Read Kivunjo New Testament 1999 Matayo 6 Bible Online

Matayo 6 - Kivunjo New Testament 1999 bible

Matayo 6

¹“Mulaloṟe wucha wonyu mbele ya wandu, kundu wamuambuye. Kyipfa mukoṟunda muṙo, mowona wori ko Awu-yonyu akyeri ruwewu-pfo.

²Kyasia kyiyeri-kyo uienengyia kyiano kyesaṟia molakushele, chandu wakulembecheṟi wekyewuta ipfo masinagoginyi na njienyi, kundu waṟumisho nyi wandu.

³Ny'kyaloi, ngammbia, wammbona wori wowo. Kyaindi kyiyeri iyoe uienengyia kyiano kyesaṟia, maa kuwoko kopfo ko kumoso kulamanye kyindo kuwoko kopfo ko kulyoe kuiṟunda.

⁴Kyiano kyapfo kyesaṟia kyiwe kui kyiṟika; na Awu-yopfo ulya ekyewona maa shilya shikuṟiikyie nechikuenenga iṟikoso.”

⁵“Ngoseṟa kyiyeri muiterewa, mulawe cha wakulembecheṟi; kyipfa wo wakundi iterewa wagoṟokyi masinagoginyi na mbai ya njia, kundu wawono nyi wandu. Ny'kyaloi, ngyimmbia, wamuambilyia wori wowo.

⁶Kyaindi iyoe kyiyeri-kyo uiterewa, iṙa na kyiṟinyi kyapfo uwiirie moongo, na komshinga moongo opfo, uterewe mbele ya Awu-yopfo akyeri handu hakuṟiikyie; na Awu-yopfo ekyewona maa shilya shikuṟiikyie nechikuenenga iṟikoso.

⁷Na nyoe kyiyeri-kyo mukyeri kyiterewonyi, mulagambe shindo shifoi shilawoṙe kyiira, cha wandu walaichi Ruwa, kyipfa wo wekyekusaṟa kye wechiaṙanyio kyipfa kya maṙeṙo gawo iwa gafoi.

⁸Kyasia mulawe cha iwo; kyipfa Awu-yonyu naichi shilya mukundi maa nyoe mulamterewa.

⁹Kyasia nyoe terewenyi kuṙi, ‘Awu-yoṙu ukyeri ruwewu, Rina lyapfo lyitano lyiele,

¹⁰Wumangyi wopfo wuche, kyindo ukundi kyiṟundikye, iha wuyanenyi cha kulya ruwewu.

¹¹Uluenengye kando kaṙu inu.

¹²Uluhooṟie maṙeko gaṙu, chandu na soe lokyehooṟia walya wekyeluṙekyio.

¹³Na ulaluṙuo kyiyeshionyi, kyaindi ulukyiṟe ngyeṟo tsa ulya mmbicho. [Cha kyipfa Wumangyi nyi wopfo, na pfinya, na mng'ano, mṟasa mlungana. Amen.’ ”]

¹⁴“Cha kyipfa mukohooṟia wandu maṙeko gawo, na Awu-yonyu o ruwewu nechimuhooṟia nyoe.

¹⁵Kyaindi mulandehooṟie wandu maṙeko gawo, maa Awu-yonyu echimuhooṟia nyoe maṙeko ganyu-pfo.”

¹⁶“Ngoseṟa kyiyeri moṙumbuo ikuretekyia kundu muṟumishe Ruwa, mulawe cha wakulembecheṟi wawoṙe shaam shiwoṙe nzineeri. Kyipfa wekyenyamaṟa shaam shawo, kundu wawono nyi wandu kye wailya maa inyo-pfo. Ny'kyaloi ngammbia, wamuambilyia wori wowo.

¹⁷Kyaindi iyoe kyiyeri okuretekyia, kushie mafuṙa mṙoenyi, usambe kyaam;

¹⁸kundu ulawono nyi wandu kye nokuretekyia, sile nyi Awu-yopfo akyeri handu hakuṟiikyie, na Awu-yopfo ekyewona maa shilya shikuṟiikyie nechikuenenga iṟikoso.”

¹⁹“Mulakoome shindo sha woguru kyipfa kyanyu iha wuyanenyi, handu mashinu na koṟa shekyenyamaṟa, na mbafu tsekyefunja na iiwa.

²⁰Kyaindi koomenyi shindo sha woguru kyipfa kyanyu ruwewu, kulekyenyamaṟika kyindo kyipfa kya mashinu maa koṟa, maa mbafu tsilekyefunja na iiwa.

²¹Kyipfa handu kyindo kyapfo kya woguru kyikyeri na ho-ndu na mrima opfo ochikaa.”

²²“Taa ya mmbiu nyi riso. Kyasia riso lyapfo lyechiṟunda necha mmbiu opfo oose ochiwaṙa ngyeela.

²³Kyaindi riso lyapfo lyikanyamaṟika, mmbiu opfo oose ochiwaṙa meema. Kyasia ngyeela iya ikyeri kopfo ikawa meema; nyi meema ung'anyi mnu!”

²⁴“Kuwoṙe mndu echiiṙima iṟundia wandumii wawi-pfo; cha kyipfa nechisuo ichu, na ikunda ichu; ang'u nechikuwaṙa na ichu na imina ichu. Moiṙima iṟundia Ruwa na masaa-pfo.

²⁵Kyipfa kya ikyo ngammbia, mulawinie moo yanyu, mulye kyi ang'u munyo kyi; maa mmbiu yanyu muṟaae kyi. Moo chi ngoseṟa ya kyelya, na mmbiu chi ngoseṟa ya kyindo kyeṟaa?

²⁶Ambuyenyi shileye sha ngyinenyi kye shekyeṙonga-pfo, maa shekyesambuo-pfo, maa shekyesania kyikumbinyi-pfo; na awu-yonyu o ruwewu nekyeshiembeṟa shoose. Nyoe muwoṙe woguru wung'anyi kuta shileye-sho-pfoe?

²⁷Nyi wui konyu maa kakuwinisha eiṙima iengyeṟa maa ale mfiri yakye ya iha wuyanenyi?

²⁸Kyatarama kyi iwinia shindo sheṟaa? Kusaṟenyi kya shiwaṟo sha maṙemenyi, chandu shekyeṙo. Shekyeṟunda-pfo, maa shekyeoka-pfo.

²⁹Na inyi ngammbia kye maa Solomon mng'anonyi okye oose aleṟiko necha cha shiwaṟo-shi pfo.

³⁰Kyasia, kokooya Ruwa nekyeṟika kuṙo melyi tsa maṟa gai ho inu na ngama gakawiyitso moṙonyi, ngyesa echimṟika nyoe lya ngoseṟa, nyoe wa iiṙikyia lyifofo-pfoe?

³¹Kyasia mulakuwinishe, mochigamba, lulye kyi, ang'u lunyo kyi, ang'u lpṟaae kyi?

³²Cha kyipfa isho shoose wandu walaṙikyie Ruwa wekyeshipfula. Na awu-yonyu o ruwewu naichi kye mukundi isho shoose.

³³Kyaindi pfulenyi kuwooka Wumangyi wokye, na wusumganyi wokye; na isho shoose mochiengyeṟio.

³⁴Kyasia mulakuwinishe na sha ngama; kyipfa ngama yekuwinia imonyi. Kyishikyie ikuwinisha orio mfiri na ngyuukyiwa tsa mfiri-cho.”