Read Kivunjo New Testament 1999 Mariko 15 Bible Online

Mariko 15 - Kivunjo New Testament 1999 bible

Mariko 15

¹Na kyiyeri kulekya wang'anyi wa makohanyi walewaṙa kyisanzionyi hamwi na wasongoru wa wandu na walosha wa mawawaso na mengye yoose, wakapfunga Yesu, wakamṙuo mbele ya Pilato.

²Pilato kammbesa, “Iyoe nyi oe mangyi o Wayuda?” Kagaluo, kammbia, “Iyoe nogamba.”

³Na wang'anyi wa makohanyi wawemwanduya shindo shifoi.

⁴Pilato kammbesa-se, echigamba, “Ugaluo kyindo? Ambuya nyi shindo shinga waikuanduya!”

⁵Maa Yesu alegaluo kyindo-se-pfo, mṟasa Pilato kaṟiyio.

⁶Kyasia kyiyeri kya mfiri ung'anyi nekyewapfunguya mpfungo umwi wamkundi.

⁷Hawewoṙe mndu umwi ekyelago Baraba, nampfungye hamwi na walya walelya wuṟiingyi, na iwaaga kyiiṙi kya wuṟiingyi-wo.

⁸Wandu wa kyisanzionyi wakacha wakawooka iterewa nawawutie chandu aweichiwie.

⁹Pilato kawagaluo, echigamba, “Ngyesa, mukundi ngyimpfunguye mangyi o Wayuda?”

¹⁰Cha kyipfa nalemanya kye wang'anyi wa makohanyi wamṙambika kokye kui wunyenyi.

¹¹Kyaindi wang'anyi wa makohanyi wakaamtsa kyituṟu kyiiṙi kya walya wawesanzie halya, kye nanga wapfunguyo Baraba.

¹²Pilato kagaluo-se, kawawia, “Kyasia ngyimmbutie kyi ichu mugamba kye nyi mangyi o Wayuda?”

¹³Wakakalagatsa-se, “Mkapie msalabenyi.”

¹⁴Pilato kawawia, “Nyi wuwicho wuha alewuta?” Wakaengyeṟa mnu ikalagatsa, “Mkapie msalabenyi.”

¹⁵Pilato akundi ichihiṟa walya wasanzie halya, kawapfunguya Baraba; kawuta Yesu, numa ya igamba nakapo na ngowa, kundu nakapio msalabenyi.

¹⁶Na asikari wakamṙuo mṟasa Praitorio (kyimwi na igamba numba ya wuchilyi), wakasanzia ho asikari walya wengyi woose.

¹⁷Wakamṟika iwale lya kyimaande-maande, wakaoka oṟo ya msha, wakaimṟika mṙoenyi.

¹⁸Wakawooka imwiṟikyiṟa, “Lokuiṟikyiṟa, Mangyi o Wayuda!”

¹⁹Wakamkapa na upoi mṙoenyi, wakampuchia maṙa, wakapfiria ndi, wakamwindia.

²⁰Na wamumkape makuukuu, wakammbuta iwale lyilya lyakye lya kyimaande-maande, wakamṟika mawale gakye amonyi; wakamṙuo nja kundu wamkapie msalabenyi.

²¹Wakaitika mndu aweiiṙa, awukyie mṙemenyi, Simion o Kyirene, awu-yawo Iskanda na Ṟufo, kundu naṙuo msalaba okye.

²²Wakamwende mṟasa handu hekyelago Golyigota, kyimwi na igamba, “Ipoṟong'u.”

²³Wakamwenenga mpfinyo ummbikye manemane, alaambilyie.

²⁴Wakamkapia msalabenyi, wakagawa mawale gakye, wakagakapia kuṟu kuha orio mndu naṙuo kyi.

²⁵Kyasia kyiwekyeri kyiyeri kya saa tsiṟaaṟu, nawo wakamkapia msalabenyi.

²⁶Hawewoṙe na kyiṟeio kya ianduyo lyakye kyigambie, “MANGYI O WAYUDA.”

²⁷Na hamwi na oe walekapia msalabenyi wasokyi wawi, umwi kuwoko kokye ko kulyoe na umwi kuwoko kokye ho kumoso. [

²⁸Kyasia kyiṟeio kyikaafutsio kyigambie, “Naletalo hamwi na wefunja mawawaso.]”

²⁹Na wandu waweiṙa njienyi wakamlahia, wechisunza-sunza mṙoe, wechigamba, “Mwambuye! Iyoe mounduo hekalu na ilyiwika mfirinyi iṟaṟu,

³⁰kukyiṟe mrima opfo, usokye msalabenyi.”

³¹Na wuṙo na wang'anyi wa makohanyi wakamkapa makuukuu, hamwi na walosha wa mawawaso, wechigamba, “Nalekyiṟa wengyi, aiiṙima ikukyiṟa amonyi-pfo.

³²Kristo, mangyi o Isiraelyi, nasokye wulalu msalabenyi luiṙime iwona na iiṙikyia. Maa walya walekapio msalabenyi hamwi na oe wakamṙeṙia maṙeṙo mawicho.”

³³Na kyiyeri kulewa saa tsiṟandaaṟu, kukowaṙa meema urukyenyi koose, mṟasa saa kyenda.

³⁴Na saa kyenda Yesu kakuilenga na ṟui lyakye ko pfinya, “Eloi, eloi, lama sabakyitani?” Ikyo kyagamba, “Ruwa oko, Ruwa oko, ny'kyilyi ongyiṙa?”

³⁵Na wandu waata wawegoṟokyi halya, walegamba, “Nailaga Elyiya.”

³⁶Na umwi kakapa mteeṟa, kaichuṟa kyindo kyekyetarang'ia kyindonyi kyekyeongyia mṟinga, kakyiwikyia upoinyi, kamrutsa, echigamba, “Lekyenyi, luwone kokooya Elyiya neecha imsotsa msalabenyi.”

³⁷Na Yesu kafiiṟa na pfinya kalekyia moo.

³⁸Isulyia lyeshingyia hekalunyi lyikaranduka kawi wookyia wuye mṟasa wanda.

³⁹Kyasia mchilyi ulya, awegoṟokyi ho iambuyana na oe, kyiyeri alewona kye nalelekyia moo mbaṟe-yo, kagamba, “Loi mndu-chu nawekyeri Mono-Ruwa.”

⁴⁰Hawewoṙe na waka waiambuya wakyeri kuleshi; kyiiṙi kyawo hawewoṙe Maria Makyidalena, na Maria wama o Yakobo ulya mtutu na Yose, na Salome.

⁴¹Iwo nyiwo waleoshana na oe ipfo Galyilaya, na imṟundia; na wengyi wafoi waleṙo hamwi na oe mṟasa Yerusalemu.

⁴²Na kommbe kyukonyi, cha kyipfa nyi Ikuṟeyeṟa, nyicho mfiri osongoya mfiri o onyonya,

⁴³Yosefu, mndu o Arimataya, mndu ekyeindio, mndu o mengye yeanduya wandu, na oe naweiweṙelyia iafukyia lya Wumangyi wo Ruwa; kayenda kulawoṙe wuowu, mṟasa mbele ya Pilato katerewa mmbiu o Yesu.

⁴⁴Kyaindi Pilato kaṟiyio, kye ampfa. Kalaga mchilyi ulya kammbesa kokooya ampfa kyiyeri kyileshi kyamwiṙe.

⁴⁵Na ammbone wuṟingyishi ko mchilyi ulya, kaenenga Yosefu mnying'a ulya.

⁴⁶Na oe kaguṟa sanda, kamsotsa msalabenyi, kamwaṟahia sanda iya, kammbika kyilomenyi kyiwekyiachikyie iṟaṟenyi; kawikyia igoe mbele ya moongo o kyilome.

⁴⁷Na Maria Makyidalena na Maria mama o Yose wakaambuya handu alewikyio.