Read Kivunjo New Testament 1999 Mariko 2 Bible Online

Mariko 2 - Kivunjo New Testament 1999 bible

Mariko 2

¹Kaiṙa-se na Kaperinaumu hamwiṙe mfiri ifoi, kyikamanyika kye nakyeri kanyi.

²Halya kanyi hakasanzia wandu wafoi halatsugae maa ṙaawa moongonyi. Kawaongoya Ṙeṙo lyakye.

³Kukocha wandu wechimwendie mndu apfiie ngapfu, aṙuṙo nyi wandu waana.

⁴Na kyiyeri walelemo itikyira kufuhi na oe kyipfa kya wuingyi wo wandu, waletocha kai halya-ndu awekyeri; na wammarise iifunja walesotsa ikondoṟo mndu ulya apfiie ngapfu awelyilaaye.

⁵Na Yesu, kyiyeri alewona iiṙikyia lyawo, kawia ulya apfiie ngapfu, “Mono-ko, omhooṟio ngyuunyamaṟi tsapfo.”

⁶Na walosha waata wa mawawaso wawekyeri pfo, waṙamie, wechikusaṟa mrimenyi kowo,

⁷“Ny'kyilyi ichu aigamba kuṙi? Nailahia Ruwa. Nyi wui echiiṙima ihooṟia wunyamaṟi sile umwi tupu, nyi oe Ruwa?”

⁸Cha ilyi Yesu kamanya mrimenyi kokye kye waikusaṟa kuṙo mrimenyi kowo, kawawia, “Ny'kyilyi muikusaṟa kuṙi mrimenyi konyu?

⁹Kyii kyaangu nyi kyiha, iwia apfiie ngapfu, ‘Nohooṟio ngyuunyamaṟi tsapfo’, ang'u igamba, ‘Amka ukuṙikye ikondoṟo lyapfo uyende?’

¹⁰Kyaindi muiṙime imanya kye Mono-Adamu nawoṙe wuchilyi wuyanenyi wo ihooṟia wunyamaṟi.” Iho naiwia ulya apfiie ngapfu,

¹¹“Ngakuwia, amka, ukuiṙikye ikondoṟo lyapfo uyende kanyi kopfo.”

¹²Cha ilyi kaamka, kakuṙika ikondoṟo lyakye, kawuka mbele yawo woose; mṟasa wakaṟiyio woose, wakang'anyisa Ruwa, wechigamba, “Mbaṟe-i iyi lulandeenengo iiwona maa ale-pfo.”

¹³Kafuma-se kayenda mbai ya ipalyipalyi, wandu woose wa kyisanzionyi wakayenda kokye kawalosha.

¹⁴Na kyiyeri aweiiṙa, kawona Lewi, mana o Alyifayo, aṙamie handu hesania ukamba mbai ya ipalyipalyi, kammbia, “Ngyiosha.” Kaamka kamwosha.

¹⁵Na kyiyeri aweṙamie kanyi kokye echilya, wesania ukamba wafoi na wanyamaṟi waleṙamia hamwi na Yesu na wanalosho wakye; cha kyipfa wawei wafoi wechimwosha.

¹⁶Na walosha wa mawawaso na Mafarisayo kyiyeri walemmbona echilya hamwi na wesania ukamba na wanyamaṟi, walewia wanalosho wakye, “Ny'kyilyi ailya hamwi na wesania ukamba na wanyamaṟi?”

¹⁷Kyiyeri Yesu aleicho nalewawia, “Walaluoe wekyepfula mganga-pfo, kyaindi walya walaikuiṙima. Ngyilecha ilaga wasumganyi-pfo, indi wanyamaṟi.”

¹⁸Na wanalosho wa Yohane na Mafarisayo wawekyekuretekyia. Kyasia walecha, wakammbia, “Ny'kyilyi wanalosho wa Yohane na wanalosho wa Mafarisayo wekyekuretekyia, indi wanalosho wapfo wekyewuta kuṙo-pfo?”

¹⁹Yesu kawawia, “Walage wolyinyi weiṙima kuṙa ikuretekyia kyiyeri monyi wolyi akyeri hamwi nawo? Kyiyeri kyoose monyi wolyi akyeri hamwi nawo wechiiṙima ikuretekyia-pfo.

²⁰Kyaindi kuicha mfiri monyi wolyi echiwuto kowo, nyi lyo-ndu wechiṙa ikuretekyia mfiri-cho.

²¹Kuwoṙe mndu ekyewika kyiṙami kya nguwo ngyihya ikunyenyi lyiku-pfo; kawika kuṙo, kyilya kyihya kyawiko ho kyechinyamaṟa ikunya-lyo lyiku, na halya-ndu harandukyie hekyeengyeṟika.

²²Maa kuwoṙe mndu ekyewika mpfinyo shisagenyi shiku-pfo. Kokooya awika, mpfinyo ulya ochipaṟa shisaga-sho, mpfinyo ukopusuka, shisaga shilya shikanyamaṟika. Indi nekyewika mpfinyo shisagenyi shihya.”

²³Kyiyeri aweiiṙa maṙemenyi mfiri o onyonya wanalosho wakye wai kyaronyi walewooka iṙumbuo magaa ga nganu.

²⁴Mafarisayo wakammbia, “Ny'kyilyi waiwuta kyindo kyilai kya sungusinyi mfiri o onyonya?”

²⁵Kawawia, “Muichi chandu Dawidi aleṟunda, kyiyeri awemfooye, na iwoṙo nyi njaa, oe na oṙoe?

²⁶Chandu aleiṙa na numbenyi ya Ruwa, kacha kyiyeri kya Abiatari, Mkohanyi ang'anyi kuta woose, kalya mkate iya Ngyeele, ilawaṟi ilyio nyi mndu sile makohanyi, kaenenga na oṙoe?”

²⁷Kawawia, “Mfiri o onyonya ulewiko kyipfa kya mndu, chi mndu kyipfa kya mfiri o onyonya-pfo.

²⁸Kyasia Mono-Adamu nyi oe Mndumii o mfiri o onyonya taa.”