Read Kivunjo New Testament 1999 Matayo 18 Bible Online

Matayo 18 - Kivunjo New Testament 1999 bible

Matayo 18

¹Kyiyeri kyilya wanalosho wakayenda ko Yesu, wechigamba,

²“Kyasia nyi wui-ng'u ai ang'anyi Wumangyinyi wo ruwewu?” Kalaga mana umwi mtutu, kammbikyia makyiṙi-gawi gawo,

³kagamba, “Ny'kyaloi, ngammbia, mulandegalukye na iwa cha shiwana shitutu, mochiiṙa maa ale na Wumangyinyi wo ruwewu-pfo.

⁴Kyasia, orio oose echikukyiwasha amonyi cha mana-chu, icho nyi oe ai ang'anyi Wumangyinyi wo ruwewu.

⁵Na orio oose echiambilyia mana umwi mfano o ichu kui rina lyako, nangyiambilyia inyi.”

⁶“Kyaindi echitewe umwi o iwa watutu wangyiiṙikyie, kyimmbaṟi napfungyio nzingonyi ikyesa na iwiyitso kyitsindenyi kya ipalyipalyi.

⁷Ochia nyi lo wuyana kyipfa kya shindo shetewe! Kyipfa shindo shetewe icha shechicha; kyaindi ochia lokye mndu ulya aende kyindo kyetewe!

⁸Kyasia kuwoko kopfo ang'u kuṙende kopfo kukokutewe; ṙumbuo kuwoko-ko ang'u kuṙende-ko uwiyitse kuleshi na iyoe. Nyi nanga iiṙa na moonyi o mlungana ulawoṙe kuwoko ang'u kuṙende, kuta iwaṙa mawoko gawi na maṙende gawi, na iwiyitso moṙonyi o mlungana.

⁹Na riso lyapfo lyikakutewe; lyikuluoe, ulyiwiyitse kuleshi na iyoe. Nyi nanga iiṙa na moonyi o mlungana uwoṙe riso lyimwi, kuta iwaṙa meso gawi na iwiyitso ngyehenenyi ya moṙo.”

¹⁰“Mulamine umwi o iwa watutu, cha kyipfa ngammbia kye malaika wawo ruwewu mfiri yoose wekyeambuya kyaam kya Awu-yoko akyeri ruwewu. [

¹¹Cha kyipfa Mono-Adamu nalecha iletsa kyiṙekyie.]

¹²Muwonyi muṙa? Mndu awoṙe moondo igana, lyimwi lyikaṙeka, ngyesa ekyeṙa galya makumi kyenda na kyenda, kayenda mafumvunyi, na ipfula lyilya lyaṙeka-pfoe?

¹³Na kaiṙima ilyiwona, ny'kyaloi, ngammbia, nekyechihiyo kyipfa kya ilyo ngoseṟa, kuta galya makumi kyenda na kyenda galaṙekyie.

¹⁴Na wuṙo kyilachihiṟie ushangunyi lo Awu-yonyu akyeri ruwewu kye umwi o iwa watutu naṙekye.”

¹⁵“Na mono-womoo kakuṙekyio, yenda umṙeṙie kya ṙeko lyakye, iyoe na oe tupu. Kakuaṙanyia, nowona mono-womoo.

¹⁶Ote, kokooya alaaṙanyia, ṙuo handu hamwi na iyoe mndu umwi ang'u wawi, kundu kui maṙumbu ga waṟingyishi wawi ang'u waṟaaṟu orio ṙeṙo lyimanyikye na pata.

¹⁷Na alandemuaṙanyie nyoe, wia siṟi; na alandeaṙanyie siṟi taa, na nawe kopfo cha mndu alaiṙikyie Ruwa na mosania ukamba.”

¹⁸“Ny'kyaloi, ngammbia, shoose mochishipfunga wuyanenyi shechiwa shishipfungye ruwewu; na shoose mochishipfunguo wuyanenyi shechiwa shishipfunguoe ruwewu.

¹⁹Lyingyi-se ngammbia, kyiyeri wawi wanyu wechisanza kyindonyi kyoose wechikyiterewa, wewutio nyi Awu-yoko akyeri ruwewu.

²⁰Cha kyipfa hai wawi waṟaaṟu wasanzie kui rina lyako, na inyi ngyikyeri iho makyiṙi-gawi gawo.”

²¹Numa ya iho Petiro kayenda kokye kammbia, “Mndumii, mono-wama oko nangyiṙekyio kyenga na inyi ngyimhooṟie? Nyi ka mfungaaṙe ngyesa?”

²²Yesu kammbia, “Ngyikuwia ka mfungaaṙe tupu-pfo, indi umhooṟie makumi mfungaaṙe, ka mfungaaṙe.

²³Kyipfa kya ikyo Wumangyi wo ruwewu wukyeri cha mangyi umwi alekunda isungusia matala na waṟundi wakye.

²⁴Kyiyeri alewooka iṟunda-lyo naleendio mndu umwi airiko sile ya talanta shiku ikumi.

²⁵Na oe kyiyeri aleuṟa kyetaa, mndumii okye kagamba nakumbo, oe na mka okye na wana wakye, na shindo shoose awoṙe, sile iya itoo.

²⁶Kyasia mṟundi ulya kaoloka, kamwindia echigamba, ‘Mndumii, ngyiweṙa, na inyi ngyechikutaa sile yoose taa.’

²⁷Mndumii o mṟundi ulya kammbonia wukyiwa kampfunguo, kamhooṟia sile iya.

²⁸Mṟundi ulya kafuma, kawona umwi o mbuya tsakye, awemmbesa dinari igana. Kamtirimisha, kammbaṙa maṟoo, echigamba, ‘Ngyitaa sile iya uriko.’

²⁹Kyasia mbuya iya oṙoe ikaoloka maṙendenyi gakye, ikamterewa, yechigamba, ‘Ngyiweṙa, na inyi ngyechikutaa sile yoose taa.’

³⁰Kyaindi alekunda-pfo. Kayenda, kammbiyitsa kyipfungonyi, mṟasa ilyi echitaa sile-yo.

³¹Kyasia kyiyeri mbuya tsakye tsilewona shilya shileṟundika, tsilewihiyo mnu mrimenyi, tsikayenda tsikaongoya Mndumii otso shoose shileṟundika.

³²Naaho-ng'u Mndumii okye kamlaga, kammbia, ‘Iyoe mṟundi mmbicho, ngyilekuhooṟia iyoe sile iya yoose, lyilya ulengyiterewa;

³³na iyoe, ngyesa kyiwekuwaṟi isaṟia mbuya yapfo, chandu inyi ngyilekusaṟia iyoe-pfoe?’

³⁴Mndumii okye kasuo, kamṙuo ko watuuri, mṟasa kyiyeri echitaa sile iya yoose.

³⁵Na wuṙo Awu-yoko a ruwewu echimmbutia nyoe, mulandehooṟie kui mrima yanyu orio mndu mono-wamae.”