Read Kivunjo New Testament 1999 Matayo 5 Bible Online

Matayo 5 - Kivunjo New Testament 1999 bible

Matayo 5

¹Na oe kyiyeri alewona wuingyi wo wandu, naleṙo na fumvunyi; na amṙamie, wanalosho wakye walecha na kokye.

²Kawooka iwalosha echigamba,

³“Wagusu iwo wawoṙe wukyiwa wo mrima; kyipfa Wumangyi wo ruwewu nyi wowo.

⁴Wagusu iwo wawasokyie nyi fowa; kyipfa iwo wechiwiyiṟio moo.

⁵Wagusu iwo wawoṙe wuhoo; kyipfa iwo wechioṟa uruka.

⁶Wagusu iwo wawoṙe njaa na nyoṙa ya wusumganyi; kyipfa iwo wechiigutso.

⁷Wagusu iwo wawoṙe isaṟia; kyipfa iwo wechiwona isaṟia.

⁸Wagusu iwo wawoṙe mrima mmbaṙami; kyipfa iwo wechiwona Ruwa.

⁹Wagusu iwo wekyeende ufoṟo; kyipfa iwo wechilago wana wa Ruwa.

¹⁰Wagusu iwo wechipfulutso nyashi kyipfa kya iwa wasumganyi; kyipfa Wumangyi wo ruwewu nyi wowo.

¹¹Wagusu nyoe ilyi wechimkapa kyipfa kya wusumganyi na impfulutsa nyashi na imuiria orio kyindo kyiwicho kui wongo, kyipfa kyako.

¹²Chihiyonyi, na ikyesa; kyipfa wori wonyu nyi wung'anyi ruwewu. Kyipfa nyi wuṙo walepfulutsa nyashi weonguo shisuku walemusongoya nyoe.”

¹³“Nyoe nyi munyu o wuyana. Kyaindi munyu ukyeri unyamaṟikyie owiko-kyi mṟasa uṙahie? Ochiwaṙa-se kyiira maa ale-pfo, sile iwiyitso nja na ichumo-chumo nyi wandu.

¹⁴Nyoe nyi saa ya wuyana. Mṟi oiṙima ikuṟiika ukyeri wuye ya fumvu-pfo.

¹⁵Maa wandu wekyekoṟa taa na iiwikyia handu hakuṟiikyie-pfo, kyaindi handu hakuirie; nayo ikalyimikyia woose wakyeri numba.

¹⁶Na wuṙo ngyeela yanyu ilyimikye mbele ya wandu, waiṙime iwona mawuto ganyu mecha, waṟumishe Awu-yonyu akyeri ruwewu.”

¹⁷“Mulakusaṟe kye ngyilecha iilacha mawawaso na shilya weonguo shisuku wagambie. Ote. Ngyilecha iilacha-pfo, kyaindi iichuṟia.

¹⁸Kyipfa, ny'kyaloi, ngammbia, mṟasa kyiyeri ruwewu na uruka shechiwuka ho, maa kyindo kyitung'tu kya mawawaso kyechiwuka ho-pfo, mṟasa shoose shiafukyie.

¹⁹Kyasia mndu oose echinyamaṟa iwawaso lyimwi kyiiṙi kya iga gai matutu, na ilosha wandu kuṙo, nechilago mtutu kuta woose Wumangyinyi wo ruwewu; kyaindi mndu echigaosha na igalosha, icho nechilago ang'anyi Wumangyinyi wo ruwewu.

²⁰Kyipfa ngammbia-kye wusumganyi wonyu wulandeng'anie wulya wo walosha wa mawawaso na Mafarisayo, mochiiṙa maa ale na Wumangyinyi wo ruwewu-pfo.”

²¹“Mulemuicho chandu wandu wa kacha walewio ulawaage; na mndu kawaaga kyimmbaṟi ianduyo.

²²Kyaindi inyi ngammbia, orio mndu mokapo nyi nyashi kyipfa kya mono-wamae kyimmbaṟi ianduyo. Na mndu molahia mono-wamae, kyimmbaṟi iṙeṙio moondu. Na mndu kamlaga tondo, kyimmbaṟi ngyehena ya moṙo.

²³Kyasia koende kyiano kyapfo na mbele ya Ruwa, na kunu kokumbuo kye mono-womoo nawoṙe ṙeṙo na iyoe,

²⁴ṙa kyiano-kyo kyapfo mbele ya Ruwa, uyende, uachikyie kuwooka mbonyi tsapfo na mono-womoo, numa uwuye uenengyie kyiano kyapfo.

²⁵Achikyia iwinyi mbonyi tsapfo na ulya uwoṙe na oe moondu kyiyeri uṙuṙanyi na oe njienyi; ulya uwoṙe na oe moondu alachekuṙuo ko moṙumbuo moondu, na moṙumbuo moondu kakuṙuo ko asikari, kowiyitso kyipfungonyi.

²⁶Ny'kyaloi, ngakuwia, ochiwuka pfo maa ale-pfo mṟasa umarise itaa helo iya ya mafurumionyi.”

²⁷“Muleicho kye kyikyigambe, ulaṟuguye maa ulaṟuguyo.

²⁸Kyaindi inyi ngammbia orio mndu aambuya mndu mka kui imlanga, amumṟuguya ipfo mrimenyi kokye.

²⁹Riso lyapfo lya kulyoe lyikakutewe, lyikuluoe ulyiwiyitse kuleshi na iyoe; kyipfa kyikuwaṟi kyoonyi kyapfo kyimwi kyiṙekye kundu mmbiu opfo oose ulawiyitso ngyehenenyi.

³⁰Na kuwoko kopfo ko kulyoe kukokutewe, ṙumbuo kuwoko-ko uwiyitse kuleshi na iyoe. Kyipfa kyikuwaṟi kyoonyi kyapfo kyimwi kyiṙekye, kundu mmbiu opfo oose ulawiyitso ngyehenenyi.”

³¹“Kyiwekyiṙeṙe taa, mndu kaṙa mka okye, namwenengye kyiṟeio kyelekana na oe.

³²Kyaindi inyi ngammbia, orio mndu aṙa mka okye, sile ko mbonyi tsa wuṟui, namgaluo mṟui; na mndu kaalyika ulya aṙio naṟuguya.”

³³“Ngoseṟa mulemuicho chandu wandu wa kacha walewio, ulalye nyamu kui rina lya Ruwa, kyaindi afutsia nyamu tsapfo ko Mndumii.

³⁴Kyaindi inyi ngammbia, molalye nyamu maa ale; maa kui ruwewu, kyipfa ikyo nyi kyiṙi kya Ruwa kya wuchilyi.

³⁵Maa kui uruka, kyipfa nyiho hewikyia maṙende gakye; maa kui Yerusalemu, kyipfa nyicho mṟi o mangyi ang'anyi.

³⁶Maa ulalye nyamu kui mṙoe opfo, kyipfa oiṙima igaluo uchui lumwi iwa uwiṟo ang'u njuu-pfo.

³⁷Kyaindi maṙeṙo ganyu gawe yee, yee; ote, ote; kyipfa gaelewetsie igo gawukyie ko ulya mmbicho.”

³⁸“Mulemuicho kye kyikyigambe, riso ko riso, na yego ko yego;

³⁹kyaindi inyi ngammbia, mulawingane na mndu mmbicho; kyaindi mndu akukapa nguchu ya ura lo kulyoe, mgalutsie na nguchu ya kawi.

⁴⁰Na mndu akundi ikulaga moondunyi na iṙuo iwale lyapfo, mṙeeye na ijoho taa.

⁴¹Na mndu echikuitika uyende na oe mailyi imwi, yenda na oe tsiwi.

⁴²Akuterewa, mwenengye; na mndu akundi iakuo kopfo ulamwime.”

⁴³“Mulemuicho kye kyikyigambe, ukunde momṟasa opfo, na usuo mokyituwa opfo.

⁴⁴Kyaindi inyi ngammbia, kundenyi washituwa wanyu, terewienyi walya waimpfulutsa nyashi;

⁴⁵kundu muiṙime iwa wana wa Awu-yonyu akyeri ruwewu. Kyipfa oe nekyeenenga mmbaṟi okye wawicho na wecha, nekyeolotsia mvuo wasumganyi na walai wasumganyi.

⁴⁶Kyipfa mukokunda wamukundi nyoe tupu, mowona wori wuha? Maa wesania ukamba, wekyeṟunda isho isho-pfoe?

⁴⁷Ngoseṟa mukoiṟikyiṟa wana wa wamanyu tupu, moṟunda kyi kya ngoseṟa? Maa wandu walaiṙikyie Ruwa wekyewuta cha isho-pfoe?

⁴⁸Kyasia nyoe mochiwa wandu walawoṙe mti, chandu Awu-yonyu o ruwewu alawoṙe mti.”