Read Kivunjo New Testament 1999 Matayo 24 Bible Online

Matayo 24 - Kivunjo New Testament 1999 bible

Matayo 24

¹Yesu kayenda, kawuka hekalunyi. Wanalosho wakye wakayenda kokye wamloṟe numba tsa hekalu.

²Na oe kagaluo, kawawia, “Muwonyi ishi shoose? Ny'kyaloi, ngammbia, hechitsugaa igoe wuye ya igoe lyingyi lyilechiolotso-pfo.”

³Na lyilya aweṙamie fumvunyi lya mashiṙi ga mseituni, wanalosho wakye wakayenda kokye kui kyiṟika, wechigamba, “Luwie, mbonyi-tsi tsechiwa indi? Na kyiṟingyishio kya icha lyapfo na kya mafurumionyi ga wuyana nyi kyikyi?”

⁴Yesu kagaluo, kawawia, “Mndu alamlembe.

⁵Cha kyipfa wafoi wechicha kui rina lyako, wechigamba, ‘Inyi nyi Kristo;’ nawo wechilemba wafoi.

⁶Na nyoe mochiicho mbonyi tsa shiṙa na iweweṙo lya shiṙa. Maa mulaowesho; kyipfa isho shiwaṟi iwa kuṙo; kyaindi mafurumionyi galya galandeshikye-pfo.

⁷Cha kyipfa isanga lyechiwuka ikapana na isanga, na wumangyi ikapana na wumangyi. Kochiwaṙa njaa, na shiriinza handu kui handu.

⁸Isho shoose nyisho mawookyionyi ga iwawio lying'anyi.

⁹Kyiyeri-kyo wechimṟiinga nyoe muwoṙo nyi wukyiwa, nawo wechimmbaaga, na nyoe mochiwa wandu wawasuoe nyi masanga goose kyipfa kya rina lyako.

¹⁰Naaho-ng'u wafoi wechikapa tuulyia, nawo wechiṟiingana, na isuana.

¹¹Na weonguo shisuku wa wongo wechiwoneka na ilemba wafoi.

¹²Na kyipfa kya iengyeṟika inyamaṟa mawawaso, ikunda lya wandu wafoi lyechiololyia.

¹³Kyaindi ulya echikarishia mṟasa mafurumionyi, nyi oe echikyia.

¹⁴Lyingyi-se mbonyi ngyicha tsa Wumangyi tsechiongoyo wuyanenyi koose, iwa wuṟingyishi wo masanga goose. Iho nyiho mafurumionyi galya gechicha.”

¹⁵“Kyasia kyiyeri-kyo mochiwona ulya ekyenyamaṟa na ifunja orio kyindo kyiele, ulya amgambe nyi moonguo shisuku Danielyi, agoṟokyi handu haele (aikulosha na namanye).

¹⁶Naaho-ng'u wakyeri urukyenyi lo Uyuda waṙichilyie mafumvunyi.

¹⁷Na ai kai alasokye iṙuo shilya shikyeri kanyi kokye.

¹⁸Maa akyeri mṙemenyi alawuye na numa ionduo nguwo yakye.

¹⁹Ochia lo iwo wai wanene na waionza mfiri-yo!

²⁰Terewenyi, kundu iṙicha lyanyu kulawe kyiyeri kya mbeho, maa mfiri o onyonya.

²¹Cha kyipfa kyiyeri-kyo kochiwaṙa wukyiwa wung'anyi, mbaṟe yakye ilandewonekye wookyia mawookyionyi ga wuyana mṟasa wulalu, maa mbaṟe-yo iyo yechiwono-se maa ale-pfo.

²²Na kokooya mfiri-yo ilawechifuhiṟo, mndu oose awechikyia-pfo; kyaindi kyipfa kya wasambuṟe mfiri-yo yechifuhiṟo.

²³Kyiyeri-kyo mndu kammbia, ‘Kristo nakyeri iha, ang'u nakyeri kulya,’ mulaiṙikyie.

²⁴Cha kyipfa wechiwoneka makristo wa wongo, na weonguo shisuku ga wongo, nawo wechiwuta ṟigo tsing'anyi na shiṟiyisho; waiṙime imuṙetsa, cha kyikaiṙimika, mṟasa wai wasambuṟe.

²⁵Ngammuikyimbia.

²⁶Kyasia wakammbia, ‘Nakyeri kundu ko nuka kuumu suwaa kulawoṙe maa mṟinga,’ mulafume; ‘Nakyeri kanyi,’ mulaiṙikyie.

²⁷Cha kyipfa chandu mbawa yekyewaṟuka iwuka ura lo ngamenyi mṟasa ikawono ura lo kyukonyi, nyi wuṙo kochiwa kyiyeri kya icha lya Mono-Adamu.

²⁸Cha kyipfa handu mnying'a ukyeri nyi ho-ndu mbeṟo tsekyekuumbia.”

²⁹“Kyaindi cha ilyi, numa ya wukyiwa wo mfiri iya, mnengyeṟi ochiwiko meema, na mori ochiloṟa ngyesa yacho-pfo, na nyenyeri tsechioloka iwuka ruwewu, na shindo shingyi sha ruwewu shekupaaya-paya na inyanyaṟika.

³⁰Naaho-ng'u yechiwonekana ṟigo ya Mono-Adamu ruwewu; na masanga goose ga wuyana gechikapa ṟanyi; nago gechiwona Mono-Adamu echicha mapuchinyi ga ruwewu hamwi na pfinya na mng'ano ung'anyi.

³¹Na oe nechiṙuma malaika wakye hamwi na ṟui lying'anyi lya iganda, nawo wechisania wasambuṟe wakye iwuka ngyuura tsoose tsa wuyana.”

³²“Kyasia ko mfumu kuloshenyi mfano. Mbaga yakye ikammarisa ioṟia na iwaṙa maṟa, mokyemanya kye kyiyeri kya isambuo kyikyeri kufuhi.

³³Na nyoe taa, ilyi mowona isho shoose, manyenyi kye Mono-Adamu nakyeri kufuhi, moongonyi.

³⁴Ny'kyaloi, ngammbia, rika-lyi lyechiiṙa-pfo, mṟasa kyiyeri isho shechiafukyia.

³⁵Ngyina na uruka shechiiṙa, kyaindi, maṙeṙo gako gechiiṙa maa ale-pfo.”

³⁶“Kyaindi mbonyi tsa mfiri ulya na saa iya kuwoṙe aichi-pfo, maa malaika wakyeri ruwewu, maa Mana, sile Awu amonyi.

³⁷Cha kyipfa chandu kyiwekyeri kyiyeri kya Noe, nyi wuṙo kochiwa kyiyeri kya icha lya Mono-Adamu.

³⁸Cha kyipfa chandu kyiwekyeri mfiri iya ilesongoya Mfu wandu waweilya na inyo, wechialyika na ialyiko, mṟasa mfiri ulya Noe aleiṙa na safinenyi

³⁹walamanye mṟasa Mfu ukocha, ukowarumatsa woose. Nyi wuṙo kochiwa kyiyeri kya icha lya Mono-Adamu.

⁴⁰Kyiyeri-kyo wandu wawi wekooya wai ṙemenyi; umwi nawuto ho, umwi naṙio ho.

⁴¹Waka wawi wekooya wesaa; umwi nawuto ho, umwi naṙio ho.”

⁴²“Kyasia laenyi kyiṙombo; kyipfa muichi nyi mfiri uha Mndumii onyu echicha-pfo.

⁴³Kyaindi manyenyi kyindo-kyi; kokooya monyi kanyi aweichi kyiyeri mbafu yechicha, nawelaa kyiṙombo, maa awechiṙa numba yakye ifunjo-pfo.

⁴⁴Kyipfa kya ikyo na nyoe kuṟeyeṟenyi; cha kyipfa saa mulaikusaṟie Mono-Adamu naicha.”

⁴⁵“Kyasia nyi wui-ng'u mṟundi muyendelyi, awoṙe wuṟango, mndumii okye alemwenenga wuchilyi kanyi kokye, naenengye wandu kyelya kyiyeri kyiwaṟi?

⁴⁶Agusu mṟundi ulya, mndumii okye echicha namkooye ewuta kuṙo.

⁴⁷Ny'kyaloi, ngammbia, nechimwenenga ichilyia shindo shakye shoose.

⁴⁸Kyaindi mṟundi ulya mmbicho kagamba mrimenyi kokye, ‘Mndumii oko naikyelyio,’

⁴⁹kawooka ikapa woṙoe, na ilya na inyo hamwi na wananzi.

⁵⁰Mndumii o mṟundi-cho neecha mfiri mṟundi-cho alaukusaṟie, na saa alaichi;

⁵¹nechimṙumbuo mateng'eta gawi na immbutia chandu wakulembecheṟi wekyewutio. Nyi lyo-ndu kochiwaṙa wukyiwa na ilya ngakuru.”