Read Kivunjo New Testament 1999 Matayo 25 Bible Online

Matayo 25 - Kivunjo New Testament 1999 bible

Matayo 25

¹“Naaho-ng'u Wumangyi wo ruwewu wochifanana na wana wa kyika ikumi, waleira taa tsawo, wakafuma indeambilyia monyi wolyi.

²Wataanu wawekyeri matondo, na wataanu wawewoṙe wuṟango.

³Walya wawekyeri matondo waleira taa tsawo, walaṙuo mafuṙa;

⁴indi walya wawoṙe wuṟango waleṙuo mafuṙa shindonyi shawo shewika mafuṙa hamwi na taa tsawo.

⁵Na lyilya monyi wolyi alekyelyio, woose wakarengyera wakalaa maṙoe.

⁶Kyaindi kyio kya mayeleyele, hakawaṙa iiṟuka lya mndu aigamba, ‘Aulya, monyi wolyi; fumenyi mundemwambilyia.’

⁷Cha ilyi wana walya wa kyika woose wakafuma, wakaṟeyeṟa taa tsawo.

⁸Walya wai matondo wakawia walya wawoṙe wuṟango, ‘Luenengyenyi shifuṙa shanyu; kyipfa taa tsaṙu tsiruma.’

⁹Kyaindi walya wawoṙe wuṟango wakawagaluo, wechigamba, ‘Chi wuṙo-pfo; gelushika soe na nyoe-pfo. Nanga moyenda ko walya wekyekumba mafuṙa mundeguṟa pfo ganyu.’

¹⁰Nawo kyiyeri waweiyenda iguṟa, monyi wolyi kacha, na walya wawekuṟeyeṟie wakaiṙa na oe na wolyinyi; moongo ukoshingo.

¹¹Numa wana walya wa kyika wengyi wakacha, wakagamba, ‘Mndumii, Mndumii, lupfunguye moongo.’

¹²Kagaluo kagamba, ‘Ny'kyaloi, ngammbia, ngyimuichi nyoe-pfo.’

¹³Kyasia laenyi kyiṙombo, cha kyipfa muichi mfiri-cho maa saa-pfo.”

¹⁴“Kyipfa nyi cha mfano o mndu akundi iyenda kyaro. Nalelaga waṟundi wakye, kawaṙambika masaa gakye.

¹⁵Kaenenga umwi talanta tsitaanu, na umwi talanta tsiwi, na umwi talanta imwi; orio mndu iṙuana na wuiṙimi wokye; kayenda kyaro.

¹⁶Cha ilyi ulya aleambilyia talanta tsitaanu kayenda, kakapa natso mbucha, kawona ho kyiira talanta tsingyi tsitaanu.

¹⁷Na wuṙo taa ulya awoṙe tsiwi; oe kawona ho kyiira talanta tsiwi.

¹⁸Kyaindi ulya aleambilyia imwi, naleyenda kasuma wanda terinyi, kaṟika pfo heleri iya ya mndumii okye.

¹⁹Mfiri ifoi yamuiṙe mndumii o waṟundi walya kacha, kaachikyia matala hamwi nawo.

²⁰Ulya aleambilyia talanta tsitaanu kacha kaende talanta tsingyi tsitaanu, echigamba, ‘Mndumii, nulekooma koko talanta tsitaanu; aitsi talanta tsingyi tsitaanu ndewona ho kyiira.’

²¹Mndumii okye kammbia, ‘Necha, mṟundi mcha na mwendelyi. Nokuloṟa kye numwendelyi maa shindonyi shitutu. Ngyechikuwika mchilyi o shindo shifoi. Iṙa na sienyi ya mndumii opfo.’

²²Na ulya aleambilyia talanta tsiwi kacha, kagamba, ‘Mndumii, nulekooma koko talanta tsiwi; aitsi, talanta tsingyi tsiwi ndewona ho kyiira.’

²³Mndumii okye kammbia, ‘Necha, mṟundi mcha na mwendelyi. Nokuloṟa kye numwendelyi maa shindonyi shitutu. Ngyechikuwika mchilyi o shindo shifoi. Iṙa na sienyi ya mndumii opfo.’

²⁴Na ulya aleambilyia talanta imwi, kagamba, ‘Mndumii, ngyilemanya kye iyoe nyi mndu muumu. Nokyesambuo handu ulawaaya, nokyesania handu ulaolyie mbeu.

²⁵Kyasia ngaowuo, ngayenda ngaṟika talanta yapfo terinyi. Wulalu nuwoṙe kyilya kyikyeri kyapfo.’

²⁶Mndumii okye kagaluo, kagamba, ‘Iyoe mṟundi mmbicho na mṙoko. Nulemanya kye ngyekyesambuo handu ngyilawaaya, ngyekyesania handu ngyilaolyia mbeu.

²⁷Kyasia, kyiwekuwaṟi ikooma heleri yako ko walya wekyeilacha heleri; na inyi ngacha ngyiwewona kyilya kyikyeri kyako na heleri ya ngoseṟa.

²⁸Kyasia, msokyenyi talanta-yo enengyenyi ulya awoṙe talanta ikumi.

²⁹Cha kyipfa ulya awoṙe kyindo nechienengo, na iengyeṟio pacha; kyaindi alawoṙe kyindo, maa kyilya awoṙe nechisoko.

³⁰Na mṟundi-cho alawoṙe kyiira, mmbiyitsenyi kuleshi meemenyi o nja. Nyi pfo-ndu kochiwaṙa wukyiwa na ilya ngakuru.’ ”

³¹“Kyiyeri-kyo Mono-Adamu echicha mng'anonyi okye na malaika waele woose hamwi na oe, nyi lyo-ndu echiṙamia kyiṙinyi kya mng'ano okye.

³²Na masanga goose gechisanzia mbele yakye; na oe nechiwasawuo chandu mlyisi ekyesawuo moondo na mburu.

³³Nechiwika moondo kuwoko kokye ko kulyoe, na mburu kuwoko kokye ko kumoso.

³⁴Numa ya iho mangyi nechiwia walya wakyeri kuwoko kokye ko kulyoe, ‘Nnjonyi, nyoe muwawikyie mboṟa nyi Awu-yoko, oṟenyi Wumangyi muleṟeyeṟio wookyia itsano lya wuyana.

³⁵Cha kyipfa ngyiwewoṙo nyi njaa, mkongyienenga kyelya; ngyiwemwangari mukongyienenga mṟinga o nyo; ngyiwekyeri muyenu, mukongyiambilyia cha mndu onyu;

³⁶ngyiwemkuuye, mukongyienenga nguwo tseṟaa; ngyiweluoe, mukochengyiwia hai; ngyiwekyeri kyipfungonyi mukochengyisaia.’

³⁷Naaho-ng'u wasumganyi wechimgaluo, wechigamba, ‘Mndumii, nyi indi lulekuwona uwoṙo nyi njaa, lukokuenenga kyelya, ang'u umwangari lukokuenenga mṟinga o nyo?

³⁸Lyingyi-se nyi indi lulekuwona ukyeri muyenu, lukokuambilyia cha mndu oṙu, ang'u umkuuye, lukokuenenga nguwo tseṟaa?

³⁹Nyi indi-se lulekuwona uluoe, ang'u ukyeri kyipfungonyi, lukokusaia?’

⁴⁰Na Mangyi nechigaluo, echiwawia, ‘Ny'kyaloi ngammbia, chandu mulewutia umwi o wana wa wama-wo wako wai watutu, mulengyiwutia inyi.’

⁴¹Numa ya iho nechiwia na walya wakyeri kuwoko kokye ko kumoso, ‘Wukyenyi koko, nyoe muwasese, muyende moṙonyi o mlungana, umṟeyeṟie Mokyiriinzi na malaika wakye.

⁴²Cha kyipfa nyiwewoṙo nyi njaa, mulangyienengye kyelya; ngyiwemwangari, mulangyienengye mṟinga o nyo;

⁴³ngyiwekyeri muyenu, mulangyiambilyie cha mndu onyu; ngyiwemkuuye, mulangyienengye nguwo tseṟaa; ngyiweluoe, na ngyiwekyeri kyipfungonyi, mulachengyisaia.’

⁴⁴Naaho-ng'u na iwo taa wechigaluo, wechigamba, ‘Mndumii, nyi indi lulekuwona iyoe uwoṙo nyi njaa, ang'u umwangari, ang'u ukyeri muyenu, ang'u umkuuye, ang'u uluoe, ang'u ukyeri kyipfungonyi, lulakupfuṟukanie?’

⁴⁵Na oe newagaluo, echigamba, ‘Ny'kyaloi, ngammbia, chandu mulalewutia umwi o iwo wai watutu, mulengyiwutia inyi-pfo.’

⁴⁶Na iwo wechiyenda na iiṙa na ngaponyi ya mlungana; indi wasumganyi wechiyenda moonyi o mlungana.”