Read Kivunjo New Testament 1999 Matayo 20 Bible Online

Matayo 20 - Kivunjo New Testament 1999 bible

Matayo 20

¹“Cha kyipfa Wumangyi wo ruwewu wufananyi na monyi kanyi, alefuma ngamenyi utuko indeṟeia waṙemi nawaṙuo ṙemenyi lyakye lya msabibu.

²Na oe ammarise iiṙikyiana woguru na waṙemi walya iwaenenga dinari ko mfiri umwi, nalewaṙuo kulya ṙemenyi lyakye.

³Kafuma kyiyeri kya saa tsiṟaaṟu tsa ngamenyi, kawona wengyi wagoṟokyi sangaṙa walawoṙe kyindo kyeṟunda.

⁴Na iwo kawawia, ‘Na nyoe yendenyi ṙemenyi lyako lya msabibu, na kyilya kyiwaṟi ngyechimuenenga.’ Wakayenda.

⁵Kafuma-se kyiyeri kya saa tsiṟandaaṟu na saa kyenda, kawuta wuṙo.

⁶Na kyiyeri kya saa kumi na imwi kafuma, kakooya wengyi wagoṟokyi, kawawia, ‘Ny'kyilyi mugoṟokyi iha kyingoto puti kulawoṙe maṟunda?’

⁷Wakammbia, ‘Ny'kyipfa kuwoṙe mndu aluṟeie iṟunda-pfo.’ Kawawia, ‘Na nyoe yendenyi ṙemenyi lyako lya msabibu.’

⁸Kyiyeri kuleila, monyi ṙema ulya kawia mchilyi o waṙemi wakye, ‘Laga waṙemi, uwataae wori wowo, ochiwooka na o mafurumionyi mṟasa o kuwooka.’

⁹Na kyiyeri walecha walya wa saa kumi na imwi, waleambilyia orio mndu dinari.

¹⁰Na walya wa kuwooka kyiyeri walecha, walekusaṟa kye weambilyia ngoseṟa. Kyaindi na iwo taa wakaambilyia oṙio mndu dinari.

¹¹Kyasia wamuambilyie, wakanunuwia monyi kanyi,

¹²wechigamba, ‘Iwo wa mafurumionyi waṟunda saa imwi tupu, na iyoe nowalyingatsana na soe lokarishia ngyuukyiwa na mui o mfiri puti.’

¹³Na oe kagaluo umwi owo, kammbia, ‘Mbuya yako, ngakuima kyilya uwaṟi-pfo. Oiṙikyiana na inyi iambilyia dinari?

¹⁴Ṙuo kyii kyapfo, uyende; ngakunda ienenga ichu o mafurumionyi kyilyingananyi na iyoe.

¹⁵Chi sungusinyi iwuta na shilya shii shako chandu ngyikundi-pfoe? Ang'u riso lyapfo lyanyeng'a kyipfa kya inyi iwa mcha?’

¹⁶Na wuṙo wa mafurumionyi wechiwa wa kuwooka, na wa kuwooka wechiwa wa mafurumionyi.”

¹⁷Na lyilya Yesu aweiṙo echiyenda Yerusalemu, kaṙuo wanalosho walya ikumi na wawi handu halawoṙe wandu; na njienyi kawawia,

¹⁸“Luiṙo iyenda Yerusalemu; na Mono-Adamu nechiwiko mawokonyi ga wang'anyi wa makohanyi na walosha wa mawawaso; nawo wemwanduya napfe.

¹⁹Numa ya iho wechimṙuo ko masanga waiṙime imkapa makuukuu, na imkapa na ngowa, na imkapia msalabenyi; na mfiri o kaṟaaṟu neṟuka.”

²⁰Naaho-ng'u mama o wana wa Sebedayo kayenda ko Yesu hamwi na wana wakye kamwindia, na imterewa kyindo.

²¹Yesu kammbia, “Nukundi kyikyi?” Kammbia, “Gamba kye wana-wa wako wawi waṙamie umwi kuwoko kopfo ko kulyoe na umwi kuwoko kopfo ko kumoso, Wumangyinyi wopfo.”

²²Yesu kagaluo, kagamba, “Muichi kyindo muiterewa-pfo. Ngyesa moiṙima iiṙia matuuro-ga gaingyiweṙa?” Wakammbia, “Loiṙima.”

²³Kawawia, “Kyaloi mochiiṙima ituuro cha inyi, kyaindi iṙamia kuwoko koko ko kulyoe na kuwoko koko ko kumoso, ngyiwoṙe pfinya yemuenenga-pfo, indi weenengo walya wawaṟeyeṟie nyi Awu-yoko.”

²⁴Na kyiyeri walya ikumi waleicho walesuuya wana walya wa mka wawi.

²⁵Kyaindi Yesu kawalaga, kagamba, “Muichi kye wang'anyi wa wandu walaiṙikyie Ruwa wekyechilyia wandu wawo kui pfinya, na wang'anyi wawo wakawagaluo waṟundi.

²⁶Kyaindi kyechiwa kuṙo konyu-pfo. Mndu oose akundi iwa ang'anyi konyu, na nawe mṟundi onyu;

²⁷na mndu oose akundi iwa o kuwooka konyu nawe kyisinga kyanyu.

²⁸Chandu Mono-Adamu alalecha iṟundio, kyaindi iṟunda, na ireka moo uwe kyindo kyekyiṟa wanyamaṟi.”

²⁹Na lyilya waweiwuka Yeriko wandu wa kyisanzionyi kying'anyi wakamwosha.

³⁰Na shipfupfuṟe shiwi shiweṙamie mbai ya njia, nasho kyiyeri shileicho kye Yesu naiiṙa, shilekuilenga na ṟui lying'anyi, shechigamba, “Ulusaṟie, Mndumii, mono-Dawidi.”

³¹Wandu wa kyisanzionyi kyilya wakashiṙeṙia, kundu shitsie. Kyaindi sho shikaengyeṟa ikuilenga na maṟui gang'anyi, shechigamba, “Ulusaṟie, Mndumii, mono-Dawidi!”

³²Yesu kagoṟoka, kashilaga, kagamba, “Mukundi ngyimmbutie kyi?”

³³Shikammbia, “Lukundi meso gaṙu gatambaṟukye luwone.”

³⁴Yesu kashiwonia wukyiwa, kapaaya meso gasho; cha ilyi shikaiṙima iwona, shikamwosha.