Read Kivunjo New Testament 1999 Mariko 4 Bible Online

Mariko 4 - Kivunjo New Testament 1999 bible

Mariko 4

¹Kawooka-se iloshia mbai ya ipalyipalyi. Wuingyi wung'anyi mnu wo wandu wukokuumbia kokye, mṟasa oe kaṙooya ngalawenyi, kakaa ipalyipalyinyi. Wuingyi woose wo wandu wuwei handu hagaṙutsu mbai ya ipalyipalyi.

²Kawalosha shindo shifoi kui mfano. Kawawia maloshonyi gakye,

³“Aṙanyienyi. Moolyia mbeu nalefuma indewaaya.

⁴Na kyiyeri aweiwaaya, mbeu ingyi ileoloka mbai ya njia, shileye shikacha shikailya.

⁵Ingyi ikaoloka handu hawoṙe iṟaṟa, halawoṙe teri ishikyie. Cha ilyi ikaṙo kyaindi kyipfa kya iwuṟa teri ishikyie,

⁶kyiyeri mui ulewaa ukoikoṟa, na kyipfa ilawoṙe mri ikauma.

⁷Ingyi ikaoloka handu hawoṙe msha; msha iya ikaṙo, ikaipfumba, ilakumbie ndunda.

⁸Ingyi ikaoloka handu hawoṙe teri ngyicha, tsikakumbia ndunda, tsechiṙo na ing'ana, na ikumbia, imwi makumi gaṟaaṟu, imwi makumi gaṟandaaṟu, na imwi igana.”

⁹Kagamba, “Awoṙe maṙwi geaṙanyia, naaṙanyie.”

¹⁰Na oe kyiyeri awekyeri amonyi, wandu walya wawemwiṟiwie, na walya ikumi na wawi, walemmbesa mbonyi tsa mfano iya.

¹¹Kawawia, “Nyoe muwaenengye imanya kyiṟika kya Wumangyi wo Ruwa, indi ko walya wai nja ya Wumangyi-wo shoose shekyeṟundika kui mfano,

¹²‘Kundu wakaambuya waambuye walawone; na wakaaṙanyia waicho, walamanye; walachengyiwiyilyia, na ihooṟio.’ ”

¹³Kawawia, “Muichi mfano-chu? Kyasia mfano yoose moimanya kuṙa?

¹⁴Moolyia mbeu-cho nekyewaaya Ṙeṙo lya Ruwa.

¹⁵Iwa nyiwo wai mbai ya njia, Ṙeṙo lya Ruwa lyekyewooyo kowo. Nawo wakamuicho, cha ilyi Satana nekyecha, kawuta ho Ṙeṙo lyilya lya Ruwa lyileṙongo mrimenyi kowo.

¹⁶Na wuṙo iwa nyiwo wekyeṙongo handu hawoṙe maṟaṟa. Nyiwo wakammaa iicho Ṙeṙo lyilya lya Ruwa, cha ilyi wekyelyiambilyia na sia.

¹⁷Kyaindi wawoṙe mri makyiṙi-gawi gawo-pfo, indi lyekyekaa kowo kyiyeri kyifuhi. Numa ya iho kukocha wukyiwa na ipfulutso nyashi kyipfa kya Ṙeṙo lyilya lya Ruwa, cha ilyi wekyekapa tuulyia.

¹⁸Na iwa nyiwo walya wekyeṙongo handu hawoṙe msha. Nyi wandu wekyeicho Ṙeṙo lyilya lya Ruwa,

¹⁹kyaindi ikuwinisha lya kyiwuyana, na wulembi wo masaa, na lango tsa shindo shingyi tsikacha, shekyepfumba Ṙeṙo lyilya lya Ruwa lyilakumbie.

²⁰Na iwa nyiwo wawaṙongye handu hawoṙe teri ngyicha. Nyi wandu wekyeicho Ṙeṙo lyilya lya Ruwa na ilyiambilyia, na ikumbia ndunda, umwi makumi gaṟaaṟu, umwi makumi gaṟandaaṟu, na umwi igana.”

²¹Kawawia, “Muwonyi kuṙa? Taa yekyekoṟo kundu iwikyio wanda ya kyitela, ang'u wanda ya kyitaṟa? Chi yekyewikyio handu hakuirie-pfoe?

²²Cha kyipfa kuwoṙe kyindo kyikuṟiikyie kyilechimanyika-pfo; maa kuwoṙe kyindo kyikyiṟikye, kyilechiwoneka na pata-pfo.

²³Mndu kawaṙa maṙwi geaṙanyia, naaṙanyie.”

²⁴Kawawia, “Aṙanyienyi kyindo-kyi. Kyindo kyilya muianduya nakyo oṙianyu ny'kyo Ruwa echimuanduya nakyo, kyaindi na wulang'a ngoseṟa.

²⁵Cha kyipfa awoṙe kyindo nechienengo, na oe alawoṙe kyindo kying'anyi, maa kyilya kyitutu awoṙe nechisoko.”

²⁶Kagamba, “Wumangyi wo Ruwa, mfano okye nyi cha mndu aleola mbeu wuye ya uruka.

²⁷Kawamolaa na iamka, kyio na kyingoto, na mbeu iya ikaṙo na ing'ana, alaichi oe.

²⁸Kyipfa uruka lokyeṙosa shindo lumonyi; kuwooka iṟa, kawi igaa lya nganu, numa nganu ikoṟie igaenyi.

²⁹Na ndunda tsikammba tsesambuo, cha ilyi nekyeira ishami, cha kyipfa kyilyimu kyamwafukyia.”

³⁰Kagamba, “Lulyingatsane Wumangyi wo Ruwa na kyikyi? Ang'u luuwikye mfanonyi uha?

³¹Nyi cha ndunda ya haradalyi. Kyiyeri yekyeṙongo urukyenyi, maa chandu ikyeri ngyitutu kuta mbeu tsoose tsikyeri urukyenyi,

³²ikamṙongo yekyeng'ana, ikawa ing'anyi kuta mashiṙi goose gawoṙe maṟa gekyelyio nyi wandu, ikawaṙa mbaga tsing'anyi; mṟasa shileye sha ngyinenyi shikaiṙima ikaa wanda ya mrinje oyo.”

³³Kui mfano ifoi ya mbaṟe-i naweiwaongoya Ṙeṙo lyakye, iṙuana na chandu waleiṙima ilyiaṙanyia.

³⁴Maa aleṙeṙa nawo kulawoṙe mfano-pfo; kyaindi kaongoya wanalosho wakye amonyi mbonyi tsoose kui kyiṟika.

³⁵Mfiri ulya kyiyeri kya kyukonyi kawawia, “Luambaṙe mṟasa molyolya.”

³⁶Wakaṙa wuingyi wulya wo wandu, wakamṙuo wuṙo chandu awekyeri ngalawenyi. Na ngalawa tsingyi tsiwekyeri hamwi na oe.

³⁷Kukocha kyiwiṟi kying'anyi kya mkuma, mṟinga uiyenda na pfinya ukokapa ngalawa iya mṟasa ikawooka iichuo mṟinga.

³⁸Na oe amonyi nawekyeri ura lo numa lo ngalawa, alee wuye ya mto. Wakamwamtsa, wakammbia, “Mlosha, chi kyindo kopfo iluṙa lurumare-pfoe?”

³⁹Kaamka, kaṙeṙia mkuma, kawia ipalyipalyi, “Tsia, ulakupaaye!” Mkuma ukotsia, kukowaṙa itsia sau lying'anyi.

⁴⁰Kawawia, “Ny'kyilyi mowa waowu? Mulandewaṙe iiṙikyia-pfoe?”

⁴¹Wakawoṙo nyi wuowu wung'anyi, wakawiana, “Nyi wui ichu-ng'u, maa mkuma na ipalyipalyi shimwindia?”