Read Kivunjo New Testament 1999 Mariko 1 Bible Online

Mariko 1 - Kivunjo New Testament 1999 bible

Mariko 1

¹Iyi nyi Ndumi Ngyicha ya Yesu Kristo, Mono-Ruwa,

²chandu ingyiṟeie nyi moonguo shisuku Yesaya, “Ambuya, ngyiṙuma mndu awoṙe ulogo loko, mbele ya ushangu lopfo, echiachikyia njia yapfo,

³Ṟui lya mndu aipoṟogoṟia nuka, reyeṟenyi njia ya Mndumii, Goṟotsenyi kundu echiiṙia.”

⁴Yohane nalewoneka, echipatisia kundu ko nuka, na ionguo mbonyi, kundu wandu waṙumbuye wunyamaṟi na ipatiso; na Ruwa nawahooṟie maṙeko.

⁵Wandu wafoi mnu wa uruka lo Uyuda wakayenda kokye, na wandu wa Yerusalemu, wakapatiso mfonyi o Yoridan, wechitocha wunyamaṟi wowo.

⁶Na Yohane naweṟee mapfukye ga ngamia na ukowa lo njonyi kyitsinyi kyakye, kalya nzie na wukyi wo nguṙunyi.

⁷Kalosha echigamba, “Numa yako kuicha awoṙe pfinya kuta inyi. Icho inyi ngyiwaṟi iarama na ituruchuo ngowa tsa shiaṙu shakye-pfo.

⁸Inyi ngyilempatisa nyoe kui mṟinga; indi oe nechimpatisa nyoe kui Mumuyo Mweele.”

⁹Kyasia mfiri iya, Yesu nalecha awuka Nasareti ya Galyilaya, kapatiso nyi Yohane kulya Yoridan.

¹⁰Na chailyi kyiyeri aleṙo awuka mṟingyenyi, kawona mapuchi geseia na Mumuyo, cha mbuna, echimsokyia.

¹¹Na ṟui lyikawuka ruwewu, lyikagamba, “Iyoe nyi oe Mono-ko, mkunde oko; ngyimchihiye kyipfa kyapfo.”

¹²Cha ilyi Mumuyo kammbuta nayende kundu ko nuka.

¹³Kakaa ipfo nukyenyi ngyiumu suwaa ilawoṙe maa mṟinga mfiri makumi gaana, echiyesho nyi Satana. Na oe nawekyeri hamwi na mando ga saka, na malaika wawemṟundia.

¹⁴Kyasia Yohane ammbiko kyipfungonyi, Yesu kayenda Galyilaya, echionguo Mbonyi Ngyicha tsa Ruwa,

¹⁵echigamba, “Kyiyeri kyamshika, na Wumangyi wo Ruwa womtikyira kufuhi; ṙumbuyenyi wunyamaṟi na iiṙikyia Ndumi Ngyicha.”

¹⁶Na oe kyiyeri aweiiṙa mbai ya ipalyipalyi lya Galyilaya, kawona Simion na Anderea, mono-wamae, wechiwiyitsa iṟambika ipalyipalyinyi; cha kyipfa wawekyeri wandu wekyeṙeia makunga.

¹⁷Yesu kawawia, “Nnjonyi mungyioshe, na inyi ngyemugaluo wandu wekyeṙega wandu.”

¹⁸Cha ilyi wakaṙa ngowa tsawo tseṙega makunga, wakamwosha.

¹⁹Kayenda mbele kyitutu, kawona Yakobo o Sebedayo na Yohane, mono-wamae; nawo taa wawei ngalawenyi, wechiachikyia ngowa tsawo tseṙega makunga.

²⁰Cha ilyi kawalaga, wakaṙa awu-yawo Sebedayo ngalawenyi hamwi na wandu wa wori, wakayenda, wakamwosha.

²¹Wakayenda mṟasa Kaperinaumu, na cha ilyi mfiri o onyonya kaiṙa na sinagoginyi, kalosha.

²²Wakaṟiyio mnu kyipfa kya malosho gakye; cha kyipfa naweiwalosha cha mndu awoṙe wuchilyi, maa chi cha walosha wa mawawaso-pfo.

²³Na cha ilyi hawewoṙe sinangoginyi lyawo mndu awoṙo nyi mṟufui mmbicho. Kakuilenga na ṟui lying'anyi,

²⁴echigamba, “Luwoṙe kyi na iyoe, Yesu o Nasareti? Ngyesa nocha ilurumatsa?

²⁵Ngyikuichi iyoe nyi Mweele o Ruwa.” Yesu kamṙeṙia, echigamba, “Tsia sau, uwukye ko mndu-chu.”

²⁶Mṟufui ulya mmbicho kamṙeṙemsha cha mndu ekyeuma nguku, kafiiṟa na ṟui lying'anyi, kammbuka.

²⁷Wakaṟiyio woose, mṟasa wakawesana, wechigamba, “Ny'kyikyi ikyi? Nyi wuṟango wuhya! Kyipfa kui wuchilyi naiṙeṙia maa waṟufui wawicho, nawo wakamwindia!”

²⁸Cha ilyi mbonyi tsakye tsikaṙunganana orio handu ngyuurukyenyi tsoose tsa mṟasenyi o Galyilaya.

²⁹Na kyiyeri walewuka sinagoginyi, waleshika kanyi ko Simion na Anderea, hamwi na Yakobo na Yohane.

³⁰Na mamka o Simion, nawekyeri kyitaṟenyi, nawoṙo nyi isemu; na cha ilyi wakammbia mbonyi tsakye.

³¹Katikyira kufuhi na oe, kammbaṙa kuwoko kokye kamwira, isemu lyikamleka, kawaṟundia.

³²Kyasia kyiyeri kuleila, na mnengyeṟi omwolokyie, wawemwendie woose walawekuiṙima, na wawoṙo nyi waṟufui wawicho.

³³Na wandu wafoi mnu wa mṟi ulya wawekuumbie moongonyi.

³⁴Kakyiṟa wafoi wawewoṙe ndoṟe tsa orio mbaṟe, kawuta waṟufui wafoi wawicho, maa alelekyia waṟufui wawicho iṙeṙa-pfo, cha kyipfa wawemwichi.

³⁵Kyasia ngamenyi utuko, kafuma kayenda handu halawoṙe wandu, kandeterewa.

³⁶Simion na oṙoe wakamwosha.

³⁷Nawo kyiyeri walemmbona wakammbia, “Wandu woose waikupfula.”

³⁸Kawawia, “Sindenyi handu hengyi, mṟasa shikaṟo shikyeri kufuhi, na ipfo ngyiiṙime ionguo pfo mbonyi; kyipfa ikyo nyikyo kyilengyiende.”

³⁹Kayenda echionguo mbonyi masinagoginyi gawo, urukyenyi loose lo Galyilaya, na iwuta waṟufui wawicho.

⁴⁰Mndu awoṙo nyi taambo kacha na kokye, echimpfiria ndi, na imterewa, echigamba, “Kokunda noiṙima ingyulyisha na ingyiwuta ndoṟe-i.”

⁴¹Na oe kawona fowa mrimenyi kyipfa kyakye, kalesha kuwoko kokye, kampaaya, kammbia, “Ngyikundi, ila.”

⁴²Na cha ilyi taambo lyakye lyikammbuka, kaila.

⁴³Kamwima na pfinya, kammbuta ho cha ilyi,

⁴⁴kammbia, “Ulawie mndu kyindo kyoose, indi yenda undekuloṟa ko mkohanyi, undeenengyia kyiṙaso chandu Mose alegamba kyipfa kya iila lyapfo, kyiwe wuṟingyishi kowo.”

⁴⁵Kyaindi kafuma, kuwooka iṙeṙa maṙeṙo gafoi, na igamba kyindo kyilya, mṟasa Yesu alaiṙime-se iiṙa na mṟinyi kulawoṙe ikuṟiika; indi nawekyeri nja handu halawoṙe wandu. Wandu wakayenda kokye wawuka ngyuura tsoose.