Read Kivunjo New Testament 1999 Matayo 21 Bible Online

Matayo 21 - Kivunjo New Testament 1999 bible

Matayo 21

¹Na lyilya waleshika kufuhi na Yerusalemu, na ishika Betifage, kyikaṟo kyiwekyeri msaṟinyi o mashiṙi ga mseituni, naaho-ng'u Yesu aleṙuma wanalosho wawi, echiwawia,

²“Yendenyi mṟasa kyikaṟo kyilya kyikyeri mbele ya ushangu lonyu, na cha ilyi mowona nzoi ingyipfungye, na igache lya nzoi hamwi nayo; tsipfunguonyi mungyiendie.

³Na kokooya mndu ammbesa kyindo, gambenyi, ‘Mndumii nawoṙe kyindo akundi iwuta natso,’ na kulawoṙe iṙetsa kyiyeri nechitsiende.”

⁴Ishi shoose shechiwa, kundu kyiafukyie kyindo kyilya kyileṙeṙo nyi moonguo shisuku echigamba,

⁵“Wienyi mṟi o Sion, mangyi opfo naicha na kopfo, namhoo, na oe naṙamie wuye ya nzoi. Na igache lya nzoi, mana o nzoi.”

⁶Wanalosho walya wakayenda, wakawuta chandu Yesu alewawia.

⁷Wakaende nzoi iya na igache lya nzoi, wakawikyia nguwo tsawo wuye yatso, na oe kaṙamia wuye yayo.

⁸Wandu wafoi wa kyisanzionyi kyilya wakaala nguwo tsawo njienyi; na wengyi wakamanya maṟamba ga mashiṙi, wakagaala njienyi.

⁹Na wuingyi wo wandu wawesongoi, na walya walemwosha, wakakuilenga na ṟui lying'anyi wechigamba, “Hosiana, Mono-Dawidi! Nyi oe ammbikyie mboṟa, ulya aicha kui rina lya Mndumii, Hosiana wuye ruwewu.”

¹⁰Na lyilya aleiṙa na Yerusalemu, mṟi oose ukowaṙa ndiṟimo tsing'anyi, wandu wechigamba, “Nyi wui ichu?”

¹¹Wuingyi wo wandu wukogamba, “Ichu nyi moonguo shisuku ulya, Yesu o Nasareti ya Galyilaya.”

¹²Yesu kaiṙa na hekalunyi, kafuna woose wawekapa mbucha kulya hekalunyi, kapfuluo mesa tsa weilacha heleri, na shiṙi sha walya waweikumba mbeta.

¹³Kawawia, “Kyikyiṟeie, ‘Numba yako yechilago numba ya kyiterewionyi,’ kyaindi nyoe moigaluo iwa usanja lo wasokyi.”

¹⁴Na shipfupfuṟe na shiwete shikayenda kokye akyeri kulya hekalunyi, kashikyiṟa.

¹⁵Kyaindi wang'anyi wa makohanyi na walosha wa mawawaso kyiyeri walewona maṟiyisho alewuta, na kyiyeri wana walekuilenga na maṟui gawo hekalunyi, wechigamba, “Hosiana, Mono-Dawidi” walesuo,

¹⁶wakammbia, “Uichuoe chandu iwa waigamba?” Yesu kawawia, “Yee loi. Mulandeicho kye ‘Kui maṙumbu ga wana wanangu na waionga nuleafutsia kyiṟumi?’ ”

¹⁷Kalekana nawo, kayenda nja ya mṟi mṟasa Betania, kalaa pfo.

¹⁸Na lyilya kulekya kyiyeri aweiyenda mṟinyi, nalewoṙo nyi njaa.

¹⁹Kawona mfumu umwi mbai ya njia, kayenda halya-ndu uwekyeri, alawone pfo kyindo sile maṟa tupu. Kauwia, “Kulawonekye ndunda kopfo wookyia inu mṟasa mlungana.” Mfumu ukouma cha ilyi.

²⁰Kyiyeri wanalosho walewona, waleṟiyio, wechigamba, “Nyi wuṙa mfumu ouma cha ilyi?”

²¹Yesu kagaluo, kawawia, “Ny'kyaloi, ngammbia, mukowaṙa iiṙikyia, mulandewe wandu weilacha-ilacha kyilya moiṙikyia, mochiṟunda chi ilyo lya mfumu tupu-pfo, kyaindi maa mukowia fumvu-lyi, ‘Kuluka, uwiyitso ipalyipalyinyi,’ kyechiṟundika.

²²Na shoose mochishiterewa kyiterewonyi mochiiṙikyia, mochiambilyia.”

²³Na kyiyeri amwiṙe na hekalunyi wang'anyi wa makohanyi na wasongoru wa wandu wakayenda kokye kyiyeri aweilosha, wakagamba, “Nyi kui wuchilyi wuha uiwuta shindo-shi? Na oe nyi wui alekuenenga wuchilyi-wu?”

²⁴Yesu kagaluo, kawawia, “Na inyi ngyemmbesa kyindo kyimwi na nyoe mukongyigaluo, inyi ngyechimmbia nyi kui wuchilyi wuha ngyiwuta ishi.

²⁵Wupatiso wa Yohane wulewuka kwi? Wulewuka ruwewu, ang'u ko wandu?” Wakawesana wo wenyi ko wenyi, wechigamba, “Lukogamba, wulewuka ruwewu, neluwia, ‘Ny'kyilyi-ng'u mulalemwiṙikyia?’

²⁶Na lukogamba, ‘Wulewuka ko wandu,’ luiowuo kyisanzionyi; kyipfa wandu woose wawonyi Yohane nyi moonguo shisuku.”

²⁷Wakagaluo Yesu, wakagamba, “Luichi-pfo.” Na oe kawawia, “Maa inyi ngyimmbia nyoe nyi kui wuchilyi wuha ngyiwuta ishi-pfo.”

²⁸“Kyaindi muwonyi kuṙa? Mndu umwi nawewoṙe wana wawi. Kayenda ko ulya o kuwooka, kagamba, ‘Mono-ko, inu yenda undeṟunda ṙemenyi lya msabibu.’

²⁹Kagaluo kagamba, ‘Ngyiyenda, Mndumii,’ alayende.

³⁰Kayenda ko ulya o kawi, kagamba wuṙo. Na oe kagaluo, kagamba, ‘Ngyikundi-pfo.’ Numa ya iho katerewa ihooṟio, kayenda.

³¹Ngyesa kyiiṙi kya iwo wawi nyi uha aleṟunda kyilya awuye akundi?” Wakammbia, “Nyi ulya o kawi.” Kyasia Yesu kawawia, “Ny'kyaloi ngammbia, wesania ukamba na maṟai waimusongoya iiṙa na Wumangyinyi wo Ruwa.

³²Cha kyipfa Yohane nalecha na konyu kui njia ya wusumganyi, nyoe mulamwiṙikyie. Kyaindi wesania ukamba na maṟai walemwiṙikyia; na nyoe maa lyilya mulewona, muleṙumbuya kundu mumwiṙikyie-pfo.”

³³“Aṙanyienyi mfano ungyi. Kuwewoṙe mndu umwi monyi kanyi, na oe nalewaaya sabibu ṙemenyi lyakye, kalyiringyichia uṟigo, kasuma rina lyekamia mpfinyo makyiṙi-gawi galyo, kawika kyitaanga, kagawia waṙemi ṙema lyilya, kayenda kyaro.

³⁴Ilyi kyiyeri kyesambuo kyiletikyira kufuhi, kaṙuma waṟundi wakye ko waṙemi walya, waambilyie ndunda tsakye.

³⁵Waṙemi walya wakawaṙa waṟundi walya, ichu wakamkapa, na ichu wakammbaaga, na ichu wakamkapa na magoe.

³⁶Kaṙuma-se waṟundi wengyi wafoi kuta walya wa kuwooka, wakawawutia wuṙo.

³⁷Mafurumionyi kaṙuma mono-kye o womi kowo, echigamba, weindia mono-ko.

³⁸Kyaindi waṙemi walya kyiyeri walewona mana ulya, wakaṙeṙa wo wenyi ko wenyi, wechigamba, ‘Ichu nyi mokyioṟa. Sindenyi lummbaage, luṙuo kyooṟa kyakye.’

³⁹Wakammbaṙa, wakammbiyitsa nja ya ṙema lya msabibu wakammbaaga.

⁴⁰Kyasia kyiyeri echicha mndumii ulya o ṙema lya msabibu nechiwutia kyi waṙemi-wo?”

⁴¹Wakammbia, “Nechirumatsa uwicho walya wawicho; na ṙema lya msabibu nechigawia waṙemi wengyi, wechimtaa ndunda kui kyiyeri kyiwaṟi.”

⁴²Yesu kawawia, “Muichi chandu kyikyeri shiṟeionyi: ‘Igoe walelyilega wewika numba, ilyo lyawa igoe lying'anyi lya ndumbenyi; ṙeṙo-lyi lyiwukyie ko Mndumii, nalyo nyi kyiṟiyisho mesonyi gaṙu?’ ”

⁴³Kyipfa kya ikyo ngammbia, “Wumangyi wo Ruwa wochiwuto konyu, na ienengo isanga lyingyi lyekyekumbia ndunda tsa Wumangyi-wo. [

⁴⁴Na icho echioloka wuye ya igoe-lyo nechifinjika-finjika; na ulya lyechimwolokyia, lyechimsaa lyimmamiṟe.]”

⁴⁵Wang'anyi wa makohanyi na Mafarisayo, kyiyeri waleicho mfano yakye, walemanya kye nyi kyawo aiṙeṙa.

⁴⁶Nawo kyiyeri walepfula immbaṙa, waleowuo wuingyi wo wandu, cha kyipfa wo walemmbona nai moonguo shisuku.