Read Kivunjo New Testament 1999 Mariko 7 Bible Online

Mariko 7 - Kivunjo New Testament 1999 bible

Mariko 7

¹Numa ya iho Mafarisayo na walosha waata wa mawawaso wawewukyie Yerusalemu, wakakuumbia mbele yakye.

²Wakawona wengyi kyiiṙi kya wanalosho wakye, wechilya shelya na mawoko galamasanje kyimṟumoe chandu Mafarisayo wawekyewuta.

³Cha kyipfa Mafarisayo na Wayuda woose, walandesanje mawoko mṟasa ukokuo wekyelya-pfo, wechiindia shilya waleambilyia ko waku wawo.

⁴Lyingyi-se wakawuka sangaṙa walandesambe, wekyelya-pfo. Na kuwoṙe shido shingyi waleshiambilyia ko waku wawo wawekyeshiindia, cha isanja shiṙoo, na shinungu, na shindo cha piṟika.

⁵Kyasia Mafarisayo na walosha walya wa mawawaso wakammbesa, “Ny'kyilyi wanalosho wapfo walekyeindia shilya luleambilyia ko waku waṙu, indi wekyelya na mawoko gafanyi?”

⁶Kawawia, “Yesaya nalesonguo ionguo necha mbonyi tsanyu nyoe wakulembecheṟi, chandu kyikyiṟeie, ‘Wandu-wa wekyengyiindia kui maṙumbu indi mrima yawo ikyeri kuleshi na inyi;

⁷Nawo wekyengyiana na ingyiterewa wulya, wechilosha malosho gakyeri mawawaso ga wandu.’ ”

⁸Nyoe mokyemina iwawaso lya Ruwa, na iwaṙa shilya wandu waambilyie ko waku wawo.

⁹Kawawia, “Necha! Muilega iwawaso lya Ruwa muiṙime iindia shindo muleambilyia ko waku wanyu.

¹⁰Kyipfa Mose nalegamba, ‘India awuyo na womoo’, na, ‘Alahia awuye ang'u wamae ipfa na napfe.’

¹¹Kyaindi nyoe mokyegamba, ‘Mndu kawia awuye ang'u wamae, kyindo ngyikundi ikuenenga uwone ho kyiira nyi Koriban’, kyimwi na igamba, kyindo kyikyiwikyie mboṟa ko maṟunda ga Ruwa, kyekyewa kuṙo.

¹²Maa numa ya iho mokyeenenga mndu-cho momu iṟundia awuye ang'u wamae kyindo-pfo;

¹³kunu mochilega kyilya Ruwa agambie kui shindo nyoe cha Wayuda muleambilyia ko waku wanyu na iwia wana wanyu ishiṟunda. Lyingyi-se mokyeṟunda shindo shifoi shilyingananyi na isho.”

¹⁴Kalaga-se wuingyi wo wandu, kawawia, “Ngyiaṙanyienyi moose na imanya.

¹⁵Kuwoṙe kyindo kyikyeri nja ya mndu kyekyeiṙa na kokye kyikaiṙima imfanyiṟa kyimṟumoe-pfo. Indi shilya shekyewuka kokye, nyisho shekyefanyiṟa mndu ulya. [

¹⁶Mndu kawaṙa maṙwi geaṙanyia, na naaṙanyie.]”

¹⁷Na lyilya aleiṙa na kanyi, nalekana na wuingyi wo wandu, wanalosho wakye wakammbesa mbonyi tsa mfano ulya.

¹⁸Kawawia, “Maa nyoe muwoṙe wuṟango-pfoe? Muichi kye orio kyindo kyikyeri nja ya mndu, kyikaiṙa na kokye, kyeiṙima imfanyiṟa-pfo;

¹⁹cha kyipfa kyekyeiṙa na mrimenyi kokye-pfo, indi ndewunyi tikyi; numa ya iho kyekyefuma iyenda choṟonyi?” Kui igamba kuṙo naleloṟa kye kuwoṙe kyelya kyiwicho-pfo.

²⁰Kagamba, “Kyekyewuka ko mndu nyikyo kyekyemfanyiṟa kyimṟumoe.

²¹Cha kyipfa mrimenyi ko wandu kokyewuka makusaṟo mawicho, wuṟui,

²²wuiwi, uwaagi, lango ngyiwicho, wulang'a, ngyeṟo, ukoe, wunyeng'i, shilahio, ikuṙosa na wutondo.

²³Ishi shoose shekyewuka ko mndu, nasho shekyefanyiṟa mndu kyimṟumoe.”

²⁴Kawuka pfo, kayenda mṟasa uruka lo Tiro na Sidon. Kaiṙa na numba, alakunde kyimanyikye; kyaindi aleiṙima ikuṟiika-pfo.

²⁵Cha ilyi mndu mka, mono-kye awoṙo nyi mṟufui mmbicho, naleicho mbonyi tsakye, kacha kamwolokyia maṙendenyi gakye.

²⁶Na mndu mka ulya nyi Mkyiṟikyi, amfee ko Wasirofoinikye. Kamterewa nawute mana ulya okye o kyika mṟufui mmbicho.

²⁷Kammbia, “Leka wana waiguṙe kuwooka; kyipfa chi necha iwuta kyelya kya wana na iwiyitsia shite-pfo.”

²⁸Na oe kagaluo, kammbia, “Yee, Mndumii, kyaindi maa shite shikyeri wanda ya mesa shekyelya matsugaṟo ga wana.”

²⁹Kammbia, “Kyipfa kya ṙeṙo-lyo, yenda; mṟufui mmbicho ammbuka ko mono-opfo.”

³⁰Kayenda kanyi kokye, kakooya mana ulya amlaṟe kyitaṟenyi, na mṟufui ulya mmbicho amwummbuka.

³¹Kawuka-se urukyenyi lo Tiro, kaiṙa makyiṙi-gawi ga Sidon, kayenda mṟasa ipalyipalyi lya Galyilaya, mṟasenyi na uruka luwoṙe mṟi ung'anyi uwoṙe shikaṟo ikumi okyelago Dekapolyi.

³²Wakamwendie mndu mpfu maṙwi, alawekyeiṙima iṙeṙa, wakamterewa namwekyie mawoko.

³³Kammbikyia kuleshi na wuingyi wo wandu handu hakuṟiikyie. Kawika shimnyoe shakye maṙwinyi gakye, kapucha maṙa, kampaaya ulumi.

³⁴Kaambuya wuye ruwewu, katerewa Ruwa kui isumkyia lying'anyi, kammbia, “Efata”, kyimwi na igamba, “Tambuluka.”

³⁵Cha ilyi maṙwi gakye gakaṟusuka, ulumi lokye lukoṟengyeṟa, kaṙeṙa necha.

³⁶Kawaima walaongoye mndu; kyaindi chandu aleengyeṟa iwaima, nyi wuṙo waleengyeṟa ionguo mbonyi.

³⁷Wakaṟiyio mnu, wechigamba, “Naṟunda shindo shoose necha. Wapfu maṙwi naiwaenenga iicho, na wai ndiṟi iṙeṙe.”