Read Kivunjo New Testament 1999 Mariko 16 Bible Online

Mariko 16 - Kivunjo New Testament 1999 bible

Mariko 16

¹Na mfiri o onyonya omwiṙe Maria Makyidalena na Maria mama o Yakobo na Salome waleguṟa mafuṙa gekyepfaama necha waiṙime indemshia.

²Na ngamenyi utuko, mfiri o kuwooka o juma, wakayenda kyilomenyi, kyiyeri mnengyeṟi uweiṙo;

³wakawesana wo wenyi ko wenyi, “Nyi wui echiwuta igoe lyilya halya moongonyi o kyilome?”

⁴Na lyilya waleambuya walewona kye igoe lyilya lyammbuto ho; nalyo lyiweng'anyi mnu.

⁵Wakaiṙa na kyilomenyi wakawona manakye aṙamie kuwoko ko kulyoe, aṟee iwale lya uwiṟo; wakaṟiyio.

⁶Na oe kawawia, “Mulaṟiyio. Muipfula Yesu Mnasareti; alekapio msalabenyi. Amṟuka; akyeri iha-pfo. Ambuyenyi handu walemmbikyia.

⁷Kyaindi yendenyi, mundewia wanalosho wakye, na Petiro, kye namsongoi iyenda Galyilaya; ipfo mochimmbona, chandu alemmbia.”

⁸Wakafuma na nja, iwuka kulya kyilomenyi weṙicha; cha kyipfa walewoṙo nyi iṙeṙema na iṟiyio. Maa walewia mndu kyindo-pfo, kyipfa waleowuo. [

⁹Na oe kyiyeri aleṟuka mfiri o kuwooka o juma, nalewoneka ko Maria Makyidalena kuwooka, ulya alemmbuta waṟufui wawicho mfungaaṙe.

¹⁰Icho naleyenda kaongoya mbonyi walya wawekyeri hamwi na oe, nawo waweikapa ṟanyi na ifiiṟa.

¹¹Kyaindi iwo kyiyeri waleicho kye nai na moo, na oe nammbona, waleiṙikyia-pfo.

¹²Numa ya isho kawoneka ko wandu wawi kyiiṙi kyawo, nawoṙe fana ingyi; nawo waweiyenda mṙemenyi.

¹³Na iwo wakayenda wakaongoya mbonyi walya wengyi; maa iwo walewairikyia-pfo.

¹⁴Numa ya iho kawono nyi walya ikumi na umwi kyiyeri waweilya. Kawaṙeṙia kyipfa kya iiṙikyia lyawo lyaangu na wuumu wo mrima yawo, cha kyipfa waleiṙikyia walya walemmbona kyiyeri aleṟuka ko wapfu-pfo.

¹⁵Kawawia, “Yendenyi wuyanenyi koose, mundeonguo Ndumi Ngyicha ko orio kyigumbe.

¹⁶Aiṙikyia na ipatiso nechikyia; alaiṙikyia, nechianduyo.

¹⁷Na shiṟingyishio-shi shechioshana na iwo waiṙikyie. Kui rina lyako wechifuna waṟufui wawicho; wechiṙeṙa kui mṙeṙie ngyihya.

¹⁸Wechiwaṙa njoka; maa wakanyo kyindo kya wuṟoi; kyechiwawutia kyindo maa ale-pfo. Wechiyekyia mawoko gawo wuye ya waluoe, nawo wechiwaṙa pfinya.”

¹⁹Kyasia Mndumii Yesu, amṙeṙe nawo, kaṙoo wuye ruwewu, kaṙamia kuwoko ko kulyoe ko Ruwa.

²⁰Na walya wakafuma, wakaonguo Ndumi Ngyicha kundu koose, Mndumii echiṟunda maṟunda hamwi nawo, na iṟingyishia mbonyi tsilya kui shiṟingyishio shileoshana natso.]