Read Kivunjo New Testament 1999 Matayo 26 Bible Online

Matayo 26 - Kivunjo New Testament 1999 bible

Matayo 26

¹Na lyilya Yesu alemarisa ionguo shindo-sho shoose, nalewia wanalosho wakye,

²“Muichi kye numa ya mfiri iwi kochiwa pasaka, na Mono-Adamu nechiṟiingo nakapio msalabenyi.”

³Kyiyeri kyilya wang'anyi wa makohanyi, na wasongoru wa wandu, wakasanzia numbenyi ya Mkohanyi ang'anyi kuta woose ekyelago Kayafa;

⁴wakachila handu hamwi, kundu wawaṙe Yesu kui ngyeṟo na immbaaga.

⁵Kyaindi wakagamba, “Kyilawe kyiyeri kya mfiri ung'anyi, kulacheamka kyituṟu wandunyi.”

⁶Na Yesu kyiyeri awekyeri Betania numbenyi ko Simion awewoṙo nyi taambo,

⁷mndu mka awewoṙe kyimkyepe kyiwoṙe mafuṙa mecha gekushia ga woguru wung'anyi naletikyira kufuhi na oe, kagaletsia mṙoenyi kokye kyiyeri aweṙamie echilya.

⁸Wanalosho wakye kyiyeri walewona, wakasuo, wakagamba, “Iola-ola-lyi ilyi nyi lya kyikyi?

⁹Kyipfa mafuṙa-ga gaweiṙima ikumbo ko heleri tsifoi wakyiwa waenengo.”

¹⁰Yesu kamanya, kawawia, “Ny'kyilyi muilyisa mndu mka-chu wukyiwa? Kyipfa nyi iṟunda lyicha angyiṟundia inyi.

¹¹Cha kyipfa mfiri yoose muwoṙe wakyiwa hamwi na nyoe; kyaindi inyi mungyiwoṙe mfiri yoose-pfo.

¹²Kyipfa kui ipusia mmbiu oko mafuṙa-go, nawuta aṙo ingyiṟeyeṟa ko iṟiko lyako.

¹³Ny'kyaloi, ngammbienyi orio handu ndumi-i ngyicha yechiongoyo wuyanenyi koose, kyindo-kyo mndu mka-chu aṟunda na kyakye kyegambo kyipfa-kya imkumbuo.”

¹⁴Kyiyeri-kyo umwi o walya ikumi na wawi, awekyelago Yuda Isikariote naleyenda ko wang'anyi wa makohanyi,

¹⁵kagamba, “Ny'kyikyi mochingyienenga, ngamtarama muiṙime immbaṙa?” Wakamteṟia rupia makumi gaṟaaṟu.

¹⁶Wookyia kyiyeri kyilya Yuda kapfula ṙaawa lyicha lyemṟiinga.

¹⁷Na mfiri o kuwooka o mkate ilangyitarang'ishe, wanalosho walya waleyenda ko Yesu, wakammbia, “Nyi hanga ukundi lukuṟeyeṟie ulyiie ho Pasaka?”

¹⁸Kagamba, “Yendenyi mṟinyi ko mndu mlyiwe, mundemmbia, ‘Mlosha nagamba, kyiyeri kyako kyikyisaangye kyikyeri kufuhi; kopfo ngyechiachikyia Pasaka hamwi na wanalosho wako.’ ”

¹⁹Wanalosho wakawuta chandu Yesu alewawia, wakaṟeyeṟa Pasaka.

²⁰Kyasia kyiyeri kuleila naleṙamia ilya kyelya hamwi na walya ikumi na wawi.

²¹Nawo kyiyeri waweilya, nalegamba, “Ny'kyaloi, ngammbia, umwi onyu nechingyiṟiinga.”

²²Wanalosho wakye wakawoṙo nyi fowa mnu, wakawooka immbesa umwi, umwi, “Nyi inyi, Mndumii?”

²³Kagaluo, kagamba, “Icho awika kuwoko kokye hamwi na inyi kyitelenyi, nyi oe echingyiṟiinga.

²⁴Mono-Adamu naindepfa, chandu kyikyiṟeie; kyaindi ochia lokye mndu ulya echiṟiinga Mono-Adamu! Kyiwechiwa nanga mndu-cho alawefeo.”

²⁵Yuda, ulya momṟiinga, kagaluo, kagamba, “Nyi inyi, Mlosha?” Kammbia, “Iyoe nogamba.”

²⁶Nawo kyiyeri waweilya, Yesu naleira mkate, kauwikyia mboṟa, kaupeṟenguo, kaenengyia wanalosho wakye, kagamba, “Waṙilyienyi, mulye. Ichu nyicho mmbiu oko.”

²⁷Kaira kyiṙoo, kaana, kawaenengyia, echigamba, “Nyonyi moose kyilya kyikyeri kunu

²⁸cha kyipfa iyi nyi samu yako ya mma, ipusuka kyipfa kya wafoi ko iwuto wunyamaṟi.

²⁹Kyaindi ngammbia, ngyechinyo-se mpfinyo maa ale-pfo mṟasa kyiyeri ngyechiunyo na nyoe wuyanenyi wuhya wo Awu-yoko.”

³⁰Nawo kyiyeri walemarisa iimba, wakafuma na nja iyenda fumvunyi lya mashiṙi ga mseituni.

³¹Naaho-ng'u Yesu kawawia, “Nyoe moose mochiwihiyo kyipfa kyako kyio-kyi; cha kyipfa kyikyiṟeie, ‘Ngyechiwaaga mlyisi, na moondo ga poo gechinyanyaṟika.’

³²Kyaindi numa ya iṟuka lyako, ngyechimusongoya iyenda Galyilaya.”

³³Petiro kagaluo, kammbia, “Wakawihiyo woose kyipfa kyapfo, inyi ngyechiwihiyo maa ale-pfo.”

³⁴Yesu kammbia, “Ny'kyaloi ngakuwia iyoe, kyio-kyi ilying'onyi lyilafuga, nongyikana kaṟaaṟu.”

³⁵Petiro kammbia, “Maa kokooya ngyechipfa na iyoe, ngyechikukana maa ale-pfo.” Na wanalosho woose wakagamba wuṙo.

³⁶Numa ya iho Yesu kayenda hamwi nawo mṟasa handu hekyelago Getisemane, kawia wanalosho wakye, “Ṙamienyi iha, mṟasa ngyiyende kulya ngyindeterewa.”

³⁷Kaṙuo Petiro na wana walya wawi wa Sebedayo, kawooka iiṟewe na iwona fowa mrimenyi.

³⁸Naaho-ng'u kawawia, “Mrima oko uwoṙo nyi iiṟewe lying'anyi mnu ngyeiṙima maa ipfa. Kaenyi iha, mulae kyiṙombo hamwi na inyi.”

³⁹Kayenda mbele kyitutu, kaoloka na ndewu, katerewa, echigamba, “Awu-yoko, kyikaiṙimika, ṙombo-lyi lya matuuro lyiiṙe kuleshi na inyi. Kyaindi chi chandu ngyikundi inyi-pfo, indi nyi chandu ukundi iyoe.”

⁴⁰Kacha na ko wanalosho walya, kawakooya walee, kawia Petiro, “Ngyesa moiṙima ilaa kyiṙombo na inyi maa saa imwi-pfoe?

⁴¹Laenyi kyiṙombo, muterewe, mulacheiṙa na kyiyeshionyi. Mrima ukundi; kyaindi mmbiu uwoṙe pfinya-pfo.”

⁴²Kayenda-se lya kawi, katerewa, echigamba, “Awu-yoko kokooya kyilechiiṙimika ṙombo-lyi lya matuuro lyiiṙe kuleshi na inyi, kyilya ukundi kyiwe kuṙo.”

⁴³Kacha-se, kawakooya walee; kyipfa meso gawo gawewoṙo nyi maṙoe malemeri.

⁴⁴Kawaṙa-se, kayenda, katerewa lya kaṟaaṟu, echigamba maṙeṙo galya galya.

⁴⁵Numa ya iho kacha na ko wanalosho wakye, kawawia, “Laenyi wulalu, muonyonye. Saa yamtikyira kufuhi, na Mono-Adamu nechiwiko mawokonyi ga wanyamaṟi.

⁴⁶Amkyenyi, sindenyi! Ulya aingyiṟiinga amtikyira kufuhi.”

⁴⁷Kyasia kyiyeri aweiṙeṙa, Yuda, umwi o walya ikumi na wawi, kacha, aṙuṙanyi na ṟiima lying'anyi lya wandu wawoṙe ngyuushu na ṟungu, wawuka ko wang'anyi wa makohanyi na wasongoru wa wandu.

⁴⁸Na ulya momṟiinga nalekoamuwaenenga kyiṟingyishio, echigamba, “Icho ngyechimkomba, nyi oe; mmbaṙenyi.”

⁴⁹Cha ilyi kayenda ko Yesu, kagamba, “Ngakuiṟikyiṟa, Mlosha.” Kamkomba.

⁵⁰Yesu kammbia, “Mbuya yako, ṟunda ikyo kyakuende.” Wakayenda, wakagoṟuo mawoko gawo wakawaṙa Yesu.

⁵¹Na umwi o walya wawekyeri hamwi na Yesu kagoṟuo kuwoko kokye, kawuta ushu lokye, kamanya isinga lya Mkohanyi ang'anyi kuta woose, kalyiṙumbuo kuṙwi.

⁵²Naaho-ng'u Yesu alemmbia, “Wiyiṟa ushu lopfo na halya-ndu luwekyeri; kyipfa woose wekyekapana kui ushu wechirumatso kui ushu.

⁵³Ang'u nokusaṟa kye inyi ngyechiiṙima iterewa Awu-yoko, na oe nangyiendie wulalu kuṙi ngyuulyimalyi tsa malaika tsifoi kuta ikumi na tsiwi-pfoe?

⁵⁴Kyasia kokooya Ruwa aṙika ngyuulyimalyi tsengyikapania shiṟeio shechiafutsio kuṙa kye isho nyisho shiwaṟi iwa?”

⁵⁵Saa iya Yesu kawia wuingyi wo wandu, “Ngyesa mofuma cha ilyi mundewaṙa msokyi, muwoṙe ngyuushu na ṟungu, ingyiwaṙa? Orio mfiri ngyileṙamia hekalunyi ngyechilosha, mulangyiwaṙe.

⁵⁶Kyaindi ishi shoose shawa, kundu shiṟeio sha weonguo shisuku shiwe chandu shigambie.” Naaho-ng'u wanalosho woose wakamṙa wakaṙicha.

⁵⁷Nawo wakawaṙa Yesu wakamṙuo ko Kayafa, Mkohanyi ang'anyi kuta woose, handu wawesanzie walosha wa mawawaso na wasongoru.

⁵⁸Na Petiro kamwosha ai kuleshi mṟasa numba ya Mkohanyi ang'anyi kuta woose, kaiṙa na numba, kaṙamia hamwi na waṟundi, nawone mafurumionyi.

⁵⁹Kyasia wang'anyi wa makohanyi na mengye yoose wakapfula wandu weṟingyishia Yesu shindo sha wongo, waiṙime immbaaga;

⁶⁰walawone, maa chandu waṟingyishi wa wongo wafoi walecha.

⁶¹Kyaindi numa ya iho kukocha waṟingyishi wawi, wakagamba, “Ichu nalegamba, ‘Ngyeiṙima ifunja hekalu lya Ruwa, na ilyiwika-se numa ya mfiri iṟaṟu.’ ”

⁶²Kyasia Mkohanyi ang'anyi kuta woose kammbia, “Ugaluo kyindo? Iwa nyi kyikyi waikuṟingyishia?”

⁶³Kyaindi Yesu katsia sau. Mkohanyi ang'anyi kuta woose kammbia, “Ngakututuma ulye nyamu kui rina lya Ruwa ai na moo, uluwie kokooya iyoe nyi oe Kristo, Mono-Ruwa.”

⁶⁴Yesu kammbia, “Iyoe nogamba; kyaindi ngammbia, wookyia wulalu mochiwona Mono-Adamu aṙamie kuwoko ko kulyoe ko Ruwa echicha mapuchinyi ga ruwewu.”

⁶⁵Naaho-ng'u Mkohanyi ang'anyi kuta woose karanduo mkoṟoṟi okye, echigamba, “Nalahia Ruwa. Lukundi-se wuṟingyishi wo ngoseṟa maa ale-pfo. Wulalu momuicho chandu alahia Ruwa.

⁶⁶Muwonyi kuṙa nyoe?” Wakagaluo, wakagamba, “Nawaṟi iwoogo.”

⁶⁷Naaho-ng'u wakampuchia maṙa ipfo kyaam, wakamkapa nzina; wengyi wakamkapa ngofi,

⁶⁸wechigamba, “Iyoe Kristo lutambuluye; nyi wui akukapa?”

⁶⁹Na Petiro naweṙamie nja ya numba iya. Kyisinga kyimwi kyikayenda kokye, kyikagamba, “Na iyoe nuwekyeri hamwi na Yesu o Galyilaya.”

⁷⁰Kakana mbele ya woose, echigamba, “Ngyiichi ikyo uigamba-pfo.”

⁷¹Na oe kyiyeri alefuma na nja mṟasa kyichuminyi kyisinga kyingyi kyikammbona, kyikawia wandu wawekyeri pfo, “Ichu nawekyeri hamwi na Yesu o Nasareti.”

⁷²Kakana-se kui nyamu, “Ngyiichi mndu-chu-pfo.”

⁷³Halaiṙa kyiyeri kyileshi, walya walecha na halya wakayenda kokye, wakammbia, “Petiro, ny'kyaloi iyoe nyi umwi owo; kyipfa maa mṙeṙie opfo ukumanyisha.”

⁷⁴Naaho-ng'u Petiro kagamba, “Ngalya nyamu ngyigamba kya loi! Ruwa nangyikape kokooya ngyilaigamba kya loi! Ngyiichi mndu-chu-pfo!” Na cha ilyi ilying'onyi lyikafuga.

⁷⁵Petiro kakumbuo kyindo kyilya Yesu alegamba, “Ilying'onyi lyilafuga, nongyikana kaṟaaṟu.” Kafuma na nja katonyitsa mcheṟeṟe ya fowa.