Read Kivunjo New Testament 1999 Matayo 4 Bible Online

Matayo 4 - Kivunjo New Testament 1999 bible

Matayo 4

¹Numa ya iho Yesu kaṙoo nyi Mumuyo kundu ko nuka, kundu nayesho nyi Mokyiriinzi.

²Kakuretekyia mfiri makumi gaana kyio na kyingoto, mafurumionyi kawoṙo njaa.

³Myeshi kacha na kokye kammbia, “Kokooya iyoe nyi mana o Ruwa, wia magoe-ga gawe mkate.”

⁴Na oe kagaluo, kagamba, “Kyikyiṟeie, ‘Mndu echiwona moo kui mkate tikyi-pfo, kyaindi ko orio ṙeṙo Ruwa agamba.’ ”

⁵Kyasia Mokyiriinzi kamṙuo mṟasa Yerusalemu, mṟi mweele, kammbikyia wuye ya uweri lo hekalu

⁶kammbia, “Kokooya iyoe nyi Mana o Ruwa kuwiyitse wanda; kyipfa kyikyiṟeie, ‘Nechikuṙumia malaika wakye; na wechikuwaṙa mawokonyi gawo; ulachekapa ṙende igoenyi.’ ”

⁷Yesu kammbia, “Ngoseṟa kyikyiṟeie, ‘Ulayeshe Mndumii Ruwa opfo.’ ”

⁸Numa ya iho Mokyiriinzi kamṙuo fumvunyi lyileshi mnu, kamloṟa ngyuuchilyi tsoose tsa wuyana, na wung'anyi wotso,

⁹kammbia, “Ishi shoose ngyechikuenenga, kongyiindia.”

¹⁰Naaho-ng'u Yesu alemmbia, “Wuka iha, Satana, kyipfa kyikyiṟeie, ‘India Mndumii Ruwa opfo, umterewe oe amonyi.’ ”

¹¹Numa ya iho Mokyiriinzi kamleka; na malaika wakacha wakamtarama.

¹²Yesu amwicho kye Yohane Mpatisi nampfungye, naleyenda mṟasa Galyilaya.

¹³Kawuka Nasareti, kacha kakaa Kaperinaumu, mṟi ukyeri mbai ya ipalyipalyi, mṟasenyi o Sabulon na Naftalyi;

¹⁴kundu kyiafukyie kyindo kyileṙeṙo nyi moonguo shisuku Yesaya, echigamba,

¹⁵“Uruka lo Sabulon na uruka lo Naftalyi, ṟuko lya ipalyipalyi, molyolya o Yoridan, Galyilaya ya wandu walaiṙikyie Ruwa.

¹⁶Wandu walya wakyeri meemenyi wammbona saa ing'anyi, na walya wakyeri urukyenyi lo kyirinje kya upfu, ngyeela yammboneka kowo.”

¹⁷Wookyia kyiyeri-kyo Yesu nalewooka ionguo mbonyi ngyicha, na igamba, “Ṙumbuyenyi wunyamaṟi kyipfa Wumangyi wo ruwewu womtikyira kufuhi.”

¹⁸Na oe kyiyeri aweichumia mbai ya ipalyipalyi lya Galyilaya, nalewona wana wa mka wawi, Simion ekyelago Petiro na Anderea mono-wamae wechiwiyitsa ndusu tseṙeia makunga ipalyipalyinyi; kyipfa wawekyeri wandu wekyeṙega makunga.

¹⁹Kawawia, “Ngyioshenyi, na inyi ngyechimugaluo muwe wandu wekyeṙega wandu.”

²⁰Cha ilyi wakaṙa ndusu tsilya tsawo tseṙega makunga, wakamwosha.

²¹Kaengyeṟa ichumia, kawona wana wengyi wa mka wawi, Yakobo mana o Sebedayo, na Yohane mono-wamae, wakyeri ngalawenyi hamwi na Sebedayo awu-yawo, wechiachikyia ndusu tsawo tseṙega makunga; kawalaga.

²²Cha ilyi wakaṙa ngalawa iya yawo na awu-yawo wakamwosha.

²³Na oe nawetenga-tenga urukyenyi lo Galyilaya loose, echilosha masinagoginyi gawo na ilosha Mbonyi Ngyicha ya Wumangyi, na ikyiṟa ndoṟe na wufafa wo orio mbaṟe wandunyi.

²⁴Na mbonyi tsakye tsikaṙunganana urukyenyi lo Shamu loose; wakamwendie woose waweluoe, wawoṙo nyi orio ndoṟe na orio ilyiso wukyiwa, wawoṙo nyi waṟufui wawicho, na wekyeuma nguku, na wapfiie ngapfu ura lumwi; kawakyiṟa.

²⁵Na wuingyi wo wandu wukomwosha, iwookyia Galyilaya na Dekapolyi, na Yerusalemu na Uyuda, na molyolya o Yoridan.