Read Kivunjo New Testament 1999 Matayo 3 Bible Online

Matayo 3 - Kivunjo New Testament 1999 bible

Matayo 3

¹Mfiri iya Yohane Mpatisi naleyenda echionguo mbonyi ngyicha nukyenyi ya Uyuda, na igamba,

²“Ṙumbuyenyi wunyamaṟi; kyipfa Wumangyi wo ruwewu womshika kufuhi.”

³Cha kyipfa icho nyi oe alegambo nyi moonguo shisuku echigamba, “Ṟui lya mndu aieṙia nuka, ṟeyeṟenyi njia ya Mndumii, goṟotsenyi kundu echiiṙia.”

⁴Na Yohane naweṟee ikunya lya mapfukye ga ngamia na ukowa lo njonyi kyitsinyi kyakye; na kyelya kyakye nyi-we nzie na wukyi wo nguṙunyi.

⁵Naaho-ng'u wandu wa Yerusalemu waleyenda kokye, na wa Uyuda koose, na wa ngyuuruka tsoose tsa mbai ya Yoridan;

⁶na oe kawapatisa kulya mfonyi o Yoridan, wechitocha ngyuunyamaṟi tsawo.

⁷Na lyilya alewona wafoi kyiiṙi kya Mafarisayo na Masadukayo wechicha na wupatisonyi wokye, nalewawia, “Nyoe maalea ga njoka, nyi wui alemwikyimbia nyoe iṙicha nyashi-yo iicha?

⁸Kyasia kumbienyi ndunda tsiṙuṙanyi na iṙumbuya wunyamaṟi.

⁹Maa mulakusaṟe mrimenyi konyu kye, ‘Muwoṙe awu, nyi oe Abrahamu; kyipfa ngammbia kye Ruwa neiṙima kyiiṙi kya magoe-ga iiria Abrahamu wana.’

¹⁰Na soka lyammbikyio matsindenyi ga mashiṙi; kyasia orio ikyiṙi lyilekyekumbia ndunda ngyicha lyekyemanyo na iwiyitso moṙonyi.

¹¹Ny'kyaloi inyi ngyimpatisa kui mṟinga kyipfa kya iṙumbuya wunyamaṟi; kyaindi ulya aicha numa yako nawoṙe pfinya kuta inyi, ngyiwaṟi maa iira shiaṙu shakye-pfo; oe nechimpatisa kui Mumuyo Mweele na kui moṙo.

¹²Indo lyakye lyeela shindo lyikyeri kuwokonyi kokye, na oe nechiaia muului oose handu hakye heelyia shindo; na isania nganu yakye kyikumbinyi, kyaindi muului nechiurumatsa moṙonyi ulekyeruma.”

¹³Kyiyeri-kyo Yesu kacha awuka Galyilaya mṟasa Yoridan ko Yohane kundu napatiso.

¹⁴Kyaindi Yohane katambagana imshingyia, echigamba, “Inyi ngyilangyie ipatiso nyi iyoe, na iyoe nuicha na koko?”

¹⁵Yesu kagaluo kammbia, “Iṙikyia wulalu kuṙi; kyipfa nyi wuṙo kyiluwaṟi iafutsia wusumganyi woose.” Kyasia kamwiṙikyia.

¹⁶Na Yesu ampatiso cha ilyi kaṙo iwuka kulya mṟingyenyi; na mapuchi gakaseia, kawona Mumuyo o Ruwa echisokyia wuye yakye cha mbeta.

¹⁷Na ṟui lyiwukyie ruwewu lyikagamba, “Ichu nyi Mana oko, mkunde oko, ngyimchihiye kyipfa kyakye.”