔli, mí Samiɛl dimul vanpiaandua Israɛlla aa: «Niaa kpow, vana-vana muungu o ndu lo ciee.»