Read Kivunjo New Testament 1999 Matayo 1 Bible Online

Matayo 1 - Kivunjo New Testament 1999 bible

Matayo 1

¹Iga nyigo marina ga waku wa Yesu Kristo awei o kyishari kya Dawidi na Abrahamu.

²Abrahamu nalefee Isakyi, Isakyi kafee Yakobo; Yakobo kafee Yuda na wana wa wamae.

³Yuda kafee Peresi na Sera ipfo ko Tamari; Peresi kafee Esiromu; Esiromu kafee Aramu.

⁴Aramu kafee Aminadabu; Aminadabu kafee Nashon, Nashon kafee Salyimone.

⁵Salyimone kafee Boasi ko Rahabu; Boasi kafee Obedi ko Ruti, Obedi kafee Yese.

⁶Yese kafee Mangyi Dawidi. Dawidi kafee Solomon ko mka ulya o Uria.

⁷Solomon kafee Rehoboamu; Rehoboamu kafee Abiya; Abiya kafee Asa.

⁸Asa kafee Yoshafati; Yoshafati kafee Yoramu; Yoramu kafee Usia.

⁹Usia kafee Yotamu; Yotamu kafee Ahasi; Ahasi kafee Esekyia.

¹⁰Esekyia kafee Manase; Manase kafee Amon; Amon kafee Yosia.

¹¹Yosia kafee Yekonia na wana wa wamae, kyiyeri kya wana wa Isiraelyi waleṙoo wusingyenyi kulya Babelyi.

¹²Na numa ya wusamiṟo wulya wo Babelyi, Yekonia kafee Shealyitielyi; Shealyitielyi kafee Serubabelyi.

¹³Serubabelyi kafee Abihudi; Abihudi kafee Elyiakyimu; Elyiakyimu kafee Asori.

¹⁴Asori kafee Sadokyi; Sadokyi kafee Akyimu; Akyimu kafee Elyiudi.

¹⁵Elyiudi kafee Elyieseri; Elyieseri kafee Matani; Matani kafee Yakobo.

¹⁶Yakobo kafee Yosefu mii o Maria alefee Yesu elago Kristo.

¹⁷Koikyo marika goose wookyia Abrahamu mṟasa Dawidi nyi ikumi na gaana. Na wookyia Dawidi mṟasa kyiyeri wana wa Isiraelyi waleṙoo wusingyenyi kulya Babelyi nyi marika ikumi na gaana. Na wookyia wusamiṟo wo Babelyi mṟasa Kristo nyi marika ikumi na gaana.

¹⁸Yesu Kristo nalefeo kuṙi. Maria wamae kyiyeri aweṙuṙo nyi Yosefu, walandekooyane kyimmbiu nalewono ai mlemo kui wuiṙimi wo Mumuyo Mweele.

¹⁹Na Yosefu, mii okye, kyipfa kya ilyi-indi awekyeri mndu msumganyi alakunde imsutsa, kaṙumbuo imṙa kui kyiṟika.

²⁰Kyasia-ng'u kyiyeri awekusaṟa isho, malaika o Mndumii kamchia ndoṙonyi, echigamba, “Yosefu, mana o Dawidi, ulaowuoe iṙuo Maria mka opfo, kyipfa ikyo kyikyimooge kokye nyi kui wuiṙimi wo Mumuyo Mweele.

²¹Na oe nechienengo mana o womi, na iyoe nochimlaga Yesu, kyipfa, nyi oe echiwuta wandu wakye ngyuunyamaṟi tsawo.

²²Isho shoose shaṟundika kundu kyiafukyie kyindo kyileṙeṙo nyi Mndumii kui ndumo ya moonguo shisuku echigamba,

²³‘Ambuya, mana mkyega nechiira mana, na oe nechienengo mana o womi; nawo wechimlaga Imanuelyi; ikyo nyi kyimwi na igamba, Ruwa hamwi na soe.’ ”

²⁴Na Yosefu lyilya aleamka iwuka maṙoenyi, nalewuta chandu malaika o Mndumii alemmbia. Kaṙuo mka okye;

²⁵alakooyane na oe kyimmbiu maa lyimwi, mṟasa kyiyeri aleenengo mana okye; kamlaga Yesu.