Read Kivunjo New Testament 1999 Matayo 27 Bible Online

Matayo 27 - Kivunjo New Testament 1999 bible

Matayo 27

¹Na kyiyeri kulekya, wang'anyi wa makohanyi woose na wasongoru wa wandu wakaṙamia kyama chandu weiṙima iwaaga Yesu.

²Wakampfunga, wakammbuta halya, wakamṙambika ko Pilato awekyeri mchilyi o uruka lulya.

³Numa ya iho Yuda, ulya momṟiinga, kyiyeri alewona kye amwanduyo kamanya wuwicho wo kyilya aleṟunda, kawiyiṟia wang'anyi wa makohanyi na wasongoru rupia tsilya makumi gaṟaaṟu, kagamba, “Ngyileṙeko kyiyeri ngyileṟiinga mndu alawoṙe ṙeko.”

⁴Wakagamba, “Kyasia, soe luwoṙo pfo-pfo. Isho nyi shapfo kumonyi.”

⁵Kawiyitsa rupia tsilya hekalunyi kafuma, kandekuwika kyigowo kapfa.

⁶Wang'anyi wa makohanyi wakasania rupia tsilya, wakagamba, “Chi sungusinyi itsisanza na shienengo sha numbenyi ya Ruwa-pfo, cha kyipfa nyi wori wo ipusuo samu.”

⁷Wakaṙamia kyiṙombo, wakaṙumbuo iguṟa ṙema lya mndu ekyeachikyia shinungu na heleri tsilya, hakawa handu heṟika wayenu wapfa.

⁸Koikyo ṙema-lyo lyekyelago ṙema lya samu mṟasa inu.

⁹Naaho-ng'u kyikaafukyia kyindo kyilya kyileṙeṙo nyi moonguo shisuku Yeremia, echigamba, “Walewuta rupia makumi gaṟaaṟu, kyindo wandu waata wa Isiraelyi waleiṙikyiana na oe imtaa;

¹⁰wakaguṟa natso ṙema lya mndu ekyeachikyia shinungu chandu Mndumii alengyiwia.”

¹¹Na Yesu kagoṟoka mbele ya ulya awekyechilyia uruka lulya. Mchilyi-cho kammbesa, kagamba, “Iyoe nyi oe mangyi o Wayuda?” Yesu kammbia, “Iyoe nogamba.”

¹²Kyaindi kyiyeri wang'anyi wa makohanyi na wasongoru walewia Yesu kye nammbicho alegaluo kyindo-pfo.

¹³Naaho-ng'u Pilato kammbia, “Uichuo mawicho-ga goose waikusendia?”

¹⁴Alamgaluo maa kyindo kyimwi mṟasa mchilyi ulya kaṟiyio mnu.

¹⁵Kyasia kyiyeri kya mfiri ung'anyi o Pasaka, mchilyi ulya naweichiwie ipfunguo mpfungo umwi wandu wamkunda.

¹⁶Kyasia kuwewoṙe mpfungo orio mndu awemwichi kyipfa kya wuwicho wokye, ekyelago Baraba.

¹⁷Kyasia kyiyeri wandu walesanzia handu hamwi Pilato kawawia, “Mukundi ngyimpfunguye wui? Baraba ulya, ang'u Yesu ekyelago Kristo?”

¹⁸Cha kyipfa nalemanya kye walemṙambika kokye kui wunyenyi.

¹⁹Na kyiyeri Pilato aweṙamie kyiṙinyi kyakye echiṙumbuo moondu, mka okye nalemṙumia ndumo, immbia, “Ulawutie mndu-cho msumganyi kyindo kyoose; cha kyipfa kyio-kyi kyaamkyia inu ngyileloṙo kyakye ngawihiyo mnu.”

²⁰Na wang'anyi wa makohanyi na wasongoru wa wandu wakawanzia wuingyi wulya wo wandu wuwie Pilato napfunguo Baraba, na iwaaga Yesu.

²¹Kyasia mchilyi ulya kagaluo, kawawia, “Mukundi ngyimpfunguye wui kyiiṙi kya iwa wawi?” Wakagamba, “Baraba.”

²²Pilato kawawia, “Kyasia, Yesu-chu ekyelago Kristo ngyimmbutie kyi?” Wakagamba woose, “Nakapio msalabenyi.”

²³Kagamba, “Ny'kyi? Wuwicho wokye nyi kyikyi?” Wakaengyeṟa mnu ikalagatsa, wechigamba, “Nakapio msalabenyi.”

²⁴Kyasia kyiyeri Pilato alewona kuwoṙe kyiira kyoose-pfo, indi kyituṟu kyikundi iamka, kaira mṟinga, kasamba mawoko gakye mbele ya wuingyi wulya wo wandu, kagamba, “Inyi ngyiwoṙe ṙeko samunyi ya mndu-chu msumganyi-pfo. Ilyi nyi iṟunda lyanyu nyoe.”

²⁵Wandu woose wakagaluo wakagamba, “Leka samu ya mndu-chu iwe wuye yaṙu na ko wana waṙu.”

²⁶Naaho-ng'u kawapfunguya Baraba; na ammarise igamba Yesu nakapo na ngowa, kamṙambika ko ngyuulyimalyi tsakye wandemkapia msalabenyi.

²⁷Naaho-ng'u asikari wa mchilyi o uruka lulya wakaṙuo Yesu mṟasa Praitorio ngyuulyimalyi tsingyi tsoose tsikakuumbia halya-ndu awekyeri.

²⁸Wakammbuta nguwo, wakamṟika ikunya lyifanyi kyimaande.

²⁹Wakaoka oṟo ya msha, wakamṟika mṙoenyi kokye, wakammbikyia upoi lo wuchilyi kuwokonyi kokye ko kulyoe; wakapfiria ndi mbele yakye, wakamkapa makuukuu, wechigamba, “Lokuiṟikyiṟa, Mangyi o Wayuda!”

³⁰Numa ya iho wakampuchia maṙa, wakaira upoi lulya, wakamkapa mṙoenyi.

³¹Wammarise imkapa makuukuu, wakawuta ikunya lyilya, wakamṟika mkoṟoṟi okye, wakamṙuo imkapia msalabenyi.

³²Na lyilya waweiwuka kulya mṟinyi wakawona mndu o Kyirene, ekyelago Simion; ichu wakamwitika nakuṙikye msalaba okye.

³³Na kyiyeri waleshika handu hekyelago Golyigota, kyimwi na igamba, “Ipoṟong'u,”

³⁴wakamwenenga mpfinyo umsanze-sanze na mṟinga o nduu nanyo; kyaindi oe kyiyeri aleukomba na ulumi lokye alakunde inyo.

³⁵Wammarise imkapia msalabenyi, wakagawa mkoṟoṟi okye wechikapa kuṟu kuha; kundu kyiafukyie kyindo kyilya kyileṙeṙo nyi moonguo shisuku, “Walegawiana nguwo tsako; na kyipfa kya ikunya lyako walekapa kuṟu kuha.”

³⁶Wakaṙamia wakamringa halya.

³⁷Wakawikyia wuye ya mṙoe okye kyindo kyeloṟa kyimaṙuma kyewoogo, kyindo kyikyiṟeie: “ICHU NYI YESU, MANGYI O WAYUDA.”

³⁸Kyiyeri kyilya kyilya wasokyi wawi wakakapio msalabenyi hamwi na oe, umwi kuwoko kokye ko kulyoe, na umwi kuwoko kokye ko kumoso.

³⁹Na wandu wawekuiṙia wakamlahia, wechisunza-sunza mṙoe yawo, na igamba,

⁴⁰“Iyoe ochiiṙima ifunja hekalu na ilyiwika-se numa ya mfiri iṟaṟu, kukyiṟe mrima opfo. Kokooya iyoe nyi mono-Ruwa, soka iho msalabenyi.”

⁴¹Na wang'anyi wa makohanyi taa wakamkapa makuukuu hamwi na walosha wa mawawaso wechigamba, “Nalekyiṟa wengyi, aiiṙima ikukyiṟa amonyi-pfo.

⁴²Oe nyi mangyi o Isiraelyi; wulalu nasokye msalabenyi, na soe lochimwiṙikyia.

⁴³Nalekuwaṙa na Ruwa; namkyiṟe wulalu, kokooya namkundi; cha kyipfa nalegamba, ‘Inyi nyi Mono-Ruwa.’ ”

⁴⁴Na wasokyi walya walekapio msalabenyi hamwi na oe walemlahia wuṙo.

⁴⁵Kyasia wookyia saa tsiṟandaaṟu kulewaṙa meema wuye ya uruka loose mṟasa saa kyenda.

⁴⁶Na cha saa kyenda, Yesu kakuilenga na ṟui lying'anyi echigamba, “Eloi, Eloi, lama sabakyitani?” Kyimwi na igamba, “Ruwa oko, Ruwa oko, ny'kyilyi ongyiṙa?”

⁴⁷Na kyiyeri wandu waata wawekyeri halya waleicho, walegamba, “Ichu nailaga Elyiya.”

⁴⁸Cha ilyi umwi owo kayenda eṙicha, kaira kyindo kyekyeongyia mṟinga, kakyiichuṟa mṟinga okyetarang'ia, kakyipfungyia upoinyi, kamrutsa.

⁴⁹Walya wengyi wakagamba, “Leka luwone kokooya Elyiya nechicha imkyiṟa.”

⁵⁰Na Yesu amkuilengye-se na ṟui lyakye ko pfinya, kalekyia moo.

⁵¹Na isulyia lyeshingyia ipfo hekalunyi lyikaranduka kawi wookyia wuye mṟasa wanda. Uruka lukoṙeṙema; na maṟaṟa gang'anyi gakapaṟika.

⁵²Shilome shikaṟuguka; mmbiu ifoi ya waele wapfiie ikaamka.

⁵³Nawo wammbukye shilomenyi shawo, numa ya iṟuka lyakye, wakaiṙa na mṟinyi mweele, wandu wafoi wakawawona.

⁵⁴Kyasia mchilyi ulya, na iwo wawekyeri hamwi na oe wechiringa Yesu, kyiyeri walewona kyiriinza na chandu mbonyi tsilewa, wakaowuo mnu, wechigamba, “Ny'kyaloi ichu nawekyeri Mono-Ruwa.”

⁵⁵Hawewoṙe na waka wafoi halya wechiambuya wakyeri kuleshi. Iwo nyiwo waleosha Yesu iwuka Galyilaya, na imṟundia.

⁵⁶Kyiiṙi kyawo nawekyeri ho Maria Makyidalena, na Maria mama o Yakobo na Yosefu na mama o wana wa Sebedayo.

⁵⁷Na lyilya kuleila mndu mnjama o Arimataya ekyelago Yosefu kacha, na oe nawekyeri manalosho o Yesu.

⁵⁸Mndu-chu naleyenda ko Pilato, katerewa mmbiu o Yesu. Naaho-ng'u Pilato kagamba naenengo mmbiu-cho.

⁵⁹Yosefu kaira mmbiu ulya, kauaṟahia sandenyi ya uwiṟo,

⁶⁰kauwikyia kyilomenyi kyakye kyihya, awekyiachikyie igoenyi; kaiṟimitsia igoe lying'anyi mbele ya moongo o kyilome, kawuka ho.

⁶¹Na halya wawekyeri ho Maria Makyidalena, na Maria ulya o kawi, waṙamie weambuyana na kyilome kyilya.

⁶²Na Mfiri o kawi, numa ya mfiri o ikuṟeyeṟa lya mfiri o onyonya, wang'anyi wa makohanyi, na Mafarisayo walekooyana na Pilato,

⁶³wakagamba, “Mndumii, lokumbuo kye ulya ekyeṙeṙa wongo nalegamba kyiyeri-kyo awei na moo, ‘Numa ya mfiri iṟaṟu nechiṟuka!’

⁶⁴Kyasia gamba kye kyilome-kyi kyiringo necha mṟasa mfiri o kaṟaaṟu; wanalosho wakye walachemwiwa, na iwia wandu, ‘Naṟuka ko wapfu; na wulembi wo mafurumionyi wukong'ana kuta wulya wo mawookyionyi.’ ”

⁶⁵Pilato kawawia, “Muwoṙe asikari; yendenyi munderinga necha kyilome chandu muichi.”

⁶⁶Wakayenda, wakaringa kyilome necha, kui iwikyia igoe lyilya kyiṟingyishio kyiwoṙe mfano owo, hamwi na asikari walya waringyi.