Read Kivunjo New Testament 1999 Mariko 11 Bible Online

Mariko 11 - Kivunjo New Testament 1999 bible

Mariko 11

¹Na kyiyeri wawei kufuhi na Yerusalemu, kufuhi na Betifage na Betania, iambuyana na fumvu lya mashiṙi ga mseituni, naleṙuma wawi kyiiṙi kya wanalosho wakye,

²kawawia, “Yendenyi mṟasa kyikaṟo kyilya kyiambuyanyi na nyoe; na mukoiṙa napfo, cha ilyi mochiwona igache lya nzoi, lyilandeṙamilyio nyi mndu; lyipfunguonyi, mulyiende.

³Na mndu kammbia, ‘Ny'kyilyi muiwuta kuṙi?’ gambenyi ‘Mndumii kuwoṙe kyindo aindeṟunda nalyo, na cha ilyi nechilyiwiyiṟa-se na iha.’ ”

⁴Wakayenda, wakawona igache lya nzoi lyilyipfungye moongonyi, njienyi ing'anyi.

⁵Wandu waata wawegoṟokyi halya-ndu waleṙumo wakawawia, “Ny'kyilyi muipfunguo igache-lyi lya nzoi?”

⁶Wakawawia chandu Yesu alewawia, nawo wakawaenenga momu.

⁷Wakaendie Yesu igache lyilya lya nzoi, wakaala mawale gawo wuye yalyo; kalyiṙamilyia.

⁸Wandu wafoi wakaala mawale gawo njienyi, na wengyi maṟamba walefunja maṙemenyi.

⁹Na wandu wawesongoye na walya wawei numa wakakuilenga wechigamba, “Hosiana; nyi oe ammbikyie mboṟa ulya aicha kui rina lya Mndumii.

¹⁰Wumangyi wuicha wo awu-yoṙu Dawidi wuwuwikyie mboṟa. Hosiana wuye ruwewu.”

¹¹Na oe kaiṙa na Yerusalemu mṟasa hekalunyi; na kyiyeri amwambuye shoose ngyuura tsoose, cha kyipfa nyi kyiyeri kya kyukonyi, kafuma, kayenda Betania hamwi na walya ikumi na wawi.

¹²Na lyilya kulekya kyiyeri walewuka Betania nalewoṙo nyi njaa.

¹³Kuleshi na oe kawona mfumu uwoṙe maṟa, kayenda kundu nawone kokooya uwoṙe ndunda; na kyiyeri aleshika halya-ndu uwekyeri alewona kyindo sile maṟa-pfo; kyipfa chi kyiyeri kya ikumbia ndunda-pfo.

¹⁴Kagaluo kauwia, “Wookyia inu mṟasa mlungana mndu alalye ndunda kopfo.” Wanalosho wakye wakaicho.

¹⁵Wakashika Yerusalemu, na oe kaiṙa na hekalunyi, kawooka ifuna walya waweikapa mbucha kulya hekalunyi, kapfuluo mesa tsa weilacha heleri, na shiṙi sha walya wekyekumba mbeta.

¹⁶Maa aleenenga mndu momu o iitsia kyindo kulya hekalunyi-pfo.

¹⁷Kalosha, kagamba, “Ngyesa kyikyiṟeie kye numba yako yechiwa yeterewia masanga goose-pfoe? Indi nyoe moigaluo iwa usanja lo wasokyi.”

¹⁸Wang'anyi wa makohanyi na walosha wa mawawaso wakamanya mbonyi wakapfula chandu wechimrumatsa; kyipfa walemwowuo, cha kyipfa wuingyi woose wo wandu waleṟiyio kyipfa kya malosho gakye.

¹⁹Na lyilya kuleila kawuka kulya mṟinyi.

²⁰Na ngamenyi kyiyeri waweiṙa, walewona mfumu ulya uumie nakamwi.

²¹Petiro kakumbuo mbonyi tsa mfumu ulya, kammbia, “Mlosha, ambuya, mfumu ulya uleusesa omwuuma.”

²²Yesu kagaluo, kammbia, “Iṙikyienyi Ruwa.

²³Ny'kyaloi ngammbia, orio oose echiwia fumvu-lyi, kuluka undewiyitso ipalyipalyinyi, maa alawe moilacha-ilacha kyilya aiṙikyie mrimenyi, indi naiṙikyie kye isho agamba shaafukyia, shechiwa kuṙo.

²⁴Kyipfa kya ikyo ngammbia, orio kyoose moterewa ilyi muiterewa iṙikyienyi kye moshiambilyia, nasho shechiwa shanyu.

²⁵Na nyoe orio kyiyeri mogoṟoka na iterewa, hooṟienyi, orio ṙeṙo muwoṙe na mndu; kundu na Awu-yonyu akyeri ruwewu namuhooṟie nyoe maṙeko ganyu. [

²⁶Kyaindi kokooya nyoe mulaihooṟia, maa Awu-yonyu akyeri ruwewu echimuhooṟia nyoe maṙeko ganyu-pfo.]”

²⁷Wakashika-se Yerusalemu. Na kyiyeri aweichumia hekalunyi, wang'anyi wa makohanyi, na walosha wa mawawaso na wasongoru wa wandu waleyenda kokye.

²⁸Wakammbia, “Nyi kui wuchilyi wuha uiṟunda shindo-shi? Na nyi wui alekuenenga wuchilyi uṟunde ishi?”

²⁹Yesu kawawia, “Ngyechimmbesa kyindo kyimwi, na nyoe mungyigaluoe; naaho-ng'u ngyechimmbia nyi kui wuchilyi wuha ngyiṟunda ishi.

³⁰‘Wupatiso wo Yohane wulewuka ruwewu, ang'u ko wandu?’ Ngyigaluonyi.”

³¹Wakawesana wo wenyi ko wenyi, wechigamba, “Kokooya logamba wulewuka ruwewu negamba, ‘Ny'kyilyi-ng'u mulalemwiṙikyia?’

³²Indi lukogamba, ‘Wulewuka ko wandu…’”, waleowuo wandu, kyipfa wandu walewona Yohane cha mwikyimbi nakamwi.

³³Wakagaluo Yesu wakagamba, “Luichi-pfo.” Yesu kawawia, “Maa inyi ngyimmbia nyoe nyi kui wuchilyi wuha ngyiṟunda ishi-pfo.”