Read Kivunjo New Testament 1999 Mariko 9 Bible Online

Mariko 9 - Kivunjo New Testament 1999 bible

Mariko 9

¹Kawawia, “Ny'kyaloi, ngammbia, kuwoṙe wandu kyiiṙi kya iwa wagoṟokyi iha, wechiwaṙa moo, mṟasa kyiyeri wechiwona Ruwa echichilyia.”

²Na lyilya mfiri iṟandaaṟu ileiṙa Yesu kaṙuo Petiro, na Yakobo, na Yohane, kawaṙuo wuye ya fumvu lyileshi handu hakuṟiikyie, wo wawenyi; kailachika fana mbele yawo.

³Mawale gakye gechikyema-kyema, gameelyi mnu, kulawoṙe mndu wuyanenyi koose eiṙima igasanja gaile kuṙo.

⁴Elyia hamwi na Mose wakacha na handu halya, nawo waweiṙeṙa na Yesu.

⁵Petiro kawia Yesu, “Mlosha, nyi kyicha soe ikaa iha. Luwikye matengo gaṟaaṟu, lyimwi lyapfo iyoe, lyimwi lya Mose, na lyimwi lya Elyia.”

⁶Petiro alemanya kyeṙeṙa-pfo, cha kyipfa walewoṙo nyi wuowu wung'anyi.

⁷Numa ya iho hakawoneka ipuchi, lyikawaendie kyirinje. Ṟui lyikawuka kulya ipuchinyi, “Ichu nyi Mono-ko, mkunde oko, mwaṙanyienyi oe.”

⁸Cha ilyi kyiyeri waleambuya kunu na kunu, walawone mndu akyeri nawo sile Yesu amonyi tupu.

⁹Na lyilya waweisoka fumvunyi nalewaima walaongoye mndu shilya walewona, mṟasa kyiyeri Mono-Mndu echiṟuka ko wapfu.

¹⁰Wakawuta kyilya walewio, wechiwesana wo wenyi ko wenyi, “Iṟuka-lyo ko wapfu lyagamba kyi?”

¹¹Wakammbesa, wechigamba, “Ny'kyilyi walosha wa mawawaso wekyegamba kye kyiwaṟi Elyia icha kuwooka?”

¹²Kagaluo kawawia, “Nyi loi Elyia naicha kuwooka, na iwiyiṟia wuhya shindo shoose, kyaindi, hamwi na isho, kyikyiṟeie kuṙa kye Mono-Mndu nechiwona matuuro gafoi na imino?

¹³Kyaindi ngammbia, Elyia amcha, nawo wakammbutia shoose walekunda chandu kyiwekyiṟeie.”

¹⁴Na lyilya walekooyana na wanalosho, walewona wuingyi wung'anyi wo wandu wuwaiṟiwie na walosha wa mawawaso wechigaluana nawo.

¹⁵Cha ilyi kyiyeri wuingyi wung'anyi wo wandu walemmbona waleṟiyio, wakakapa mteeṟa, wakamwiṟikyiṟa.

¹⁶Kawawesa, “Ny'kyikyi muigaluana nawo?”

¹⁷Mndu umwi wuingyinyi wulya wo wandu kagaluo kagamba, “Mlosha, ngaende mono-ko na kopfo, nawoṙo nyi mṟufui mmbicho ekyemwima iṙeṙa.

¹⁸Na orio kyiyeri ammbaṙa, nekyemwolotsa wanda, na oe nekyeṙosa mawia na ilya ngakuru na imwumiṟa ng'ashu. Ngaṙeṙa na wanalosho wapfo wammbute mṟufui-cho mmbicho walaiṙime.”

¹⁹Kawagaluo, kagamba, “Nyoe rika lyiwoṙe iiṙikyia lyifofo, ngyikae na nyoe mṟasa indi? Ngyiṙuane na nyoe mṟasa indi? Muendenyi na koko.”

²⁰Wakamwende na kokye. Na lyilya alemmbona, cha ilyi mṟufui ulya nalemṙeṙemsha, na oe kaoloka wanda, kakuoṟoosa-oṟoosa, echiṙosa mawia.

²¹Kawesa awuye, “Ishi shimmbookyie indi?” Kagamba, “Wookyia wututunyi.

²²Na kafoi nekyemmbiyitsa moṙonyi, na mṟingyenyi, namrumatse. Kyaindi koiṙima, luwonie wukyiwa, na ilutarama.”

²³Yesu kammbia, “Koiṙima! Shoose shekyeiṙimika ko ulya aiṙikyie.”

²⁴Cha ilyi awu o manakye ulya kakuilenga na ṟui lying'anyi, kagamba, “Ngaiṙikyia, ngyitarama kundu ngyiiṙikyie.”

²⁵Na Yesu awonyi kye wuingyi wo wandu wuisanza iwinyi, kaṙeṙia mṟufui ulya mmbicho, kammbia, “Iyoe mṟufui mmbicho moima iṙeṙa na iaṙanyia, inyi ngakuwia, wuka ko ichu, maa ulaiṙe-se na kokye.”

²⁶Kafuga, kamṙeṙemsha mnu, kammbuka; na oe kawa cha ilyi apfiie; mṟasa wafoi wakagamba, “Napfa.”

²⁷Kyaindi Yesu kammbaṙa kuwoko kamwira; na oe kagoṟoka.

²⁸Na lyilya aleiṙa na kanyi, wanalosho wakye wakammbesa kui kyiṟika, “Kyitewe soe lulaleiṙima immbuta ny'kyi?”

²⁹Kawawia, “Mbaṟe-i yeiṙima iwuka kui ṙeṙo lyoose, sile kui iterewa-pfo.”

³⁰Wakawuka pfo, wakaiṙa makyiṙi-gawi ga Galyilaya; na oe alekunda mndu namanye-pfo.

³¹Cha kyipfa naweilosha wanalosho wakye, kawawia, “Mono-Mndu naindewiko mawokonyi ga wandu, nawo wechimmbaaga; na kammboogo, numa ya mfiri iṟaṟu nechiṟuka.”

³²Kyaindi walemanya ṙeṙo lyilya-pfo, wakaowuo immbesa.

³³Wakashika Kaperinaumu; na lyilya awekyeri kanyi, kawawesa, “Ny'kyikyi muweiṙeṙa njienyi?”

³⁴Wakatsia; cha kyipfa njienyi waweigaluana wo wenyi ko wenyi, nyi wui akyeri ang'anyi.

³⁵Kaṙamia wanda, kalaga walya ikumi na wawi, kawawia, “Mndu akundi iwa o kuwooka nechiwa o mafurumionyi kuta woose, na mṟundi o woose.”

³⁶Kaira kyikoku, kakyiwikyia makyiṙi-gawi gawo, kakyichunguṟia, kawawia,

³⁷“Mndu kaambilyia mana umwi o mbaṟe-i kui rina lyako, nangyiambilyia inyi; na mndu kangyiambilyia inyi, naambilyia, chi inyi-pfo, indi ulya alengyiṙuma.”

³⁸Yohane kamgaluo, kammbia, “Mlosha, lulewona mndu echiwuta waṟufui wawicho kui rina lyapfo, alekyeoshana na soe; lukomwima, cha kyipfa ekyeoshana na soe-pfo.”

³⁹Yesu kagamba, “Mulamwime-pfo, cha kyipfa kuwoṙe mndu echiwuta kyindo kya kyiṟiyisho kui rina lyako kaweiṙima na iṙeṙa kyiwicho kyako-pfo.

⁴⁰Cha kyipfa ai ura loṙu, nyi oṙu.

⁴¹Orio mndu echimrutsa nyoe kyiṙoo kya mṟinga, cha kyipfa nyoe nyi wandu wa Kristo, ny'kyaloi, ngammbia, easha wori wokye-pfo.”

⁴²“Na mndu echitewe umwi o iwa watutu wangyiiṙikyie, nanga apfungyio ikyesa nzingonyi kokye, na iwiyitso ipalyipalyinyi.

⁴³Na kuwoko kopfo kukokutewe, ṙumbuo kuwoko-ko. Nyi nanga iiṙa na moonyi o mlungana uwoṙe kuwoko kumwi, kuta iwaṙa mawoko gawi na iyenda ngyehenenyi, kundu kuwoṙe moṙo ulekyeruma; [

⁴⁴kulya-ndu mashinu gekyelya mawoko-ga galekyepfa, maa moṙo ulekyeruma.]

⁴⁵Na kuṙende kopfo kukokutewe, ṙumbuo kuṙende-ko. Nyi nanga iiṙa na moonyi o mlungana, ui kyiwete, kuta iwaṙa maṙende gawi na iwiyitso ngyehenenyi; [

⁴⁶kulya-ndu mashinu gekyelya maṙende-ga galekyepfa, maa moṙo ulekyeruma.]

⁴⁷Na riso lyapfo lyikakutewe, lyikuluoe, ulyiwiyitse. Nyi nanga iiṙa na Wumangyinyi wo Ruwa, uwoṙe riso lyimwi, kuta iwaṙa meso gawi, na iwiyitso ngyehenenyi

⁴⁸kulya-ndu mashinu gekyelya meso-ga galekyepfa, maa moṙo ulekyeruma.”

⁴⁹“Cha kyipfa iiṙikyia lya orio mndu lyechilotsiṟo nyi moṙo chandu munyu okyelotsiṟa shindo.

⁵⁰Munyu nyi kyindo kyicha, kyaindi munyu ukowa chi munyu-se-pfo, mochiuwika kyi uṙahie? Waṙenyi munyu mrimenyi konyu, mukae na ufoṟo nyoe wenyi ko wenyi.”