Read Kivunjo New Testament 1999 Matayo 10 Bible Online

Matayo 10 - Kivunjo New Testament 1999 bible

Matayo 10

¹Kalaga wanalosho wakye ikumi na wawi, kawaenenga pfinya yechilyia waṟufui wawicho, wawawute, na iwuta ndoṟe tsoose na wufafa wo orio mbaṟe.

²Na marina ga wasu-wo ikumi na wawi nyi iga. O kuwooka nyi Simion awekyelago Petiro, na Anderea mono-wamae; Yakobo o Sebedayo, na Yohane mono-wamae.

³Filyipo, na Baritolomayo, Tomasi, na Matayo msani o ukamba; Yakobo mana o Alyifayo, na Tadayo.

⁴Simion Mkananayo, na Yuda Isikariote, na oe nyi oe alemṟiinga.

⁵Iwo ikumi na wawi Yesu nalewaṙuma, kawawia, “Ko walya walakyeri Wayuda mulayende, maa mulaiṙe na mṟinyi maa umwi o Wasamaria.

⁶Nanga moyenda ko wandu wa Isiraelyi waṙekyie cha moondo.

⁷Na ilyi moyenda, onguonyi mbonyi ngyicha, mochigamba, ‘Wumangyi wo Ruwewu womtikyira kufuhi.’

⁸Kyiṟenyi waluoe, ṟutsenyi wapfu, yeṟemtsenyi wawoṙo nyi taambo, wutenyi waṟufui wawicho; muleenengo mulaitaa kyindo, enengyienyi mulaitoo kyindo.

⁹Mulakuṙikye sahapu, maa heleri tsa orio mbaṟe mkunjenyi yanyu.

¹⁰Maa mkunja o kyaro, maa mawale gawi, maa shiaṙu, maa upoi; kyipfa mṟundi nawaṟi kyelya kyakye.

¹¹Na orio mṟi na kyikaṟo mochiiṙa napfo, pfulenyi pfo mndu awoṙe kyienengo kyeambilyia wayenu; mkae kokye mṟasa ilyi mochiwuya na kanyi.

¹²Na nyoe mukoiṙa na kanyi ko mndu-cho muiṟikyiṟenyi.

¹³Na kokooya mndu-cho na walya wa kanyi kokye wawaṟi, ufoṟo lo Mndumii lukae nawo; indi kokooya walawaṟi, ufoṟo lo Mndumii lummbiyilyie nyoe.

¹⁴Na mndu alandemuambilyie na iaṙanyia maṙeṙo ganyu, ilyi mowuka ipfo kokye, ang'u ipfo mṟinyi, kute-kutenyi kyilulyi ipfo maṙendenyi ganyu, iloṟa mowalega nakamwi.

¹⁵Ny'kyaloi, ngammbia, kyechiwa kyaangu uruka lo Sodoma na Gomora ihooṟio maṙeko mfiri ulya o ianduyo kuta mṟi-cho.”

¹⁶“Inyi ngyimṙuma cha moondo ko shisii. Kyasia waṙenyi wuṟango cha njoka, na iwa wahoo cha mbuna.

¹⁷Kuṟiisenyi na wandu cha kyipfa wechimṙuo mengyenyi, na masinagoginyi gawo wechimkapa.

¹⁸Na nyoe wechimṙuo mbele ya wachilyi na wamangyi kyipfa kyako, iwa wuṟingyishi kowo na ko walya walai Wayuda.

¹⁹Kyaindi iho-ndu wechimṙuo, mulakusaṟe-saṟe chandu mochiṙeṙa; kyipfa mochienengo saa-yo shilya mochiṙeṙa.

²⁰Kyipfa chi nyoe muiṙeṙa-pfo, indi nyi Mumuyo o Awu-yonyu aiṙeṙa kui maṙumbu ganyu.

²¹Na mongari nechiṟiingyia mono-wamae kundu nawoogo, na awu nechiṟiingyia mana, na wana wechigaluka na iwaaga wafee wawo.

²²Na nyoe wandu woose wechimsuo kyipfa kya rina lyako; kyaindi ulya echikarishia mṟasa mafurumionyi nyi oe echikyia.

²³Kyaindi ilyi wechimfuna mṟinyi umwi, ṙichilyienyi mṟinyi ungyi. Cha kyipfa nyi loi ngammbia mochimarisa ionguo mbonyi mṟinyi ya Isiraelyi Mono-Adamu alacha-pfo.

²⁴Manalosho ekyeiṙa mlosha okye-pfo, na kyisinga kyekyeiṙa mndumii okyo-pfo.

²⁵Kyishikyie manalosho iwa cha mlosha okye, na kyisinga iwa cha mndumii okyo. Kokooya walelaga monyi kanyi Beelyisebulyi ngyesa chi ngoseṟa walya wai wa kanyi kokye-pfoe?”

²⁶“Kyasia, mulawaowuoe, cha kyipfa kuwoṙe kyindo kyikyishikyie maa kyikuṟiikyie kyilechimanyika-pfo.

²⁷Kyilya ngyimmbia nyoe meemenyi, kyigambenyi saenyi. Na kyilya moicho kui kyiṟika, kyionguonyi na pata.

²⁸Mulaowuoe iwo waiwaaga mmbiu, walaiṙime iwaaga na mrima. Nanga moowuo ulya echiiṙima irumatsa mmbiu na mrima taa ngyehenenyi.

²⁹Ngyesa, shileye shiwi shekyekumbo helo imwi-pfoe? Kyaindi maa kyimwi kyekyeṙeka Awu-yonyu alaichi-pfo.

³⁰Kyaindi nyoe maa njui tsa mṙoe yanyu tsingyitale tsoose.

³¹Kyasia mulaowuoe, nanga nyoe kuta shileye shifoi.”

³²“Kyasia, orio mndu echingyiṟingyishia mbele ya wandu, na inyi ngyechimṟingyishia mbele ya Awu-yoko akyeri

³³Kyaindi orio mndu echingyikana mbele ya wandu, na inyi ngyechimkana mbele ya Awu-yoko akyeri ruwewu.”

³⁴“Mulakusaṟe ngyilecha iende ufoṟo wuyanenyi. Ote! Ngyilecha iende ufoṟo-pfo, indi ushu.

³⁵Cha kyipfa ngyilecha iṟiingyia mndu na awuye, na mono-waka na wamae, na mndu na mamii okye.

³⁶Na washituwa wa mndu nyi walya wa kanyi kokye.

³⁷Akundi awuye ang'u wamae kuta inyi, angyiwaṟi-pfo, maa akundi mono-kyisoṟo ang'u mono-kyika kuta inyi, angyiwaṟi-pfo.

³⁸Maa mndu alechikuṙika msalaba okye kangyiosha, angyiwaṟi-pfo.

³⁹Mokyiṟa moo okye nechiuṙetsa; na mouṙetsa kyipfa kyako nechiukyiṟa.”

⁴⁰“Amuambilyia nyoe nangyiambilyia inyi, na oe angyiambilyia inyi, naambilyia ulya alengyiṙuma.

⁴¹Moambilyia moonguo shisuku kyipfa oe nyi moonguo shisuku nawaṙilyia wori wo ionguo shisuku; na oe echiambilyia mndu msumganyi kyipfa oe nyi mndu msumganyi, nechiwaṙilyia wori wo mndu msumganyi.

⁴²Na orio mndu echirutsa umwi o iwa watutu mṟinga uichololyia, kyipfa nyi manalosho, ny'kyaloi, ngammbia, wori wokye wochiṙeka maa ale-pfo.”