Read Kivunjo New Testament 1999 Mariko 5 Bible Online

Mariko 5 - Kivunjo New Testament 1999 bible

Mariko 5

¹Wakashika molyolya o ipalyipalyi mṟasa uruka lo Wakyerasi.

²Na amsokye ngalawenyi, cha ilyi nalekarisana na mndu, awewukyie handu heṟika wandu wapfiie, awoṙo nyi mṟufui mmbicho.

³Kanyi kokye kuwei handu halya heṟika wandu wapfiie; maa kuwoṙe mndu oose aleiṙima impfunga-se maa kui mshe-pfo,

⁴cha kyipfa nawekyepfungo kafoi ko pingu na mshe; kaṙumbuo-ṙumbuo mshe iya na ifunja-funja pingu tsilya; maa kuwoṙe mndu awewoṙe pfinya tsemmbinga-pfo.

⁵Na mfiri yoose, kyio na kyingoto, nawekyeri kulya kundu koṟika wandu wapfiie na mafumvunyi, ekalagatsa na ikuwega-wega na magoe.

⁶Na kyiyeri alewona Yesu ai kuleshi, nalekapa mteeṟa, kamwindia.

⁷Kakalagatsa kui ṟui lying'anyi, kagamba, “Lekana na inyi, Yesu, Mono-Ruwa akyeri ruwewu. Kui rina lya Ruwa ulangyilyise wukyiwa.”

⁸Cha kyipfa nalemmbia, “Iyoe mṟufui mmbicho, wuka mndu-chu.”

⁹Kammbesa, “Rina lyapfo nyi wui?” Kamgaluo, kagamba, “Rina lyako nyi ‘Wandu Walang'a’, cha kyipfa lui wafoi.”

¹⁰Kamterewa mnu alawaṙuo nja ya uruka lulya.

¹¹Na iho mafumvunyi hawewoṙe poo lying'anyi lya nguwe, tsechilyiso.

¹²Waṟufui wawicho woose wakamterewa, wechigamba, “Luṙuo ko nguwe, luiṙime iiṙa na mmbiunyi yatso.”

¹³Kawaenenga momu. Waṟufui walya wawicho wakafuma, wakaiṙa na mmbiunyi ya nguwe tsilya; na poo lyilya lyoose lyikaseṟemka kyiiṟimikonyi lyeṙicha, tsikaiṙa na ipalyipalyinyi, cha nguwe shiku shiwi; tsikapfiia ipalyipalyinyi.

¹⁴Walyisi wa nguwe tsilya wakaṙicha, wakaonguo mbonyi-tso mṟinyi na kundu kulai mṟinyi. Wandu wakafuma wawone kyindo kyilewutika.

¹⁵Wakayenda ko Yesu, wakawona ulya awewoṙo nyi waṟufui wawicho, aṙamie, aṟee nguwo, alamsuko-se, na oe nyi oe awewoṙo nyi poo lyilya lya waṟufui wawicho; wakaowuo.

¹⁶Na walya walekowawona walewaongoya mbonyi tsilewutikyia ulya awewoṙo nyi waṟufui wawicho, na mbonyi tsa nguwe.

¹⁷Wakawooka imterewa nawukye kulya kowo.

¹⁸Na oe kyiyeri aweiṙooya ngalawenyi, ulya awewoṙo nyi waṟufui wawicho nalemterewa nayende na oe.

¹⁹Kyaindi alemlekyia-pfo, indi nalemmbia, “Yenda kanyi kopfo, ko wandu wa kopfo, ndewaongoye shindo shilya shing'anyi Mndumii alekuwutia, na chandu alekusaṟia.”

²⁰Kafuma kawooka ionguo mṟinyi ung'anyi uwoṙe shikaṟo ikumi okyelago Dekapolyi, shindo shilya shing'anyi Yesu alemmbutia; wandu woose wakaṟiyio.

²¹Na kyiyeri Yesu amwambaṙe iwuya na molyolya akyeri kulya ngalawenyi, wuingyi wung'anyi wo wandu wukokuumbia kufuhi na oe; na oe nawekyeri mbai ya ipalyipalyi.

²²Kukocha mndu umwi kyiiṙi kya wang'anyi wa sinagogi, ekyelago Yairo; na kyiyeri alemmbona, kaoloka maṙendenyi gakye,

²³echimterewa mnu, echigamba, “Mono-ko mtutu o kyika naipfa. Ngyikuterewa uche, uwikyie kuwoko kopfo wuye yakye, naiṙime ikyia, na iwaṙa moo.”

²⁴Kayenda hamwi na oe. Wuingyi wung'anyi wo wandu wukomwosha, wechimpeṟeetsa-peṟeetsa.

²⁵Kuwewoṙe mndu mka umwi awoṙe ndoṟe yechoṟa kyiyeri kya maka ikumi na iwi,

²⁶maa chandu alelyiso wukyiwa kafoi echiṟundio nyi waganga wafoi. Shindo shoose awewoṙe shileenengyio shemṟundia, kyaindi shilamtarame maa ale, indi ndoṟe yakye ikaengyeṟa ing'ana.

²⁷Kyiyeri aleicho mbonyi tsa Yesu, naleiṙa wuingyinyi wulya wo wandu kakaa numa ya Yesu, kapaaya ikunya lyakye,

²⁸kyipfa nalegamba, “Ngapaaya maa mawale gakye tikyi, ngyechikyiṟo.”

²⁹Cha ilyi shoka ya samu yakye ikauma, na oe kamanya mmbiunyi okye kye amkyia wukyiwa wulya.

³⁰Cha ilyi Yesu, aichi mrimenyi kokye kye pfinya yammbuka, kaambuya numa kulya wuingyinyi wo wandu, kagamba, “Nyi wui angyipaaya mawale gako?”

³¹Wanalosho wakye wakammbia, “Nuwewonyi chandu wuingyi wo wandu waikupeṟeetsa-peṟeetsa, na iyoe nuigamba, ‘Nyi wui angyipaaya?’ ”

³²Kaambuya ngyuura tsoose kundu nawone ulya aleṟunda kyindo-kyo.

³³Na mndu mka ulya kawoṙo nyi wuowu na iṙeṙema, aichi kyammbutikyia, kacha kamwolokyia, kamwongoya wuloi woose.

³⁴Kammbia, “Mono-ko o kyika, iiṙikyia lyapfo lyakukyiṟa, yenda na ufoṟo, ndoṟe-yo ilawe-se wukyiwa wopfo.”

³⁵Na kyiyeri aweiṙeṙa, kukocha wandu wawuka ko ulya ang'anyi o sinagogi, wechigamba, “Mono-pfo o kyika ampfa. Kuwoṙe kyiira kyiha iengyeṟa ituura mlosha?”

³⁶Kyaindi Yesu, kyiyeri aleicho mbonyi-tso, kawia ang'anyi ulya o sinagogi, “Ulaowuoe, waṙa iiṙikyia tupu.”

³⁷Maa alelekyia mndu ioshana na oe-pfo, sile Petiro, Yakobo, na Yohane, mono-wama o Yakobo.

³⁸Wakashika kanyi ko ang'anyi ulya o sinagogi, kawona kyituṟu, na wandu wechifiiṟa, wechikapa ṟanyi ing'anyi.

³⁹Amwiṙe na numba, kawawia, “Ny'kyilyi muwoṙe kyituṟu na ifiiṟa? Mana alandepfe-pfo, indi nalee tupu.”

⁴⁰Wakamsaaṟa mnu. Na oe amwafune na nja woose, kaṙuo awu o mana ulya na wamae, na walya wakyeri hamwi na oe, kaiṙa na halya-ndu mana ulya awekyeri.

⁴¹Kawaṙa mana ulya kuwoko, kammbia, “Talyita, kumi”; kyitambuluo kyakye nyi “Mono-waka, ngakuwia, amka.”

⁴²Cha ilyi mana ulya kagoṟoka, kayenda, cha kyipfa nawewoṙe maka ikumi na iwi. Cha ilyi wakaṟiyio lying'anyi.

⁴³Kawatutuma mnu, mndu alamanye mbonyi tsilya, kagamba mana ulya naenengo kyelya.