Read Kivunjo New Testament 1999 Matayo 15 Bible Online

Matayo 15 - Kivunjo New Testament 1999 bible

Matayo 15

¹Naaho-ng'u Mafarisayo na walosha wa mawawaso wawukyie Yerusalemu waleyenda ko Yesu wechigamba,

²“Ny'kyilyi wanalosho wapfo wainyamaṟa shilya shileambilyio ko waku waṙu? Cha kyipfa wekyesamba mawoko ilyi wailya-pfo.”

³Kagaluo, kawawia, “Ny'kyi kyitewe na nyoe mokyenyamaṟa iwawaso lya Ruwa kyipfa kya shilya muleambilyia ko waku wanyu?

⁴Cha kyipfa Ruwa nalegamba, ‘India awuyo na womoo,’ na ‘Alahia awuye ang'u wamae ipfa napfe.’

⁵Kyaindi nyoe mokyegamba, ‘Echiwia awuye ang'u wamae, ikyo kyoose kyikuwaṟi inyi ngyikutarame nyi kyiṙaso,’

⁶kyasia alaindie awuye ang'u wamae. Mukoilacha ṙeṙo lya Ruwa kyipfa kya shilya muleambilyia ko waku wanyu.

⁷Nyoe wakulembecheṟi, nyi necha chandu Yesaya aleonguo shisuku kyipfa kya mbonyi tsanyu, echigamba,

⁸‘Wandu-wa wekyengyiindia kui maṙumbu; kyaindi mrima yawo ikyeri kuleshi na inyi.

⁹Nawo wekyengyiana na ingyiterewa kya maai, wechilosha malosho gakyeri mawawaso ga wandu.’ ”

¹⁰Kalaga wuingyi wo wandu, kawawia.

¹¹“Aṙanyienyi, mumanye. Kyekyefanyiṟa mndu kyimṟumoe chi kyilya kyekyeiṙa na ṙumbunyi-pfo. Indi kyilya kyekyewuka ṙumbunyi ny'kyo kyekyefanyiṟa mndu.”

¹²Naaho-ng'u wanalosho wakye waleyenda kokye wakammbia, “Uichi kye Mafarisayo kyiyeri waleicho ṙeṙo lyilya walewihiyo?”

¹³Kagaluo, kawawia, “Orio kyindo Awu-yoko o ruwewu alalekyiṙonga nechikyikuluo.

¹⁴Walekyenyi. Iwo nyi shipfupfuṟe wai wasongoru wa shipfupfuṟe. Na kyipfupfuṟe kyikasongoya kyipfupfuṟe oṙoe, sheoloka mkuwenyi shoose shishiwi.”

¹⁵Kyasia Petiro kagaluo, kammbia, “Lutambuluye mfano-chu.”

¹⁶Yesu kagamba, “Mṟasa wulalu maa nyoe muwoṙe wuṟango-pfoe?

¹⁷Mulandemanye kye orio kyindo kyekyeiṙa na ṙumbunyi kyekyeiṙa ndewunyi, kyikawiyitso choṟonyi?

¹⁸Kyaindi shekyewuka ṙumbunyi shawuka mrimenyi; nasho nyisho shekyefanyiṟa mndu kyimṟumoe.

¹⁹Cha kyipfa mrimenyi kokyewuka makusaṟo mawicho, uwaagi, wuṟui, wuiwi, wuṟingyishi wo wongo, na shilahio.

²⁰Igo nyigo gekyefanyiṟa mndu kyimṟumoe. Kyaindi ilya ulasamba mawoko kokyefanyiṟa mndu-pfo.”

²¹Yesu kawuka handu halya, kayenda mbai ura lo Tiro na Sidon.

²²Na mndu mka Mkananayo o ura lulya kacha, kakuilengakyika echigamba, “Ungyisaṟie, Mndumii, Mono-Dawidi; mana oko o waka nawoṙo kyetse nyi mṟufui mmbicho.”

²³Maa oe alemgaluo kyindo-pfo. Na wanalosho wakye wakayenda kokye wakamterewa, wechigamba, “Mlekye nayende; cha kyipfa naikalagatsa numa yaṙu.”

²⁴Kagaluo, kagamba, “Ngyileṙumo ko wandu wengyi sile ko wana wa Isiraelyi waṙekyie cha moondo-pfo.”

²⁵Na oe kacha kamwolokyia, echigamba, “Mndumii, ungyitarame.”

²⁶Kagaluo, kagamba, “Chi necha iwuta kyelya kya wana na iwiyitsia shite-pfo.”

²⁷Mndu mka ulya kagamba, “Yee, Mndumii. Kyaindi maa shite shekyelya matsugaṟo gekyeoloka mesenyi ko wandumii washo.”

²⁸Naaho-ng'u Yesu kagaluo kammbia, “Mama, iiṙikyia lyapfo nyi lying'anyi; na kyiwe kopfo chandu ukundi.” Mana ulya okye o kyika kachia cha ilyi.

²⁹Yesu kawuka handu halya, kashika mbai ya ipalyipalyi lya Galyilaya, kaṙooya fumvunyi, kaṙamia ho.

³⁰Wuingyi wufoi wo wandu wukoyenda kokye, wechimwendie shiwete, shipfupfuṟe, wai ndiṟi, wafiri shiwungo, na wengyi wafoi, wakawawikyia maṙendenyi gakye; kawakyiṟa;

³¹mṟasa wuingyi wulya wo wandu wakaṟiyio, kyiyeri walewona wai ndiṟi waiṙeṙa, wawoṙe shiwungo shifiri waichia, shiwete shichumia na shipfupfuṟe shiwona, wakang'anyisa Ruwa o Isiraelyi.

³²Yesu kalaga wanalosho wakye, kagamba, “Ngawoṙo nyi fowa mrimenyi kyipfa kya wuingyi-wu wo wandu, cha kyipfa wulalu nyi mfiri iṟaṟu wakyeri hamwi na inyi, maa wawoṙe kyindo kyelya-pfo. Ngoseṟa isamana nawo walalyiie kyindo ngyikundi-pfo, walacheoloka njienyi.”

³³Wanalosho wakye wakammbia, “Lowona kwi mkate ifoi iha nuka, mṟasa iigutsa wuingyi wung'anyi kuṙi?”

³⁴Yesu kawawia, “Muwoṙe mkate inga?” Wakagamba, “Mfungaaṙe, na shikunga shaangu.”

³⁵Kagamba wuingyi wo wandu wuṙamie wanda.

³⁶Kawaṙa mkate iya na shikunga shilya, kaana, kashifunja-funja, kaenengyia wanalosho wakye, nawo wanalosho wakaenenga wuingyi wo wandu.

³⁷Wakalya woose wakaiguṙa. Wakasania matsugaṟo ga shifunjoe sha mkate, mkunja mfungaaṙe, iichuo.

³⁸Nawo walelya wawekyeri wasoṟo shiku shiina, kulawoṙe waka na wana watutu.

³⁹Kasamana na wuingyi wo wandu, kaṙooya ngalawenyi, kayenda ngyuura tsa Makadan.