Read Kivunjo New Testament 1999 Matayo 16 Bible Online

Matayo 16 - Kivunjo New Testament 1999 bible

Matayo 16

¹Mafarisayo na Masadukayo wakacha na kokye, wakamwesha, wakamterewa nawaloṟe kyiṟingyishio kyiwukyie ruwewu.

²Kagaluo, kawawia, “Kukoila, mokyegamba, ‘Kochiwa mfiri mcha; cha kyipfa ruwewu ifanyi kyimaande.’

³Na ngamenyi, mokyegamba, ‘Inu kochiwaṙa shiwiṟi; cha kyipfa ruwewu ifanyi kyimaande; lyingyi-se kushimbi.’ Nyoe wakulembecheṟi, muichi imanya fana ya ruwewu, kyaindi, ngyesa, shiṟingyishio sha shiyeri-shi moiṙima ishimanya?

⁴Rika lyiwicho na lya wuṟui lyikundi kyiṟingyishio, maa lyechienengo kyiṟingyishio-pfo, sile kyiṟingyishio kya Yona.” Kalekana nawo, kayenda.

⁵Na wanalosho wakayenda mṟasa molyolya, wakawaṙima iṙuo mkate.

⁶Yesu kawawia, “Kushowenyi na chachu ya Mafarisayo na Masadukayo.”

⁷Wakagaluana wo wenyi ko wenyi, wechigamba, “Nyi kyipfa kya ilyi lulaende mkate.”

⁸Na Yesu kamanya, kawawia, “Ny'kyilyi muigaluana nyoe wenyi ko wenyi, nyoe wa iiṙikyia lyaangu? Nyi kyipfa nyoe mulawoṙe mkate?

⁹Maa mulandemanye maa mukumburie mkate iya itanu ko walya shiku shitaanu, na nyi mkunja inga mulesania-pfoe?

¹⁰Maa mkate iya mfungaaṙe ko walya shiku shiina, na nyi mkunja inga mulesania-pfoe?

¹¹Kyawa kuṙa mulalemanya kye chi kyipfa kya mkate ngyilemmbia-pfo? Kyaindi kushowenyi na chachu ya Mafarisayo na Masadukayo.”

¹²Naaho-ng'u walemanya kye alewawia ikuringa na chachu ya mkate, indi na malosho ga Mafarisayo na Masadukayo-pfo.

¹³Kyasia Yesu kayenda ngyuura tsa Kaisaria-Filyipi, kawesa wanalosho wakye, kagamba, “Wandu wekyegamba Mono-Adamu nyi wui?”

¹⁴Wakagamba, “Wengyi wekyegamba nui Yohane Mpatisi, wengyi Elyiya, wengyi Yeremia ang'u umwi o weonguo shisuku.”

¹⁵Kawawia, “Aa nyoe mokyegamba inyi nyi wui?”

¹⁶Simion Petiro kagaluo, kagamba, “Iyoe nyi oe Kristo, Mono-Ruwa ai na moo mlungana.”

¹⁷Yesu kagaluo, kammbia, “Agusu iyoe Simion Mono-Yona, cha kyipfa chi pfinya ang'u wuṟango wo kyimndu shakutambuluya ikyi-pfo; indi Awu-yoko akyeri ruwewu.

¹⁸Na inyi ngakuwia, iyoe nyi oe Petiro, na kyiyeri-kyo ngyechiwika Siṟi yako iyoe nyilyo iṟaṟa handu ngyechiiyekyia; maa pfinya tsa upfu tseiwinga-pfo.

¹⁹Na inyi ngyechikuenenga iyoe ngyuupfunguo tsa Wumangyi wo ruwewu na orio kyindo ochikyipfunga iha wuyanenyi, kyewa kyikyipfungye ruwewu; na orio kyindo ochikyipfunguo wuyanenyi, kyechiwa kyikyipfunguoe ruwewu.”

²⁰Naaho-ng'u kaima mnu wanalosho wakye walawie mndu oose kye oe nyi oe Kristo.

²¹Wookyia kyiyeri-kyo Yesu nalewooka iwia na pata wanalosho wakye kye kyimmbaṟi iyenda Yerusalemu na iambilyia matuuro gafoi iwuka ko wameeku wa mengye, na wang'anyi wa makohanyi, na walosha wa mawawaso, na iwoogo, na mfiri o kaṟaaṟu iṟuka.

²²Petiro kamṙuo mbai, kawooka imṙeṙia, echigamba, “Maa ale, Mndumii, isho shechikukooya-pfo.”

²³Kagaluka, kawia Petiro, “Wuka koko, Satana, nungyishingyia; kyipfa uikusaṟa shikyeri sha Ruwa-pfo, indi sha wandu.”

²⁴Kyiyeri-kyo Yesu nalewia wanalosho wakye, “Mndu oose kakunda ingyiosha, nakulege amonyi, nakuṙikye msalaba okye, nangyioshe.

²⁵Cha kyipfa mndu akundi ikyiṟa mrima okye, nechiuṙetsa; na mndu echiṙetsa mrima okye kyipfa kyako, nechiukyiṟa.

²⁶Kyipfa mndu nechiiria ho kyi kaenengo wuyana woose, na iṙetsa mrima okye? Ang'u mndu nechienengyia kyi handu ha mrima okye?

²⁷Cha kyipfa Mono-Adamu nechicha mng'anonyi o Awu-yokye hamwi na malaika wakye. Naaho-ng'u echitaa orio mndu iṙuana na mmbutie yakye.

²⁸Ny'kyaloi ngammbia, hawoṙe wandu kyiiṙi kya iwa wagoṟokyie iha, walechiwona upfu maa ale mṟasa kyiyeri wechiwona Mono-Adamu echicha Wumangyinyi wokye.”